Շաբաթ՝ 25 նոյեմբեր 2017 թւականի միջօրէին, Սպահանի հայոց թեմի Ազգային առաջնորդարանի պատւիրակութիւնը, գլխաւորութեամբ թեմի առաջնորդ՝ գերպ. Տ. Սիփան ծ. վրդ. Քէչէճեանի, այցելեց Իսլամական մշակոյթի եւ առաջնորդութեան Սպահանի գերատեսչութիւն՝ հոջ. Մոհամմադ Ալի Անսարիին՝ գերատեսչի պաշտօնում նշանակւելու առթիւ շնորհաւորանքներ փոխանցելու նպատակով:
Պատւիրակութեանը մաս էին կազմում Պատգ. ժողովի ատենապետ՝ Թաթուլ Օհանեանը, Թեմական խորհրդի ատենապետ՝ Վարուժ Մինասեանը, Կրօնական խորհրդի ատենապետ՝ Վարուժ Մովսիսեանը եւ Նոր Ջուղայի Հայ Դատի յանձնախմբի ներկայացուցիչ՝ Վահէ Թորոսեանը:
Առաջնորդարանի պատւիրակութեանն ընդունեց պարոն գերատեսուչը, ով ողջունելով ներկաներին մատնանշեց միաստւածեան կրօնների ընդհանրութիւնները եւ այն, որ Իսլամը եւ մուսուլմանները յարգում են բոլոր մարգարէներին, յատկապէս շեշտեց իրենց յարգանքը Յիսուս Քրիստոսի նկատմամբ: Նա անդրադառնալով տարածաշրջանում «ԴԱԷՇ» ահաբեկչական խմբաւորման գործողութիւններին, շնորհաւորեց Սիրիայում եւ Իրաքում սոյն խմբաւորման պարտութեան առիթով, նշելով, որ քրիստոնեաները ինչպէս իրենց մուսուլման եղբայրները պայքարել են այս ծայրայեղական խմբաւորման դէմ:
Այնուհետեւ արտայայտւեց Գերապատիւ Հայր Սուրբը. նա փոխանցեց ազգային իշխանութեան եւ թեմի ժողովրդի շնորհաւորանքի խօսքը ուղղւած նորանշանակ գերատեսչին եւ յաջողութիւն մաղթեց նրան՝ իր ստանձնած նոր յանձնառութեան գործում: Հայր Սուրբը եւս շնորհաւորեց այսպէս կոչւող «Իսլամական պետութիւն» ծայրայեղական եւ ահաբեկչական խմբաւորման պարտութիւնը Իրաքում ու Սիրիայում եւ ընդգծեց Իրանի իսլամական հանրապետութեան դերակատարութիւնը այս յաջողութեան մէջ՝ յուսալով, որ տարածաշրջանում լինելու է խաղաղութիւն եւ կայունութիւն:
Հանդիպման ընթացքում պրն. Օհանեանն առ ի տեղեկութիւն բացատրութիւններ տւեց Սպահանի հայոց թեմի դրւածքի վերաբերեալ:
