Չորեքշաբթի՝ 2016 թւականի, մարտի 2-ի առաւօտեան, Շահինշահրի Հայոց Ազգային «Սրբոց Վարդանանց» Դպրոցի սրահում տեղի ունեցաւ Արեւագալի արարողութիւն՝ Սպահանի Հայոց Թեմի թեմակալ առաջնորդ գերշ. Տ. Բաբգէն արք. Չարեանի նախագահութեամբ, ներկայութեամբ համայնքի հոգեւոր տեսուչ հոգշ. Տ. Անանիա վրդ. Գուճանեանի, արժն. Տ. Սահակ քհնյ. Մինասեանի եւ դպրաց դասի: Արարողութեանը ներկայ էին Համայնքի Վարչութեան ներկայացուցիչները եւ հաւատացեալ ժողովուրդ:

Առաւօտեան արարողութիւնից յետոյ, Շահինշահրի Հայ Կանանց Եկեղեցասիրաց Միութեան նախաձեռնութեամբ «Սրբոց Վարդանանց» դպրոցի միջնասրահում տեղի ունեցաւ պատշաճ միջոցառում Միջինքի առիթով, որին ներկայ էին թեմակալ առաջնորդը, հոգեւոր հայրերը, դպրաց դասը, Վարչութեան ներկայացուցիչը, դպրոցի փոխտեսուչը եւ հրաւիրեալներ:

Բարիգալստեան խօսքով հանդէս եկաւ Շահինշահրի Հայ Կանանց Եկեղեցասիրաց Միութեան նախագահ տկն. Լինա Մովսիսեանը, ով իր խօսքում ներկաներին շնորհաւորեց գարունը եւ ապա ամփոփ կերպով ներկայացրեց Միջինքի խորհուրդը:

Այնուհետեւ օրւայ առիթով իրենց գեղեցիկ երգով եւ ասմունքով ելոյթ ունեցան տկնյք. Մագի Յարութիւնեանը, Էլիզ Շահիջանեանը, Վարդուշ Մկրտչեանը, Մառիթա Սարեանը եւ Վիոլեթ Յարութիւնեանը:

Այսպիսի ջերմ ու հարազատ մթնոլորտում, բոլոր ներկաները հիւրասիրւեցին միութեան շնորհալի անդամների ձեռամբ պատրաստւած եւ նւիրաբերած հաճարի փլաւով, մախոխով, բանջարի ապուրով ու հացով: Այդ ընթացքում նաեւ Միջինքի բախտախաղի կարկանդակ բաժանւեց ներկաներին:

Ծրագրի աւարտին արտայայտւեց հոգշ. Հայր Սուրբը, ով առիթը պատեհ համարելով նախ շնորհակալութիւն յայտնեց Համայնքի Վարչութեանը եւ ժողովրդին, որոնք միշտ հարազատօրէն մասնակցում են կրօնական արարողութիւններին, ապա իր գնահատանքի խօսքն ուղղեց Հայ Կանանց Եկեղեցասիրաց Միութեան անդամներին, ովքեր միշտ ամենայն հոգատարութեամբ կազմակերպում են միջոցառումներ՝ կատարելով պարտն ու պատշաճը:

Հոգշ. Հայր Սուրբի խօսքին յաջորդեց առաջնորդ Սրբազան Հօր հայրական պատգամը. նա հանգամանօրէն բացատրելով պահեցողութեան իմաստը, մեկնաբանեց պահեցողութեան նշանակալից դերը՝ մարդու սրտի, մտքի եւ հոգու մաքրման գործում: Գերշ. Սրբազան Հայրը շեշտելով լեզւի պահեցողութեան վրայ, յորդորեց հաւատացեալներին հեռու մնալ բամբասանքից, խծբծանքից, սուտ վկայութիւն տալուց եւ վարկաբեկելուց: Թեմակալ առաջնորդը շարունակելով իր խօսքը ընդգծեց, որ իբրեւ իսկական քրիստոնեայ, անհրաժեշտ է հեռու մնալ չար մտածումներից, չար արարքներից եւ չար խօսքերից:

Գերշ. Սրբազան Հայրն իր խօսքն աւարտեց բոլորին օրհնելով եւ «Բարով հասնենք Ս. Յարութեան» արտայայտութեամբ:

Ծրագրի աւարտին տկն. Մովսիսեանը շնորհակալութիւն յայտնեց հոգեւոր հայրերին, դպրաց դասին, ազգային մարմիններին եւ միութեան անդամներին՝ իրենց ցուցաբերած հովանաւորութեան եւ համագործակցութեան համար:

Շահինշահրի Հայ Համայնքի Վարչութեան Թղթակից՝

Վ. Յարութիւնեան