2014 թւականի փետրւարի 13-ի երեկոյեան, Տեառնընդառաջի նախօրէին, Շահինշահրի հայոց ազգային «Սրբոց Վարդանանց» դպրոցումտեղի ունեցաւ Նախատօնակի արարողութիւն եւ աւանդական հրավառութիւն: Եկեղեցական արարողութիւնը կատարւեց Շահինշահրի հոգեւոր տեսուչ հոգշ. Տ. Անանիա վրդ. Գուճանեանի միջոցով: Արարողութեանը յատուկ կերպով հրաւիրւել էին Շահինշահրում բնակւող նորապսակ զոյգերը եւ նորածին մանուկ ունեցող ընտանիքները:
Հոգշ. Հայր Սուրբը արարողութեան աւարտին իր խօսքը փոխանցեց ներկայ հաւատացեալներին՝ բացատրելով օրւայ խորհրդի մասին, եւ միաժամանակ անդրադառնալով աւանդական հրավառութեանը՝ գեղեցիկ կերպով պարզաբանեց դրա խորհուրդն ու իմաստը: Եկեղեցական արարողութիւնից յետոյ, նորապսակ զոյգերը Ս. Սեղանից բերւած լոյսով իրենց զարդարւած մոմերը վառեցին եւ շարականի երգեցողութեան ներքոյ բոլոր հաւատացեալների հետ դուրս գնացին՝ դպրոցի բակում պատրաստւած խարոյկը վառելու համար:
Շահինշահրի հայ համայնքի վարչութեան նախաձեռնութեամբ եւ Շահինշահրի հայ կանանց եկեղեցասիրաց միութեան պատրաստութեամբ եւ սպասարկումով, Հայոց դպրոցի փոքր սրահում հանդիպում եւ հիւրասիրութիւն էր կազմակերպւել արարողութեանը ներկայ նորապսակների եւ նորածին մանուկ ունեցող ընտանիքների համար: Հանդիպմանը ներկայ էին հոգշ. Տ. Անանիա վրդ. Գուճանեանը եւ Շահինշահրի հայ համայնքի վարչութեան բոլոր անդամները: Նորապսակներն ու նորածին ունեցող զոյգերը, ամուսնական եւ ծնողական կեանքից իրենց տպաւորութիւնները կիսեցին ներկաների հետ, իսկ հոգշ. Հայր Սուրբի եւ վարչութեան ատենապետ պրն. Մելքոն Շիրւանեանի միջոցով խրատական խօսք եւ բարեմաղթանքներ փոխանցւեցին ներկաներին։
Շահինշահրի հայ համայնքի վարչութեան անունից եւ հոգշ. Հայր Սուրբի ձեռամբ նւէրներ յանձնւեցին նորապսակ զոյգերին եւ նորածին մանուկներին:
