Աղբիւր՝ www.yerkirmedia.am

Կարմիր խաչի միջազգային կոմիտէի Հայաստանի ներկայացուցչութիւնն ափսոսանքն է յայտնում, որ յուլիսի 26-ին կրակոցների պատճառով կասեցրել է Տաւուշի մարզի Չինարի գիւղում բերքահաւաքի անվտանգութեան ապահովման իր աշխատանքը:

Կառոյցի տարածած յայտարարութեան համաձայն՝ կրակոցների հետեւանքով տուժածներ չկան, եւ միայն կազմակերպութեան մեքենան է թեթեւակի վնասւել: Իսկ միջադէպից առաջ, ըստ նոյն աղբիւրի՝ Կարմիր խաչի միջազգային կոմիտէի ներկայութեամբ՝ անվտանգութեան պայմաններում գիւղացիները 4 հեկտար բերք են կարողացել հաւաքել:

«Կարմիր խաչի միջազգային կոմիտէի քաղաքականութիւնն է համապատասխան իշխանութիւնների միջեւ գաղտնի երկխօսութեան միջոցով անվտանգութեանը վերաբերող մտահոգութիւնների վրայ ուշադրութիւն հրաւիրել: Հետեւաբար, Կ.Խ.Մ.Կ.-ն նմանատիպ միջադէպերի յստակ հանգամանքները հրապարակայնօրէն չի մեկնաբանում: Այդ քաղաքականութեան միջոցով է կազմակերպութիւնը կարողանում իշխանութիւնների հետ այնպիսի յարաբերութիւնները պահպանել, որոնք կօգնեն շարունակել աշխատանքը՝ յանուն զինւած հակամարտութիւնների հետեւանքներից տառապած մարդկանց»,- ասւած է հաղորդագրութեան մէջ:

Նշւած է նաեւ, որ կազմակերպութիւնը կը շարունակի աշխատանքներ իրականացնել՝ յօգուտ միջազգային սահմանին մօտ ապրող մարդկանց: