Մանուկների պաշտպանութեան միջազգային օրւայ առիթով, չորեքշաբթի՝ յունիսի 8-ի երեկոյեան, Նոր Ջուղայի Հայ Մ. Մ. «Արարատ» միութեան բացօթեայ տարածքում իրականացւած՝ «Մանկական ուրախ ժամանց» միջոցառումն իր շուրջ էր համախմբել հայ համայնքի մանուկներին, ովքեր հաճելի եւ ուրախ մթնոլորտում վայելեցին երեկոյի կազմակերպիչ՝ նոյն միութեան Մշակութային միաւորի վարչութեան պատրաստած խաղերը եւ Սպահանի «Սանա» մանկական խաղերի կենտրոնի միջոցով իրականացւած խաղային ծրագիրը:

Ծրագրի մէկ այլ հետաքրքիր բաժնում երեխաները համտեսեցին «196 Գելատօ» պաղպաղակի խանութի անձնակազմի միջոցով տեղում պատրաստւած անուշահամ պաղպաղակները:

Կազմակերպւել էր նաեւ լուսանկարչական տաղաւար՝ Վանէ Արթունեանի համագործակցութեամբ:

Միջոցառման կազմակերպման եւ իրականացման աշխատանքներում իրենց համագործակցութիւնն էին բերել Մշակութային միաւորի «Գիտունիկի տնակ» բաժնի յանձնախումբը եւ Մշակութային միաւորի «Կռունկ» պարախմբի մի շարք անդամներ:

Երեկոն վարեց «Կռունկ» ասմունքի խմբի անդամուհի ՝Շաղիկ Մատթէոսեանը:

Թղթակից՝ Նոր Ջուղա