Երեքշաբթի՝ 2016 թւականի փետրւարի 2-ի յետկէսօրեայ ժամը 4:00-ին, Շահինշահրի «Սրբոց Վարդանանց» դպրոցի սրահում կայացաւ Շահինշահրի Հայ Կանանց Եկեղեցասիրաց միութեան հանդիպումը՝ Նոր Ջուղայի Հայ Կանանց Գթութեան միութեան հետ, ներկայութեամբ համայնքի հոգեւոր տեսուչ հոգշ. Տ. Անանիա վրդ. Գուճանեանի, Հայ Համայնքի Վարչութեան ներկայացուցչի եւ զոյգ միութեան անդամների:

Բացման խօսքով հանդէս եկաւ Շահինշահրի Հայ Կանանց Եկեղեցասիրաց միութեան նախագահ տկն. Լինա Մովսիսեանը, ով բարի գալուստ մաղթելով ներկաներին, ամփոփ կերպով ներկայացրեց վերոյիշեալ միութեան հիմնադրման, զարգացման ու ծաւալման զեկոյցը՝ ընդգծելով միութեան գործունէութեան կարեւոր ու հիմնական աշխատանքները` բարեսիրական, ազգային-կրօնական, մշակութային ոլորտներում, որոնց ընթացքում ամբողջ անձնակազմը միշտ հանդէս է եկել համագործակցաբար ու միասնական ուժերով՝ դրսեւորելով իրենց լաւագոյնը եւ ոչ մի ջանք չխնայելով միութեան վերելքի ուղղութեամբ: Նա իր խօսքի շարունակութեան մէջ նշեց. «Թէպէտ իր միութենական կեանքում հանդիպել է որոշակի դժւարութիւնների եւ խոչընդոտների, սակայն վայելելով Թեմիս ազգային իշխանութեան հովանաւորութիւնը եւ Համայնքի Վարչութեան համագործակցութիւնը՝ կարողացել է յաղթահարել դրանք: Իսկ որպէս երախտագէտ մի միութիւն փոխադարձաբար իր համագործակցութիւնն է ցուցաբերել Համայնքի Վարչութեանը եւ միւս անձնակազմերին»:

Տկն. Մովսիսեանն իր խօսքում նաեւ ակնարկեց միութեան հիմնադրման 40-ամեակին, որի հանդիսութիւնը մօտ ապագայում տօնակատարւելու է:

Սոյն հանդիպման կազմակերպումը ողջունեց հոգշ. Հայր Սուրբը, ով դրւատելով զոյգ միութեան անդամների միութենական բարձր ոգին՝ որակեց նրանց որպէս յանձնառու, գործունեայ եւ գիտակից անձնաւորութիւններ, քաջառողջութիւն եւ նորանոր նւաճումներ մաղթելով նրանց:

Սոյն հանդիպմանը արտայայտւեց նաեւ Հայ Համայնքի Վարչութեան նախագահ՝ պրն. Մելքոն Շիրւանեանը, ով ողջունելով ներկաներին՝ իր ուրախութիւնն յայտնեց այսպիսի հանդիպում կազմակերպելու կապակցութեամբ: Պրն. Շիրւանեանն իր խօսքում բարձր գնահատեց Շահինշահրի Հայ Հանանց Եկեղեցասիրաց միութեան դերակատարութիւնը՝ համայնքի ազգային-մշակութային կեանքում եւ առաւել ուժ ու կորով մաղթեց բոլոր հայ միութիւններին, որոնք անխոնջ աշխատում են հայ համայնքների վերելքի ու զարգացման ուղղութեամբ:

Շահինշահրի Հայ Համայնքի Վարչութեան թղթակից՝

Վ. Յարութիւնեան