Շաբաթ՝ 2017 թ. մայիսի 13-ի երեկոյեան ժամը 7-ին, Իրանի Իսլ. խորհրդարանում Սպահանի եւ հարաւային իրանահայութեան պատգամաւոր Ժորժիկ Աբրահամեանը խորհրդարանի 10-րդ նստաշրջանի պատգամաւոր ընտրւելուց յետոյ, իր առաջին ժողովրդական հանդիպումն ունեցաւ Շահինշահրի հայ համայնքի հետ՝ «Սրբոց Վարդանանց» դպրոցի սրահում:
Կազմակերպւած հանդիպմանը ներկայ էին համայնքի հոգեւոր տեսուչ գերպ. Տ. Անանիա ծ. վրդ. Գուճանեանը, արժն. Տ. Սահակ քհնյ. Մինասեանը, շրջանի Հայ Դատի յանձնախմբի ներկայացուցիչները, Հայ համայնքի վարչութիւնը, միութիւնների ներկայացուցիչները, ուսուցիչները եւ համայնքի անդամները:
Հանդիպման առաջին բաժնում յարգելի պատգամաւորը համապարփակ զեկոյց ներկայացրեց խորհրդարանում՝ ի մասնաւորի պատկան յանձնաժողովում իր կենսագործած գործունէութեան շուրջ եւ իր զեկոյցում ընդգծեց նաեւ միւս փոքրամասնութիւնների պատգամաւորների հետ համագործակցաբար ծաւալած աշխատանքների մասին եւ իր գոհունակութիւնը յայտնեց յատկապէս դոկտ. Կարէն Խանլարեանի ցուցաբերած համագործակցութեան առթիւ:
Պրն. Աբրահամեանը նաեւ տեղեկութիւններ փոխանցեց ստացած դիմումների բնոյթի եւ դրանց բարեյաջող ընթացք տալու կապակցութեամբ:
Այնուհետեւ առիթ ընձեռւեց ներկաներին իրենց յուզող հարցերի եւ խնդիրների վերաբերեալ արտայայտւելու, որի ընթացքում պրն. Աբրահամեանը օգտակար եւ գոհացուցիչ խորհուրդներ եւ ցուցումներ տւեց ներկաներին:
Երեկոն վարեց պրն. Արիս Դաւթեանը:
