1998 թւականից ի վեր, ամենամեայ կարգով, իրանական «Նոռուզ» տօնի արձակուրդների ընթացքում, Հ.Յ.Դ. «Ռուբէն» երիտասարդական միութիւնը (ՌԵՄ) Հայ Դատի քարոզչութեան ուղղութեամբ իր աշխատանքների ծիրում, Ս. Ամենափրկիչ վանքի շրջափակում կազմակերպում է գրքի ցուցահանդէս-վաճառք, որը մեծ ընդառաջում է գտնում վանքի թանգարան այցելող պարսիկ եւ օտարերկրացի հոծ զբօսաշրջիկների կողմից: Գրքերի մեծ տոկոսը կազմում են Հայոց Ցեղասպանութեան եւ Հայ Դատի թեմաներով գրական գործերը:
«Ռուբէն» երիտ. միութեան անդամներն անցնող 20 տարիների ընթացքում սիրայօժար կերպով իրենց արձակուրդն ու հանգստեան օրերը տրամադրել են այս գործին եւ ընձեռւած հիանալի առիթը լաւապէս օգտագործել՝ հայկական հարցի ճանաչեցման ուղղութեամբ:
Նրանք ցուցադրում եւ վաճառում, իսկ որոշ պարագաներում անվճար տրամադրում են հայութեանը ծանօթացնող, ինչու չէ նաեւ Հայոց Ցեղասպանութեան պատմական ծալքերն արտացոլող ու Հայ Դատին առնչւող գրքերը եւ հրատարակութիւնները: Դրան զուգահեռ պատասխանում են Հայաստանի, հայ ժողովրդի եւ Մեծ Եղեռնի մասին՝ զբօսաշրջիկների հարցերին:
ՌԵՄ-ի վարչութեան եւ սոյն ցուցահանդէսի կազմակերպիչ յանձնախմբի աշխատանքն սկսում է դեռ արձակուրդից շատ աւելի առաջ՝ համապատասխան թեմաներով նոր տպագրւած գրքեր հայթայթելով եւ ցուցահանդէսն աւելի բովանդակալից ու գրաւիչ կազմակերպելու ուղղութեամբ հարկ եղածը նախաձեռնելով:
Յատկանշական է, որ այս տարի առաջին անգամը լինելով միութիւնը համագործակցութիւն ցուցաբերեց Արցախում եւ Հայաստանի սահմանամերձ շրջաններում բարեսիրական աշխատանքներ իրագործող Թեհրանի «Թեւանիկ» խմբի հետ: Սոյն համագործակցութեան շրջագծում ՌԵՄ-ի վարչութիւնը «Թեւանիկ»-ից ստանալով Արցախի արւեստագէտների ձեռքի աշխատանքները՝ իր ցուցահանդէս-վաճառքում մի առանձին կրպակ յատկացրեց այդ գործերի վաճառման համար:
Վարձքներդ ի կատար ասելով այս անխոնջ երիտասարդներին՝ առաւել եռանդ ու կորով ենք մաղթում նրանց՝ հայանպաստ ու հայրենանպաստ աշխատանքներում:
Թղթակից (Նոր Ջուղա)
