Նախաձեռնութեամբ Նոր Ջուղայի Հայ Մ. Մ. «Արարատ» միութեան Մշակութային միաւորի Գրական խմբի եւ Ս. Ամենափրկիչ Վանքի «Ս. Ներսէս Շնորհալի» գրադարանի համագործակցութեամբ, չորեքշաբթի՝ թւականիս յուլիսի 13-ի երեկոյեան, նոյն միութեան յարկի ներքոյ տեղի ունեցաւ գրական երեկոյ՝ նւիրւած նշանաւոր գրող եւ քաղաքագէտ Գրիգոր Զոհրաբի ծննդեան 115-ամեակին:
Ներկաներին ողջունեց Գրական խմբի պատասխանատու եւ ղեկավար Ռիմա Սիմոնեան-Օհանեանը, ապա հակիրճ տողերով տեղեկութիւններ փոխանցեց Գրական խմբի, «Ս. Ներսէս Շնորհալի» գրադարնի եւ երեկոյի կազմակերպման մասին: Երեկոյի առթիւ հրաւիրւած էր բանախօսելու Տ. Անանիա Ծ. վրդ. Գուճանեանը, ով հանդէս եկաւ Գ. Զոհրաբի կենսագրութեամբ եւ ներկայացրեց նրա հետաքրքրութիւնների լայն շրջանակի, ազգային-հասարակական եւ քաղաքական դաշտում նրա ունեցած մեծ ներդրումի եւ յատկապէս, որպէս փաստաբան, դիւանագէտ, լրագրող եւ Թուրքիոյ խորհրդարանում, որպէս պատգամաւոր ազգային շահերից մղւած կարեւոր ներդրումի մասին կատարած իր ուսումնասիրութիւնը, ինչը համեմւած էր թեմատիկ վկայութիւնների տեսանիւթերով եւ Գ. Զոհրաբի մտքերով:
Հայր Սուրբն իր բանախօսութեան աւարտին, կոչ արեց՝ զբաղւել գրականութեամբ եւ ընթերցել մեր մեծերի ու նախնիների պատմութիւնն ու գրականութիւնը եւ նրանց կտակը փոխանցել նոր սերնդին:
Վերջում Հայր Սուրբը պատասխանեց ներկաների կողմից հնչած հարցումներին:
Երեկոն աւարտւեց շնորհակալական խօսքերով՝ ուղղւած գերապատիւ Հայր Սուրբին՝ հրաւէրին ընդառաջելու եւ դասախօսելու առումով եւ հայ մեծերի յիշատակը յարգող գրասէր հասարակութեանը՝ ներկայութեան համար:
