Սպահանի հայոց թեմի Բարեսիրական մարմինը, որն իր առաքելութեան համաձայն ամենայն բծախնդրութեամբ եւ բարեխղճօրէն նիւթա-բարոյական աջակցութիւն է ցուցաբերում  թեմի անխնամակալներին ու կարիքաւորներին, այս անգամ նկատի առնելով այն փաստը, որ ապահովագրութեան կանոններից անտեղեակ լինելու պատճառով, յաճախ են դժւարութիւնների մատնւում համայնքի անդամները, նշւած կանոնների մասին ժողովրդին իրազեկելու եւ այս առումով տեղեկութիւնները բարձրացնելու նպատակով, Թեմական խորհրդի հովանաւորութեամբ, հինգշաբթի՝ յունիսի 12-ի երեկոյեան ժամը 7-ին, Նոր Ջուղայի հայոց ազգային կրթահամալիրի «Ալենուշ Տէրեան» սրահում կազմակերպեց դասախօսական երեկոյ, որտեղ դասախօսութեամբ հանդէս եկան սոյն բնագաւառի մասնագէտներ՝ «Թամինէ Էջթեմայի» ապահովագրութեան կազմակերպութեան Սպահան քաղաքի 5-րդ մասնաճիւղի տնօրէն՝ Նեմաթօլլահէ Աքբարին եւ  «Սաման» ապահովագրութեան ընկերութեան պատասխանատու-մասնագէտ՝ Արթին Քեշիշեանը:

Ծրագրի առաջին բաժնում, որին համայնքի անդամներից բացի հրաւիրւել եւ ներկայ էին քահանայից դասը եւ ազգային մարմինների, դպրոցների ու միութիւնների ներկայացուցիչները, ելոյթ ունեցաւ Նեմաթօլլահէ Աքբարին, որն անդրադարձաւ «Թամինէ Էջթէմայի» կազմակերպութեան ապահովագրութեան կանոններին՝ մասնաւորապէս բացատրելով բժշկական, հանգստի կոչւելու, անաշխատունակութեան, անգործութեան եւ ազատ աշխատանքների ու տնային տնտեսուհիների համար նախատեսւած ապահովագրութիւնների մասին:

Այնուհետեւ, ծրագրի շարունակութեան մէջ դասախօսեց Արթին Քեշիշեանը, ով պատմական ակնարկ նետելով Իրանում ապահովագրութեան ստեղծմանը՝ ներկաներին ծանօթացրեց ապահովագրութեան մասնաւոր ընկերութիւնների կողմից մատուցւող ծառայութիւններին՝ անհատի, ունեցւածքի եւ պատասխանատւութեան կապակցութեամբ՝ պատկան ենթաբաժանումներով:

Ծրագրի ընթացքում ներկաներն իրենց յուզող հարցերի պատասխաններն ստացան մասնագէտներից:

Երեկոն վարեց Նարբէ Ջարդն Դաւուդը: