Յարգելի պրն. Օհանեան, խնդրում եմ բացատրել Ղարագէլ փողոցի ֆուտբոլի դաշտի օգտագործման խնդրով Ն.Ջ. Հայ Մ.Մ. «Արարատ» Միութեան եւ «Սեւան» խմբի միջեւ նախկինում եւ վերջերս կայացած պայմանաւորւածութիւնների մասին:

Որպէս Ն.Ջ. Հայ Մ.Մ. «Արարատ» Միութեան արտօնատէր, սոյն միութեան ֆուտբոլի խմբի փորձերի անցկացման համար, իրանական 1359 թւականին, ժամանակի Թեմական Խորհրդից վարձակալեցի Ղարագէլ փողոցում գտնւող թեմապատկան կալւածը: Յետագային, երբ «Սեւան» խումբն իր աշխատանքը սկսեց Նոր Ջուղայում, առ ի համագործակցութիւն սոյն խմբի հետ, իրանական 1368 թւականին կնքւեց համաձայնագիր, ըստ որի սոյն դաշտի օգտագործման իրաւունքը շաբաթական երեք օր տրւեց «Սեւան» խմբին, իսկ երեք օր՝ Ն.Ջ. Հայ Մ.Մ. «Արարատ» Միութեանը:

Առ ի տեղեկութիւն պէտք է յայտնել, որ համաձայնագիրը կնքւել է «Սեւան» խմբի օրւայ տնօրէն պրն. Համազասպ (Համիկ) Թորոսեանի հետ:

Սոյն համաձայնագրի կէտերը յարգւեց մինչեւ այն ժամանակ երբ պրն. Համիկ Թորոսեանը մեկնեց արտասահման եւ «Սեւան» խմբի տնօրինութիւնը ստանձնեց մեր կողմից պաշտօնապէս ճանաչում չգտած պրն. Վազգէն Անդրիասեանը: Յիշեալը սկսեց խոչընդոտել «Արարատ» միութեան ֆուտբոլի խմբի փորձերի անցկացումը, անտեսելով այս ուղղութեամբ Թեմական Խորհրդի եւ «Արարատ» Միութեան յորդորները: Ի վերջոյ, Թեմական Խորհուրդը հարկադրաբար դիմեց օրինաւոր միջոցների, որի արդիւնքում կողպէք դրւեց մարզադաշտի վրայ: Որոշ ժամանակ անց «Արարատ» Միութեանը եւ Թեմական Խորհրդին դիմեց «Սեւան» խմբի նորանշանակ տնօրէն պրն. Րաֆֆի Օշքանեանը, որի հետ վարած բանակցութեան արդիւնքում, բարեբախտաբար հնարաւոր դարձաւ առանց պետական լուրջ միջամտութիւնների յաջող աւարտին հասցնել գործը: 7 Մարտ 2016 թւականին, պետական պատասխանատու մարմինների միջոցով բացւեց կալւածի վրայ դրւած կողպէքը, որի բանալիները յանձնւեցին Թեմական Խորհրդին, իսկ Թեմական Խորհրդի կողմից անձիս՝ որպէս «Արարատ» միութեան արտօնատէր եւ նոյն կալւածի վարձակալ: 15 ապրիլ 2016 թւականին, «Արարատ» միութեան եւ «Սեւան» խմբի պատասխանատուների ներկայութեամբ կալւածի բանալիների մէկ օրինակը փոխանցեցի պրն. Րաֆֆի Օշքանեանին:

Յատկանշական է, որ պրն. Րաֆֆի Օշքանեանի հետ ունեցած խորհրդակցութեան արդիւնքում որոշւել է հիմք ընդունելով նախկին համաձայնագիրը, առաջնորդւել ըստ այդմ:

Յարգելի պրն. Օշքանեան, եթէ լրացուցիչ բացատրութիւն ունէք, համեցէք խնդրեմ:

Ինչպէս արդէն պրն. Թաթուլ Օհանեանը նշեց, երկու կողմերի միջեւ անհամաձայնութիւնը ծագեց պրն. Համազասպ Թորոսեանի մեկնելուց յետոյ, երբ պրն. Վազգէն Անդրիասեանը, որը ժամանակին եղել է «Սեւան» խմբի տնօրէնի օգնականը, միջամտեց այս գործում եւ ինքնակոչ կերպով ստանձնեց տնօրէնի պատասխանատւութիւնը, վարելով ինքնանպատակ աշխատանք: Պրն. Անդրիասեանը չարաշահելով «Սեւան» խմբի շահերը պաշտպանող անձանց հովանաւորութիւնը, ստեղծեց բիւջէտային եւ բազմաբնոյթ այլ հարցեր, արգելքներ ստեղծեց «Արարատ» միութեան ֆուտբոլի խմբի համար՝ առաջացնելով «Արարատ» միութեան պատասխանատուների եւ մարզիկների դժգոհանքը: Այս կացութիւնը մտահոգեց նաեւ մեզ՝ «Սեւան» խմբի հովանաւորողներիս: Հարցի կարգաւորման նպատակով բազմաթիւ անգամներ պրն. Անդրիասեանից բացատրութիւն պահանջեցինք՝ իր որդեգրած սխալ ընթացքի կապակցութեամբ, սակայն ցաւօք դրական պատասխան չստացանք: Վերջերս, նկատի առնելով ստեղծւած կացութեան բարդացումը եւ համայնքում տիրող լարւածութիւնը, փորձեցի անձամբ դիմելով պետական մարմիններին, հետամուտ լինել հարցի կարգաւորմանը: Այս ընթացքում «Սեւան» խմբի առաջարկով եւ նահանգի Սպորտի եւ երիտասարդութեան հարցերի գերատեսչութեան հաստատումով նշանակւեցի սոյն խմբի տնօրէն, որից յետոյ բանակցութիւն ունեցայ «Արարատ» միութեան արտօնատիրոջ եւ Թեմական Խորհրդի հետ եւ ի վերջոյ յաջողւեց դրական լուծում տալ գործին: 

Վերջում հարկ եմ համարում տեղեկացնել, որ պրն. Վազգէն Անդրիասեանը «Սեւան» խմբի նկատմամբ այլես որեւէ պատասխանատւութիւն չունի: