Իրանի Իսլ. Խորհրդարանի 10-րդ նստաշրջանի Սպահանի եւ հարաւային իրանահայութեան պատգամաւորութեան թեկնածու Ժորժիկ Աբրահամեանի հանդիպումը Շահինշահրի հայ համայնքի հետ տեղի ունեցաւ Երեքշաբթի՝ փետրւարի 23-ի երեկոյեան ժամը 7:30-ին, «Սրբոց Վարդանանց» դպրոցի սրահում:

Սկզբում Նոր Ջուղայի Ընտրական շտաբի ներկայացուցիչ Վրէժ Շիրւանեանը հանդէս եկաւ ողջոյնի խօսքով, ապա ներկայացնելով պատգամաւորութեան թեկնածուին, նրան հրաւիրեց արտայայտւելու: Ժորժիկ Աբրահամեանը «Յիշի՛ր անցեալը, քւէարկի՛ր ապագային» նշանաբանի ներքոյ անդրադարձաւ 6-րդ նստաշրջանի Խորհրդարանում իրագործած գործունէութեանը՝ իրանահայութեանը նպաստող օրինագծերի եւ որոշումների ընդունման եւ համազգային շահերի պաշտպանութեան ուղղութեամբ: Ապա հանգամանօրէն նշելով համազգային արդի մարտահրաւէրները եւ համայնքում  գոյացած խոչընդոտները՝  ընդգծեց իր մշակած ծրագրի կարեւորագոյն առանցքները՝ խոստանալով, որ իր հնարաւորութիւնների սահմանում  կատարելու է լաւագոյնը բարդութիւնները յաղթահարելու եւ ազգօգուտ ծրագրերը կենսագործելու կապակցութեամբ:

Այնուհետեւ յարգարժան թեկնածուն ունկնդրեց արծարծւող տեսակէտներին եւ  ամենայն համբերատարութեամբ պատասխանեց ներկաների կողմից հնչող հարցումներին:

Հանդիպման աւարտին տեղի ունեցաւ համեստ հիւրասիրութիւն:

Շահինշահրի Հայ Համայնքի Վարչութեան Թղթակից՝

Վ. Յարութիւնեան

Լուսանկարիչ՝   Գեւիկ Խաչատրեան