Շաբաթ, փետրւարի 20-ի երեկոյեան ժամը 7:30-ին, տեղի ունեցաւ Իրանի Իսլ. Խորհրդարանի 10-րդ նստաշրջանի Սպահանի եւ հարաւային իրանահայութեան պատգամաւորութեան թեկնածու Ժորժիկ Աբրահամեանի Կենտրոնական շտաբի պաշտօնական բացումը, որը գտնւում է Նոր Ջուղայի Հայ Դատի յանձնախմբի կենտրոնատեղիում:

Սկզբում Ն.Ջ. Հայ Դատի յանձնախմբի ներկայացուցիչ Աշոտ Դաթեանը հանդէս եկաւ ողջոյնի խօսքով, ապա ներկայացնելով պատգամաւորութեան թեկնածուին, նրան հրաւիրեց արտայայտւելու: Ժորժիկ Աբրահամեանն անդրադառնալով «Յիշի՛ր անցեալը, քւէարկի՛ր ապագային» նշանաբանի ներքոյ իրականացւող իր քարոզարշաւի ծրագրերին ու հանդիպումներին՝ ընդգծեց իրանահայութեանը նպաստող օրինագծերի եւ որոշումների ընդունման ու համազգային շահերի պաշտպանութեան ուղղութեամբ 6-րդ նստաշրջանի Խորհրդարանում ծաւալած իր գործունէութիւնը, խոստանալով, որ լաւագոյնը կատարելու է համազգային դժւարութիւնները եւ համայնքի առջեւ ծառացած խոչընդոտները միասնաբար յաղթահարելու հնարաւորութիւնների ստեղծման համար:

Այնուհետեւ երեկոյեան ժամը 8:30-ին, նոյն շտաբում, տեղի ունեցաւ Նոր Ջուղայի եւ Շահինշահրի հայ երիտասարդների հետ հանդիպումը, որն սկիզբ առաւ Արթին Մուրադեանի հաղորդավարութեամբ, ով ներկայացրեց Ժորժիկ Աբրահամեանի կենսագրութիւնն ու առաջիկայ ծրագրերը: Շարունակութեան մէջ պատգամաւորութեան թեկնածուն ողջունելով երիտասարդներին՝ ցանկացաւ լսել նրանց տեսակէտները, մտահոգութիւններն ու դժւարութիւնները՝ իր ապագայ ծրագրում ներառելու համար, որից յետոյ երեկոն ընթացաւ մտերմիկ զրոյցի ներքոյ, ուր ներկաներն արտայայտեցին իրենց մտքերը եւ սպառիչ պատասխաններ ստացան իրենց յուզող հարցերի շուրջ:

«Ալիք» օրաթերթի թղթակից (Նոր Ջուղա)