Սրբոց թարգմանչաց եւ Հայ մշակոյթի շաբաթւայ առիթով, հոկտեմբերի 14-ից 16-ը Նոր Ջուղայի Հայ մարզա-մշակութային “Արարատ” միութեան հանդիսութիւնների դահլիճում տեղի ունեցաւ ձեռարւեստի բացառիկ ցուցահանդէս: Ցուցահանդէսի կազմակերպողը նոյն միութեան Մշակութային միաւորի վարչութիւնն էր, որի իրականացման գործին մասնակցութիւն էին բերել Նոր Ջուղայի հայոց ազգ. դպրոցներն ու համայնքում գործող միութիւնները:
Ցուցահանդէսի բացումը կատարւեց Սպահանի հայոց թեմի կաթողիկոսական փոխանորդ՝ Տ.Սիփան ծ. վրդ. Քէչէճեանի եւ նրան ընկերակցող քահանաից դասի, ազգային իշխանութեան ներկայացուցիչների եւ ցուցահանդէսին մասնակից դպրոցների ու միութիւնների պատասխանատուների եւ արւեստասէր հասարակութեան այցելութեամբ, որտեղ ցուցադրւած էին՝ հայկական տարբեր շրջանների տարազներ եւ 1915 թւից տնային պայմաններում լաւապէս պահպանւած եւ մինչեւ մեր օրերը հասնող Նոր Ջուղայի կանանց բազմաոճ ձեռարւեստի եզակի նմուշներ, նաեւ Հայոց ազգային դպրոցների աշակերտական աշխատանքներ, որոնք իրենց պատգամով, գեղեցկութեամբ, ինչպէս նաեւ ցուցահանդէսի բարձրաճաշակ դասաւորութեամբ արժանանցան այցելունների յիացմունքին ու բարձր գնահատանքին:
Ներկաներին ողջունեց Մշակութային միաւորի վարչութեան նախագահ Քարմէն Ղեւեանը, ով շնորհաւորելով Հայ Մշակոյթի տօնը, ընդհանուր տեղեկութիւն փոխանցեց ցուցահանդէսի կազմակերպման եւ ցուցադրւած աշխատանքների մասին եւ շնորհակալական խօսք ուղղեց բոլոր նրանց, որոնց համագործակցութեամբ իրականացաւ ցուցահանդէսի կազմակերպումը:
Յաջորդիւ որպէս շնորհակալական եւ երախտագիտութեան արտայայտութիւն յուշանւէր շնորհւեց գերպ. Հայր սուրբին, միութեան Կենտրոնական վարչութեանը եւ ցուցահանդէսին մասնակից Հայոց ազգ. “Քանանաեան” աղջ. եւ “Կատարնիեան” տղ. դպրոցների, “Արմէն” երկսեռ կրթահամլիրի, Հայուհեաց բարեգործական ընկերութեան, Հայ կանանց գթութեան, Փերիոյ կրթասիրացաց եւ Հայ ուսումնասիրաց Չհարմահալ միութիւնների պատասխանատուններին: Յուշանւէրները յանձնեցին գերապատիւ հայր սուրբը եւ Ն. Ջ. Հայ Մ. Մ. “Արարատ” միութեան Կենտրոնական վարչութեան նախագահ Մասիս Մինասեանը:
Յուշանւէրների յանձնումից յետոյ, խօսքը տրւեց գերապատիւ Հայր սուրբին, ով շնորհակալութիւն յայտնելով իրեն շնորհւած յուշանւէրի համար, իր հիացմունքը եւ գոհունակութիւնը յայտնեց Սրբոց թարգմանչաց տօնին նւիրւած նման ցուցահանդէս կազմակերպելու կապակցութեամբ: Անդրադառնալով ցուցահանդէսի բովանդակութեանը, այն որակեց՝ “Մայր-զաւակի ձեռակերտ արւեստի եւ մշակոյթի մի նոր թանգարան, որ դրւել էր այցելուների հոգեկան եւ մտային ճաշակումի եւ վայելքի առջեւ”: Գերպ. Հայր սուրբն իր խօսքն եզրափակեց շնորհակալական, գնահատանքի եւ քաջալերանքի խօսքերով, ուղղւած՝ միութեան Կենտրոնական վարչութեանն ու Մշակութային միաւորի վարչութեանը, միութիւնների պատասխանատուներին, դպրոցների տնօրինութեանը, ուսուցչական կազմերին, աշակերտներին եւ բոլոր այն անհատներին, որոնց համագործակցութեամբ իրականացաւ Հայ մշակոյթի շաբաթւան նւիրւած ցուցահանդէսը:
Ցուցահանդէսի աշակերտական բաժիններից կարեւոր է յիշել Հոնգկոնգում կայացած “Հարմունի” խորագրով արւեստի միջազգային մրցոյթին Հայոց ազգ. “Քանանաեան” աղջ. դպրոցը ներկայացնող՝ առաջին տեղը զբաղեցրած եւ “Grand prize” մրցանակին արժանացած իւղաներկ նկարչութիւնը, Իրանի “Խարազմի” փառատօնում եւ համահայկական մրցութիւններում նոյն դպրոցը ներկայացրած եւ մրցանակ շահած նկարչութիւնները, Հայաստանում կայացած համահայկական նկարչութեան մրցոյթում “Արմէն” երկսեռ կրթահամալիրը ներկայացնող մրցանակակիր նկարչութիւնները, ինչպէս նաեւ “Կատարինեան” տղ. դպրոցի մանրակերտ աշխատանքները. միութիւնները ներկայացնող աշխատանքներց յիշենք հայկական տարբեր շրջանների տարազների, ասեղնակարերի, մարաշի ասեղնակարի, ասեղնագործի, մքուքագործի, ճաղագործի ու կեռասեղի եւ կարպետագործութեան հին ու նոր բացառիկ նմուշները, ինչպէս նաեւ հարսանեկան նկարազարդ ու քանդակագործ շաքարները եւ ասեղնակար “Կանաչ-կարմիր”-ները, որոնք մինչ այսօր համարւում են իրանահայութեան հարսանեաց ծէսերի կարեւոր եւ անբաժան մասնիկը:
Նշելի է, որ եռօրեայ ցուցահանդէսը արժանացաւ բազմահարիւր այցելուների գնահատանքին: Հայոց ազգային դպրոցների աշակերտութիւնը եւս ուղեկցութեամբ դպրոցների տեսչութիւնների, ուսուցչական կազմերի եւ ծնողական խորհուրդների այցելեցին ցուցահանդէսը:
