Շաբաթ՝ 24 յուլիս 2021 թւականի երեկոյեան, ՍՀԹ պատւիրակութիւնը Թեմակալ Առաջնորդի գլխաւորութեամբ հիւրընկալեց Սպահանի «Ֆուլադ Մոբառեքէ Սեփահան» եւ Հայաստանի «Փիւնիկ» ֆուտբոլային ակումբների տնօրէններին, նշւած ակումբների միջեւ կնքւած համագործակցութեան համաձայնագրի առթիւ:
Հիւրերն նախ այցելեցին «Յովսէփ Արիմաթացի» եկեղեցի, «Նոր Ջուղայի հայոց ազգագրական» եւ «Խաչատուր Կեսարացի» թանգարաններ, ապա հանդիպեցին Սպահանի հայոց թեմի առաջնորդ Տէր Սիփան եպս. Քէչէճեանի եւ Թեմական խորհրդի անդամների հետ:
Սրբազան Հայրը ողջունելով հիւրերին, շնորհաւորեց ձեռք բերւած երկկողմ համաձայնութեան առթիւ եւ յոյս յայտնեց, որ այն կը նպաստի երկու ակումբների զարգացմանն ու առաջընթացի ապահովմանը:
«Սեփահան» ակումբի գործադիր տնօրէն Պրն. Սաքեթը, գոհունակութիւն յայտնելով կնքւած համաձայնագրի կապակցութեամբ, նշեց, թէ այս համագործակցութիւնը կը ընդլայնւի տարբեր ոլորտներում, ներառեալ ընկերական հանդիպումներ եւ մարզիչների ու մարզիկների փոխանակում:
Պրն. Սաքեթը իր արտայայտութիւնների աւարտին Թեմական խորհրդի անդամներին հրաւիրեց ներկայ լինելու «Նաղշէ Ջահան» մարզադաշտում կայանալիք «Սեփահան» եւ «Փիւնիկ» ակումբների առաջին ընկերական խաղին:
«Փիւնիկ» ակումբի տնօրէն Պրն. Սողոմոնեանը շնորհակալութիւն յայտնելով կազմակերպւած հանդիպման համար, իր գոհունակութիւնը յայտնեց սոյն պայմանագրի կնքման կապակցութեամբ եւ յոյս յայտնեց, որ այս համագործակցութիւնը արդիւնաւէտ կը լինի երկու կողմերի համար:
Վերջում կողմերը յուշանւէրներ փոխանակեցին:
