Սպահանի հայոց թեմի Թեմական խորհրդի հրաւէրով Նոր Ջուղա ժամանած Հայաստանի Ազգային գրադրանի տնօրէն Տիգրան Զարգարեանը, հինգշաբթի՝ մարտի 3-ի երեկոյեան, հայոց ազգային կրթահամալիրի «Ալենուշ Տէրեան» սրահում հանդիպեց կրթական եւ մշակութային ոլորտին առնչւող անհատներին: Հանդիպմանը ներկայ էր նաեւ Թեմական խորհրդի ատենապետ Վրէժ Տէր-Մարտիրոսեանը:

Սկզբում Ս. Ամենափրկիչ վանքի «Ս. Ներսէս Շնորհալի» գրադարանի պատասխանատու Վերգինէ Միրզախանեանը բացատրելով, որ 2016 թւականին լրանում է «Ս. Ներսէս Շնորհալի» գրադարանի հիմնադրման 110-ամեակը, եւ նշելով, որ Ազգային գրադրանի տնօրէնի այցելութիւնը լաւագոյն սկիզբն է այս յոբելեանական առիթին նւիրւած միջոցառումների, հրաւիրեց Տիգրան Զարգարեանին արտայայտւելու:

Պրն. Զարգարեանն իր բանախօսական ելոյթը ծաւալեց Ազգային գրադարանի գործունէութեան եւ սոյն հաստատութեան կայքէջի առցանց հնարաւորութիւնների շուրջ: Նա սկզբում շնորհակալական խօսք ուղղելով  Թեմական խորհրդին՝ իրեն հրաւիերլու եւ իր այցելութիւնը կազմակերպելու համար, դրւատանքով արտայայտւեց «Ս. Ներսէս Շնորհալի» գրադարանի գործունէութեան ծաւալի եւ պատկան գրադարանավարուհու կատարած ջերմեռանդ աշխատանքի կապակցութեամբ: Այնուհետեւ անդրադառնալով Ազգային գրադարանի պատմութեանը եւ գործունէութեանը, նշեց, որ Ազգային գրադարանը որպէս հայ գրքի պահոց խոշորագոյն հաստատութիւնն է աշխարհում: Տիգրան Զարգարեանն իր խօսքը շարունակեց ակնարկ ունենալով գրքերի եւ մամուլների թւայնացման անհրաժեշտութեանը եւ նշեց թւայնացւած գրականութեան օգտագործման առաւելութիւններն ու թերութիւնները:

Նա իր ելոյթի երկրորդ բաժնում  ներկաներին առցանց կերպով ծանօթացրեց Ազգային գրադարանի կայքէջին եւ թւայնացւած գրքերի ու մամուլի շտեմարանից օգտւելու եղանակներին:

Հանդիպման աւարտին պրն. Զարգարեանը պատասխանեց հարցումներին:

«Ալիք» օրաթերթի թղթակից (Նոր Ջուղա)