Աղբիւր՝ www.yerkir.am

Վարչապետ Յովիկ Աբրահամեանն այցելել է Սփիւռքի նախարարութիւն եւ մասնակցել նախարարութեան 6-ամեայ գործունէութեան ամփոփմանը նւիրւած միջոցառմանը:

Մինչ այդ վարչապետը նախարար Հրանուշ Յակոբեանի ուղեկցութեամբ շրջայց է կատարել նախարարութիւնում, ծանօթացել աշխատակազմի ստորաբաժանումների աշխատանքային պայմաններին, զրուցել աշխատակիցների հետ: Յովիկ Աբրահամեանը շնորհաւորել է նախարարութեան աշխատակազմին՝ 6-ամեայ արդիւնաւէտ աշխատանքի կապակցութեամբ եւ կարեւորել գերատեսչութեան դերը հայապահպանութեան գործում: Վարչապետը նշել է, որ շարունակելու է աջակցել Սփիւռքի նախարարութեանը՝ իւրաքանչիւր ողջամիտ առաջարկութիւն կեանքի կոչելու գործում:

Խօսելով Սփիւռքում մայրենի լեզւի պահպանման մասին՝ Յովիկ Աբրահամեանն ընդգծել է, որ Հ.Հ.-ի կառավարութիւնը պատրաստ է այդ ուղղութեամբ օժանդակութիւն ցուցաբերել: Գործադիրի ղեկավարը ողջունել է նաեւ Սփիւռքի ուսուցիչների վերապատրաստման ուղղութեամբ իրականացւող քայլերը՝ դա գնահատելով որպէս հայանպաստ ու ազգանւէր աշխատանք:

«Տիկին նախարար, Սփիւռքի հայկական դպրոցների պահպանութեան հարցում եւս միջոցներ, ռեսուրսներ չի կարելի խնայել, եւ Հ.Հ.-ի Կրթութեան ու գիտութեան նախարարի հետ ջանք չպէտք է խնայէք՝ այս ուղղութեամբ դրական արդիւնքներ արձանագրելու եւ առկայ խնդիրները յաղթահարելու համար»,- նշել է Յովիկ Աբրահամեանը:

Վարչապետը, բարձր գնահատելով Սփիւռքի նախարարութեան անցած տարիների ընթացքում կատարած աշխատանքները, կարեւորել է գերատեսչութեան դերը նաեւ Հայաստան-Արցախ-Սփիւռք եռամիասնութեան ամրապնդման գործում:

«Այս եռամիասնութեան ամրապնդումն ուղղակիօրէն բխում է հայ ժողովրդի շահերից»,- նշել է Յովիկ Աբրահամեանը: Այնուհետեւ վարչապետը Հրանուշ Յակոբեանին պարգեւատրել է Հ.Հ.-ի վարչապետի անւանական ժամացոյցով եւ յանձնել նախարարութեան աշխատակազմը համալրած նոր քաղծառայողների վկայականները: