Նոր Ջուղայի Հայ մարզա-մշակութային «Արարատ» միութեան Երէցների միաւորի վարչութեան նախաձեռնութեամբ եւ համագործակցութեամբ միաւորի անդամուհիների, կիրակի՝ փետրւարի 7-ի երեկոյեան, միութեան մարզասրահում նշւեց հայկական աւանդական Բուն Բարեկենդանը:

Ներկաներին ողջունեց օրւայ հաղորդավար միութեան Մշակութային միաւորի «Կռունկ» ասմունքի խմբի անդամ՝ Կարէն Խանլարեանը, ով անդրադարձաւ Բարեկենդան տօնի ծագմանը եւ պատկան ծէսերին ու աւանդոյթներին: Այնուհետեւ Վահէ Յարութիւնեանի միջոցով ցրւող խանդավառ երաժշտութեամբ ներշնչւած՝ թւով 55- տարազաւորներ մասնակցեցին կերպարների ներկայացման մրցոյթին եւ ըստ իրաւարար կազմի գնահատականների՝ պարգեւատրւեցին լաւագոյնները:

Տօնախմբութեան ընթացքում, բազմահարիւր ներկաներ, վայելեցին Երէցների միաւորի պատրաստած ուտեստներն ու ըմպելիքները,իսկ մանուկները վայելեցին նախատեսւած գեղեցիկ փաթեթաւորւած քաղցրաւենիքներ։ Միաւորը վաճառքի էր հանել նաեւ դիմակներ, իսկ Արինէ եւ Լուսինէ Թորոսեանների համագործակցութեամբ, կազմակերպւել էր դիմայարդարման կրպակ, ուր ցանկացողները առիթ ունեցան օրւան պատշաճ նաղշերով դիմայարդարւել:

Նշելի է, որ ծրագրի իրականացման գործում Երէցների միաւորի հետ համագործակցել էին Մշակութային եւ Սկաուտական միաւորները:

Իրաւարար կազմը ներկայացնում էր՝ Զեփիւռ Վարդեւանեանը, Ալենուշ Մարտոյեանը եւ Սեդա Բարղեանը:

Ն. Ջ. Հայ Մ.Մ. «Արարատ» միութեան թղթակից

Երանուշ Թահմազեան

Լուսանկարները՝ հեղինակի

{gallery}photo_report/2016_02/01_barikendan_2016{/gallery}