Թւականիս ապրիլի 7-ի առաւօտեան, Նոր Ջուղայի Հայ մարզա-մշակութային «Արարատ» միութեան Սկաուտական միաւորի շէնքի բակում նշւեց Հայ մայրերի օրը: Տօնական հանդիսութեան նախաձեռնողը եւ կազմակերպողը միաւորի Գերագոյն մարմինն էր, որին հրաւիրւած ու ներկայ էին՝ իրենց անդամ-ուհիների մայրերը, Կենտրոնական վարչութեան եւ միաւորների վարչութիւններին անդամակցող մայրիկները: Ներկաներին ողջունեց եւ օրւայ առթիւ շնորհաւորեց միութեան Կենտրոնական վարչութեան անդամ եւ միաւորի կապ՝ Մանիա Ղուկասեանը, այնուհետեւ Կենտրոնական վարչութեան անունից Լորեթա Դաւթեանը, Սկաուտական միաւորի Ծնողական խորհրդի անունից Նորա Շահիջանեանը, Մշակութային միաւորի նախագահուհի Քարմէն Ղեւեանը, Երէցների միաւորի նախագահուհի Վարդուշ Զարգարեանը եւ Մարզական միաւորի վաչութեան անդամ Անահիտ Սարհադեանը արտայայտւեցին շնորհաւորանքի եւ բարեմաղթանքի խօսքերով: Ցերեկոյթը առաւել աշխոյժ ընթացք ընդունեց Վարդուշ Զարգարեանի եւ Ալենուշ Մարտոյեանի երգերի կատարմամբ: Ընդունելութեան աւարտին միաւորի Գերագոյն Մարմինը յուշանւէրներով պարգեւատրեց միաւորի աշխատանքներին աջակցող՝ Սոնիա Պօղոսեանին եւ Այիդա Ասատրեանին, իսկ հանդիսութեանը ներկայ մայրերին նւիրեց շնորհաւորանքի գեղեցիկ բացիկներ:
Յատկանշելի է, որ միաւորի շէնքի բացօթեայ տարածքում կազմակերպւած տօնակատարութիւնը մեծ ուրախութիւն եւ բացառիկ տպաւորութիւն թողեց հրաւիրեալների մօտ, ինչը արտացոլւեց նրանց ելոյթներում:
