«Բարեկեցութիւն» կազմակերպութեան Սպահանի գերատեսչութեան նորանշանակ ընդհանուր տնօրէն պրն. Նասրը նոյն գերատեսչութեան զանազան գծերով փոխ-տնօրէնների ընկերակցութեամբ, հինգշաբթի՝ հոկտեմբերի 29-ի առաւօտեան,  Սպահանի հայոց թեմի ազգ. առաջնորդարանում, հանդիպում ունեցաւ ազգային իշխանութեան պատւիրակութեան հետ՝ թեմիս կողմից իրականացւող բարեգործական աշխատանքներին ծանօթանալու եւ այդ շրջագծում երկուստեք համագործակցութիւններն առաւել ընդարձակելու համար:

Գերշ. Տ. Սիփան եպս. Քէչէճեանի գլխաւորած թեմիս պատւիրակութեանը մաս էին կազմել Թեմական խորհդի փոխ-ատենապետ դոկտ. Նորայր Թումանեանը եւ անդամներ՝ Լորիս Նաւասարդեանն ու Վահիկ Թորոսեանը, թեմի Բարեսիրական մրամնի ատենապետուհի Ռայեա Խուդավերդեանը եւ ազգ. Առաջնորդարանի դիւանապետ Արիս Դաւթեանը:

Հանդիպումն սկիզբ առաւ Սրբազան Հօր ողջոյնի խօսքով: Նա բարի գալուստ մաղթելով հիւրերին, բարձր գնահատեց «Բարեկեցութիւն» կազմակերպութեան կողմից Իրանի եւ ի մասնաւորի Սպահան քաղաքի մակարդակով իրականացւող բարեգործական լայնածաւալ աշխատանքները:

Թեմակալ առաջնորդն իր խօսքի շարունակութեան մէջ շնորհաւորելով պրն. Նասրին՝ ընդհանուր տնօրէն նշանակւելու առիթով եւ ուժ ու կորով մաղթելով յիշեալին՝ այս աստւածահաճոյ առաքելութիւնը լաւագոյնս իրականացնելու համար, յոյս յայտնեց, որ նման հանդիպումների շնորհիւ կընդարձակւեն առկայ համագործակցութեան եզրերը:

Յաջորդիւ պրն. Նասրը թւարկելով «Բարեկեցութիւն» կազմակերպութեան բազմաբնոյթ աշխատանքներից մի քանիսը, կարեւորութեամբ ընդգծեց, որ մարդասիրական ծրագրերը այս կազմակերպութեան գործունէութեան առանցքն են կազմում: Նա ոչ միայն իր պատրաստակամութիւնը յայտնեց թեմիս ազգային իշխանութեան հետ փոխ-համագործակցութիւնների մակարդակն առաւել բարձրացնելու, այլեւ նշեց, թէ մեծ ուրախութեամբ օգտւելու է մարդասիրական աշխատանքներում Բարեսիրական մարմնի ունեցած տարիների փորձառութիւններից:

Այնուհետեւ Թեմական խորհրդի անունից բարի գալստեան եւ շնորհաւորանքի մաղթանքներով արտայայտւեց դոկտ. Նորայր Թումանեանը, որից յետոյ տնօրէնին ընկերակցող փոխ-տնօրէնները, բացատրութեամբ հանդէս եկան իրենց աշխատանքային ոլորտի շուրջ՝ խոստանալով, թէ պատկան իրաւասութիւնների եւ հնարաւորութիւնների շրջագծում օգտակար են հանդիսանալու Սպահանի հայոց թեմի ազգային իշխանութեանը: Վերոնշեալ ոլորտներն էին՝ թմարմոլութեան կանխարգելման եւ բուժման, ինչպէս նաեւ ընտանեկան զանազան խնդիրների փարատման ուղղութեամբ ծառայութիւնները, անօգնականներին եւ անօթեւաններին աջակցելը, անխնամակալ կանանց եւ երեխաների նկատմամբ հոգածութիւն ցուցաբերելը եւ այլն:

ՍՀԹ Ազգային Առաջնորդարանի Հանրային Կապ