Հոծ թւով հաւատացեալների ներկայութեամբ, երկօրեայ արարողութիւններով Նոր Ջուղայի «Ս. Սարգիս» եկեղեցում նշւեցին Ս. Սարգիս զօրավարի եւ նշւած եկեղեցու անւանակոչութեան տօները:
Ուրբաթ՝ 2019 թւականի փետրւարի 15-ի առաւօտեան, եկեղեցու շրջափակում, նախագահութեամբ Սպահանի հայոց թեմի առաջնորդ գերշ. Տ. Սիփան եպս. Քէչէճեանի եւ մասնակցութեամբ եկեղեցական դասի տեղի ունեցաւ աղօրհնէքի կարգը եւ ոչխարների զենման արարողութիւնը, իսկ երեկոյեան ժամը 6:00-ին, եկեղեցում՝ հսկման արարողութիւնը:
Վերջին տարիներին թեմի Կրօնական խորհրդի միջոցով ձեւաւորւած գեղեցիկ աւանդոյթի համաձայն, հսկման արարողութեանը յաջորդեց զինւորների օրհնութեան կարգը, որտեղ Իրանի Իսլ. Հանրապետութեան զինւած ուժերում ծառայող թեմիս զաւակները Սրբազան Հօր միջոցով ստացան Աստծոյ օրհնութիւնը:
Այնուհետեւ բոլորը համախմբւեցին եկեղեցու բակում, ուր կազմակերպւել էր հայ զինւորների գնահատման երեկոյ: Այս միջոցառմանը ներկայ գտնւեցին նաեւ Սպահանի ոստիկանութիւնից եւ զինւած ուժերից բարձրաստիճան այրեր: Միջոցառումն սկիզբ առաւ Կրօնական խորհրդի անդամ Սաքօ Տէր-Յովհաննիսեանի խօսքով, ուր բացատրութեամբ հանդէս եկաւ զինւորների օրհնութեան կարգի եւ գնահատման երեկոյի կազմակերպման մասին, ապա ողջոյնի եւ բարի գալստեան մաղթանքներ ուղղեց հիւրերին: Պրն. Տէր-Յովհաննիսեանն իր խօսքի աւարտին ներկաներին հրաւիրեց մէկ րոպէ յոտնկայս լռութեամբ յարգել փետրւարի 14-ին Իրանի Սիստան-Բալուչեստան նահանգում տեղի ունեցած ահաբեկչական յարձակման արդիւնքում զոհւածների յիշատակը:
Միջոցառման շարունակութեան մէջ Կրօնական խորհրդի կողմից նախատեսւած նւէրները շնորհւեցին զինւորներին. պարգեւատրւեցին նաեւ Իրան-Իրաք պարտադրեալ պատերազմին մասնակից անձնուրաց-ազատորդի թեմիս զաւակներն ու ներկայ հիւրերը:
Վերջում տեղի ունեցաւ ընդունելութիւն, որից յետոյ առաջնորդ Սրբազան Հայրն այցելեց եկեղեցու շրջափակում հարիսայի պատրաստման համար նախատեսւած վայր եւ մօտիկից ծանօթանալով կատարւած աշխատանքներին՝ գնահատանքի խօսք ուղղեց պատկան յանձնախմբին:
Շաբաթ՝ փետրւարի 16-ի առաւօտեան տօնի առթիւ մատուցւեց Ս. եւ Անմահ Պատարագ՝ գերշ. Տ. Սիփան եպս. Քէչէճեանի նախագահութեամբ եւ ձեռամբ: Պատարագին մասնակցում էր թեմի եկեղեցական դասը, իսկ ընթացքում երգեցողութեամբ հանդէս եկաւ Ս. Ամենափրկիչ վանքի «Կոմիտաս» երգչախումբը:
Ընթացքում յաւուր պատշաճի քարոզեց Սրբազան Հայրը, ով անդրադառնալով ս. Սարգիս զօրավարի կեանքին, ընդգծեց յատկապէս նրա քրիստոնավայել յատկանիշները՝ բարեպաշտութիւնը, առ Աստւած նւիրումն ու աղօթքներով իրագործւած հրաշքները:
Մի հատւածի մէջբերում Սրբազան Հօր քարոզից.
«Այս տօնը թող մեզանից իւրաքանչիւրի համար հանդիսանայ՝ որպէս լաւագոյն կամ սքանչելի առիթ, որպէսզի ինքնաքննութեամբ սրբագրենք մեր անձերը՝ որպէս նոր դարի իսկական քրիստոնեաներ: Բարեպաշտութիւնը դարձնենք մեր կեանքի ամենակարեւոր սիւներից մէկը եւ կրօնագիտութեամբ ամրացնենք մեր կրօնասիրութիւնը, որպէսզի դրանք մեզ առաջնորդեն դէպի աստւածասիրութիւն եւ մեր մէջ ամրապնդեն մեր հաւատը: Եւ սա է դրախտի գլխաւորագոյն բանալին»:
Վերջում Ս. Սարգիս զօրավարի աջով կատարւեց ջրօրհնէքի արարողութիւն, ապա բոլորը համախմբւեցին եկեղեցու բակում, ուր օրհնւեց նաեւ պատրաստւած հարիսան եւ բաժանւեց ժողովրդին:
Յատկանշական է, որ եկօրեայ արարողութիւնների ընթացքում ուխտաւորներն իրենց խորհուրդը կատարեցին նւիրատւութիւններով ու մատաղներով:
Թղթակից (Նոր Ջուղա)
