Նոր Ջուղայի Հայոց Ագզային Մանկապարտէզ-Նախակրթարանի տեսչութեան, ուսուցչական կազմի եւ Ծնողական Խորհրդի կազմակերպութեամբ, սրբութեան ու զոհողութեան խորհրդանիշ հայ մայրերի տօնը նշւեց գեղարւեստական-դասախօսական ձեռնարկով, չորեքշաբթի՝ ապրիլի 6-ի երեկոյեան, Հայոց Ագզային Կրթահամալիրի «Ալենուշ Տէրեան» սրահում: Երեկոյի պատւաւոր հիւրերն էին դպրոցի աշակերտութեան մայրերն ու տատիկները:
Ծրագրի բացման խօսքն ասաց դպրոցի ուսուցչուհի Անետ Ղազարեանը, ով ելոյթ ունեցաւ շնորհաւորանքներով ու մեծարանքի արտայայտութիւներով: Ահա մի հատւածի մէջբերում բացման խօսքից.
«Հայ մայրը յաւերժացրել է իր արդար էութիւնը թէ աշխարհիկ կեանքում եւ թէ դրախտում, որովհետեւ նա ընդունակ է ոչ միայն զոհելու իրեն յանուն իր զաւակի, այլ նաեւ զոհաբերելու իր որդուն ամենաահեղ ճակատամարտերում: Այսօր խիստ արդիական են եւ նշելի ղարաբաղեան ճակատամարտում իրենց կեանքը նւիրաբերած բազմաթիւ հերոսները, որոնց շիրիմները պատած են մայրական հզօր սիրով»:
Բացման խօսքին յաջորդեց գեղարւեստական բաժինը, ուր նախակրթարանի աշակերտներն ու մանկապարտէզի Դեղին եւ Մանուշակագոյն խմբակների սաները միասնաբար իրենց տատիկներին ու մայրերին նւիրեցին խմբական երգերից եւ արտասանութիւններից կազմւած մի գեղեցիկ փունջ՝ դրւատանքի խօսքերով ու մօր նկատմամբ ունեցած զաւակի անկեղծ ու պարզ սիրոյ արտայայտութիւններով ողողւած:
Բանախօսական ելոյթով հանդէս եկաւ հայոց ազգային դպրոցների վաստակաւոր ուսուցչուհի Միգանուշ Տէր-Մարտիրոսեանը, ով իր խօսքի առաջին բաժնում անդրադառնալով նախաքրիստոնէական շրջանում հայ կնոջ կարեւոր դերակատարութեանը՝ ժողովրդի մէջ՝ քրիստոնէական գաղափարները գաղտնի տարածելու գործում, ընդգծեց, որ հայ կինը ինչքան ամուր կառչած լինի իր հաւատին, այնքան ամրակուռ են լինելու նրա ընտանիքի հիմքերը:
Այնուհետեւ նա անդրադառնալով հայ պատմութեան էջերում յաւերժացած հայուհիներին, ինչպիսիքն են Աւարայրի ճակատամարտում զոհւած Ձւիկ տիկինը, Արշակ երկրորդ թագաւորի կին Փառանձեմ թագուհին, Հայոց Ցեղասպանութեան ճիրաններից փրկւած որբերին պաշտպանող Պարտիզպան քոյրերը, Սերոբ Աղբիւրի կին հերոսուհի Սօսէ Մայրիկը, առաջին հայ կին դեսպան Դիանա Աբգարը եւ արցախեան ազատամարտում սխրագործ հերոսուհիները, կարեւորեց նրանց նշանակալի դերն ու անձնազոհութիւնները՝ ի խնդիր հայ ժողովրդի գոյատեւման ու բարօրութեան:
Տկն. Տէր-Մարտիրոսեանն իր խօսքի աւարտին նշեց, որ մայրն իր ամբողջ զոհաբերութեան եւ նւիրւածութեան դիմաց վարձատրւում է միայն հոգեկան եւ բարոյական արժէքներով՝ հասարակութեան մէջ իր զաւակի յաջողութիւնները տեսնելով, ապա անդրադառնալով հայապահպանման վսեմ գաղափարի առումով իգական սեռին վերապահւած չափազանց կարեւոր դերին, աւելացրեց, այսօր հայ մայրերը պէտք է նեցուկ հանդիսանան հասարակական կեանքում միմեանց շաղկապւած օղակներին՝ ընտանիքին, դպրոցին եւ միութիւններին՝ յանուն հայեցի դաստիարակութեան, բազմադարեան մշակութային հարստութեան պահպանման, արցախեան գոյամարտի յաղթութեան եւ մեր վերջնական ու միասնական վեհ գաղափարախօսութեան՝ ազատ, անկախ եւ ամբողջական Հայաստանի կերտման:
Երեկոյի յաջորդ բաժնում տեղի ունեցաւ մրցոյթ, որտեղ ցանկացող իւրաքանչիւր մայր ու տատիկ կազմեց առանձին խումբ, եւ խմբերի մրցակցութեան արդիւնքում պարգեւատրւեց յաղթողը:
Աւարտին տեղի ունեցաւ ընդունելութիւն:
Հարկ է նշել, որ տատիկներին նւիրւել էին կրծքանշաններ, իսկ մայրերին յուշանւէրներ:
«Ալիք» օրաթերթի թղթակից (Նոր Ջուղա)
Լուսանկարիչ՝ Գեւիկ Խաչատրեան
