Չորեքշաբթի` 2016 թւականի մայիսի 25-ի երեկոյեան, Շահինշահրի Հայոց Ազգային «Նարեկ» Մանկապարտէզ-Նախակրթարանի սրահում տեղի ունեցաւ դպրոցի սաների ամավերջի հանդէսը:

Ծրագրին ներկայ էին Սպահանի Հայոց Թեմի թեմակալ առաջնորդ գերշ. Տ. Բաբգէն արք. Չարեանը, արժն. Տ. Սահակ քհնյ. Մինասեանը, Պատգամաւորական ժողովի, Թեմական, Կրթական խորհուրդների, եւ Համայնքի վարչութեան ներկայացուցիչները, սաների ծնողներն ու հարազատները:

Ծրագրի բացումը կատարեց դպրոցի տեսչուհի օրդ. Կարինէ Մինասքանեանը, որը բարի գալուստ մաղթելով ներկաներին` շնորհակալութիւն յայտնեց նրանց, դպրոցի անձնակազմի հրաւէրին ընդառաջելու համար:

Յարգելի տեսչուհին ամփոփ զեկոյց ներկայացրեց դպրոցի կրթա-դաստիարակչական աշխատանքների մասին` բարձր գնահատելով ազգային իշխանութեան ցուցաբերած հովանաւորութիւնը եւ ծնողների համագործակցութիւնը:

Յաջորդիւ իրենց քաղցր ու անուշ ողջոյնի արտայայտութիւններով ներկայացան դպրոցի սաները, որոնք գեղեցկօրէն կատարեցին իրենց վստահւած դերերը` ուրախ երգ ու տաղով եւ պարային աշխոյժ շարժումներով: 

Ծրագրի յաջորդ բաժնում տեղի ունեցաւ 2015-2016 ուս. տարեշրջանի վկայականների բաշխումը` Սրբազան Հօր ձեռամբ եւ Թեմական ու Կրթական խորհուրդների ներկայացուցիչների ներկայութեամբ:

Վերջում տեսչուհին նախ իր շնորհաւորման խօսքը յղեց համայնքի հոգեւոր տեսուչ Տ. Անանիա Ծ. վրդ. Գուճանեանին նւիրապետական նոր աստիճանին արժանանալու համար, ապա բարի երթ մաղթեց գերշ. Սրբազան Հօրը, ով Ն.Ս.Օ.Տ.Տ. Արամ Ա Վեհափառին անսալով պէտք է իր հոգեւորական ծառայութիւնը շարունակի Կանադայի Հայոց Թեմում: Այնուհետեւ օրհնանքի եւ գնահատանքի իր խօսքը փոխանցեց գերշ. Սրբազան Հայրը` ընդգծելով հայ ուսումնարանի ուրոյն եւ կարեւոր դերը` մատաղ սերնդի հայեցի դաստիարակութեան սրբազան գործում: Նա բարձր գնահատեց դպրոցի դաստիարակների, Ծնողական խորհրդի եւ ծնողների ցուցաբերած հոգատարութիւնն ու իրագործած աշխատանքները եւ մաղթեց նրանց քաջառողջութիւն եւ առաւել ոյժ ու կորով: 

Օրւայ առիթով տեղի ունեցաւ նաեւ համեստ հիւրասիրութիւն:

Շահինշահրի Հայ Համայնքի Վարչութեան թղթակից՝ Վ. Յարութիւնեան

Լուսանկարիչ՝ Գեւիկ   խաչատրեան