Սարդարապատի, Ղարաքիլիսայի ու Բաշ-Ապարանի հերոսամարտերի յաղթանակներով պսակւած Հայաստանի Հանրապետութեան 104-ամեակի առիթով, շաբաթ՝ մայիսի 28-ի երեկոյեան, Նոր Ջուղայի Հայ Մ. Մ. «Արարատ» միութեան շրջափակում տեղի ունեցաւ ժողովրդական տօնախմբութիւն:
Միջոցառումն սկիզբ առաւ՝ դրօշի արարողութեամբ, Հանրապետական մաղթանքով, որն իրականացւեց նախագահութեամբ Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանի եւ մասնակցութեամբ եկեղեցականաց դասի եւ ի հարկէ ՀՀ հիմնի ունկնդրութեամբ:
Այնուհետեւ արտայայտւեց երեկոյի հանդիսավար Մանիա Ղուկասեանը, որից մի հատւած մէջբերում ենք.
«Ցեղասպանութիւնից փրկւած, յուսալքւած ու կոտրւած ժողովուրդն ուղղեց իր մէջքը. արտայայտեց անկոտրում կամք. ելաւ գոյապայքարի եւ ոչ միայն ապրեց, ոչ միայն փրկւեց, այլեւ ստեղծեց պետութիւն: Իսկ այսօր մեր ազգային ամենամեծ ու ամենաիմաստալից տօներից մէկը նշում ենք ճգնաժամային պայմաններում… Ուզում են մեզանից խլել մեր յաղթանակները, տապալել մեր վաղեմի երազանքները եւ ոչնչացնել սեփական հողի վրայ մեր ապրելու յոյսն ու իրաւունքը: Չի ստացւելու, թոյլ չենք տալու, քանզի մենք ժառանգորդներն ենք Արամի, Դրոյի ու Նժդեհի»:
Շարունակութեան մէջ թեմակալ Առաջնորդ Սրբազան Հայրը, թեմի Պատգ. ժողովի դիւանի եւ Թեմական ու Կրօնական խորհուրդների ատենապետներ՝ Նոէլ Մինասեանը, Վրէժ Տէր-Մարտիրոսեանն ու Զաւէն Սիմոնեանը, շրջանի Հայ Դատի յանձնախմբի ներկայացուցիչ Արբի Բաբայեանը, օրւայ բանախօս Հայաստանից հրաւիրւած պատմաբան, Հայ Դատի փորձագէտ ու քաղաքական գործիչ Հրաչ Թադէոսեանը եւ Պատգ. ժողովի ցկեանս պատւոյ անդամ Թաթուլ Օհանեանն ընդունեցին աւանդոյթ դարձած շքերթ-տողանցքը, մասնակցութեամբ՝ Նոր Ջուղայի եւ Շահինշահրի ազգային մարմինների, շրջանի Հայ Դատի յանձնախմբի, միութիւնների, հայոց ազգ. դպրոցների պատասխանատուների եւ աշակերտութեան, ինչպէս նաեւ ՀՀ հիմնադրման 104-ամեակի կազմակերպիչ յանձնախմբի:
Այնուհետեւ բանախօսական ելոյթ ծաւալեց Հրաչ Թադէոսեանը: Նա պատմական ակնարկ ունենալով 1918 թւականի հերոսամարտին, եւ յատկապէս նշելով ժողովրդի զանազան շերտերի մասնակցութիւնն այս գոյապայքարին, աւելացրեց, թէ Մայիսի 28-ին Հայաստանի արեւելեան գաւառներում Հայաստանի Հանրապետութեան հռչակումը, պատմական եւ քաղաքական իմաստներով կարեւոր նշանակութեամբ իրադարձութիւն էր, քանի որ այն օրերին դրւած հիմքերի ու ստեղծւած նախադրեալների կարեւորութիւնն զգացւում է առ այսօր:
Նա շեշտեց նաեւ, որ Մայիս 28-ի խորհուրդը Խորհրդային Հայաստանի ժամանակաշրջանում հիմնականում պահպանւել է սփիւռքի ազգային մարմինների, դպրոցների, միութիւնների եւ ազգի նւիրեալ զաւակների ջանքերի շնորհիւ՝ որպէս սրբալոյս պատգամ, ապա փոխանցւելով հայրենիք, դարձել ողջ հայ ժողովրդի սեփականութիւնը:
Պրն. Թադէոսեանն իր խօսքի երկրորդ բաժնում հերթաբար մատնանշելով վերջին տարիներին տարածաշրջանում Թուրքիայի եւ Ադրբեջանի միջոցով իրենց դիրքերն ամրապնդելու եւ ազդեցութիւնն ընդարձակելու համար կատարւած գործողութիւնները, 2018 թւականից Հայաստանում ձեւաւորւած իշխանութիւնների հրաժարւելը ազգային-պետական ուղեգծից եւ նրանց իրագործումները ժողովրդի պառակտման եւ երկրի ու բանակի թուլացման ուղղութեամբ, յատկապէս շեշտեց. «Մեր երկիրը լուրջ փորձութիւնների առջեւ է կանգնած: Թուրքիայի եւ Ադրբեջանի հետ յարաբերութիւնները կարգաւորելու Հայաստանի ներկայ իշխանութեան մօտեցումը, յղի է նոր սպառնալիքներով թէ՛ Հայաստանի եւ թէ՛ Արցախի հանրապետութիւնների համար»:
Նա անդրադառնալով Երեւանում եւ Հայաստանի տարբեր մարզերում «Դիմադրութեան շարժման» անհնազանդութեան գործողութիւններին եւ այն փաստին, որ մինչեւ այսօր այդ շարժմանը միացել են պետականութեան եւ անկախութեան արժէքը գիտակցող բազմաթիւ հայրենակիցներ, աւելացրեց, որ առկայ ճգնաժամի հանգուցալուծման նախընտրելի տարբերակը՝ օրւայ իշխանութեան արագ եւ անցնցում հեռացումը եւ ազգային համաձայնութեան ժամանակաւոր կառավարութեան ձեւաւորումն է:
Պաշտօնական բաժնի եզրափակիչ ելոյթը հանդիսացաւ թեմակալ Առաջնորդ Սրբազան Հօր հայրական օրհնանքը:
Գերշ. Տ. Սիփան Ս. Եպս. Քէչէճեանը նշելով, որ Մայիս 28-ի գաղափարի մէջ ներառւած են՝ հայրենիք, ազգ, ժողովուրդ, պետականութիւն, հանրապետութիւն, ինքնիշխանութիւն, ազատութիւն, անդորրութիւն եւ բարգաւաճում հասկացողութիւնները, աւելացրեց, թէ 104 տարիներ առաջ այս բոլորը ձեռք բերեցինք՝ վճարելով ամենասուղ գինը, սակայն այսօր՝ մէկ դար անց, գտնւում ենք՝ մտատանջութեան, շփոթի, վախի, անել կացութեան եւ անորոշութեան մէջ, քանզի 2020 թւականից հայ ժողովուրդը դիմագրաւում է երկու համաճարակ՝ առաջինը աշխարհատարած Կովիդ 19-ն էր, իսկ երկրորդը՝ Արցախեան 44-օրեայ պատերազմն ու դրա հետեւանքները:
Սրբազան Հայրն անդրադառնալով Արցախեան պատերազմից յետոյ հայրենի զոյգ հանրապետութիւններում դիմագրաւելիք ռազմական, քաղաքական եւ դիւանագիտական խնդիրներին, յոյս յայտնեց, որ ինչպէս աշխարհն ականատեսն է Կովիդ 19-ի մայրամուտի, մեր ազգը նոյնպէս ականատեսը կը լինի ոչ թէ «խաղաղութեան դարաշրջան»-ի, այլ յաղթանակի դարաշրջանի՝ մեր միջից ախտը վանելու եւ մեր հոգե-մտաւոր աշխարհը առողջացնելու համար:
Նա իր խօսքի աւարտին Մայիսեան հերոսամարտին նւիրւած աւանդական մաղթանքին աւելացնելով իր նախադասութիւնը, այսպէս արտասանեց. «Փառք Մայիս 28-ը կերտողներին եւ ամօթ այն չպահպանողներին»:
Ծրագրի պաշտօնական բաժնին յաջորդեցին գեղարւեստական կատարումները, ուր ազգային-յեղափոխական երգերի կատարմամբ հանդէս եկան Հայաստանից ժամանած ազգագարական երգերի կատարող Դաւիթ Յակոբեանը եւ համայնքիս տաղանդաւոր երգիչներ Վանա Շիրւանեանն ու Հարմա Կարապետեանը:
Երգերի շարանի աւարտին տեղի ունեցաւ ֆլեշմոբ, որտեղ բոլոր ներկաները ձայնակցեցին Վանայի ու Հարմայի միջոցով կատարւող «Զարթնիր լաօ» երգին, իսկ Հ.Յ.Դ. «Թադէոս Թանդէոսեան» պատանեկան միութեան անդամները ձեռքերի վրայ վեր բարձրացրին Հայաստանի եւ Արցախի Հանրապետութիւնների դրօշները:
Տօնախմբութիւնը եզարափակւեց հրավառութեամբ:
Թղթակից (Նոր Ջուղա)
