«Գիտունիկի տնակ» անւան ամառային մանկական հետաքրքիր ու յաջող ծրագիրն այս տարի եւս ամռան արձակուրդին իր շուրջը համախմբեց համայնքի մանուկներին: Ծրագիրը կայացաւ Նոր Ջուղայի Հայ Մարզա-Մշակութային «Արարատ» միութեան Մանկական բաժնին կից բացօթեայ տարածքում, ուր շաբաթական երկու պահ երեկոյեան ժամը 7:30-ից 9:00-ը մանուկներն ունկնդրեցին հեքիաթներ, սովորեցին ազգային եւ սպորտ պարեր, մանկական երգեր, զարդանախշեցին կաւէ իրեր ու ստեղծագործեցին նկարչութիւններ, ինչպէս նաեւ մասնակից դարձան «Կարմիր գլխարկ»-ի տիկնիկային ներկայացմանը: Բազմաբնոյթ մասերով յագեցած «Գիտունիկի տնակ» ծրագիրն ամառային խանդավառ զբաղմունքից եւ գեղեցիկ յիշողութիւններ ստեղծելուց զատ, մանուկներին առիթ տւեց դրսեւորել իրենց ունակութիւններն՝ ելոյթ ունենալ երգերով, պարերով, արտայայտւելով, տեսակէտ յայտնելով ու հարցումներին պատասխանելով: «Գիտունիկի տնակ» մանկական ամառային աշխատանքը իր իւրայատուկ աշխուժութեամբ ու խանդավառութեամբ դարձաւ երեխաների, երիտասարդ մայրերի ու մեծ մայրերի ամենասիրւած ու ամենասպասւած ծրագիրը: «Գիտունիկի տնակ»-ը իր աշխատանքը աւարտեց շաբաթ՝ թւականիս օգոստոսի 20-ին, որտեղ տեղի ունեցաւ նաեւ մրցութային բաժին՝ իրականացւած աշխատանքներից:
Ծրագիրը իրականացաւ Մշակութային միաւորի վարչութեան, մի շարք տաղանդաշատ անդամուհիների, անհատ մասնագէտների ու ծնողների անվերապահ համագործակցութեամբ:
