2014-2015 եւ 2015-2016 ուսումնական տարեշրջաններին, դոկտորայի, գերլիսանսի, լիսանսի եւ գերդիպլոմի մակարդակներում երկրի տարբեր համալսարաններ մուտք գործած Նոր Ջուղայի եւ Շահինշահրի 66 հայ երիտասարդ-ուհիներին գնահատելու նպատակով՝ Սպահանի հայոց թեմի Կրթական խորհրդի նախաձեռնութեամբ, չորեքշաբթի՝ յունւարի 27-ի երեկոյեան, Նոր Ջուղայի հայոց ազգ. կրթահամալիրի «Ալենուշ Տէրեան» դահլիճում կազմակերպւել էր գնահատման երեկոյ, որին նշւած  տարեշրջանների նորամուտ ուսանողներից ու իրենց ծնողներից բացի, ներկայ էին նաեւ թեմի առաջնորդ գերշ. Տ. Բաբգէն արք. Չարեանը, Իրանի Իսլ. Խորհրդարանում հարաւային իրանահայութեան պատգամաւոր Ռոբերտ Բեգլարեանը, Պատգամաւորական ժողովի Դիւանի եւ Թեմական ու Կրօնական խորհուրդների ատենապետեր՝ Վարուժ Մինասեանը, Վրէժ Տէր-Մարտիրոսեանն ու Վարուժ Մովսիսեանը, Կրթական խորհրդի անդամները եւ  հայոց ազգային դպրոցների ներկայացուցիչներ: 

Սկզբում ողջոյնի խօսքով հանդէս եկաւ Կրթական խորհրդի գործավար եւ երեկոյի հանդիսավար Մադլէն Ղարիբեանը, ով իր խօսքում շնորհաւորելով նորամուտ ուսանողներին՝ իրենց յաջողութեան համար, առաջադէմ եւ դաստիարակւած սերունդը հայ ազգի յարատեւման երաշխիքը համարեց: 

Ապա Կրթական խորհրդի անունից ելոյթ ունեցաւ նոյն խորհրդի անդամ Սոնիկ Բաղումեանը: Նա շնորհաւորանքի խօսք ասելով նորամուտներին՝ իրենց բարձրագոյն կրթութեան ուղին սկսելու կապակցութեամբ, նշեց. «Դուք՝ որպէս համալսարանականներ, պէտք է գիտութեանը վերաբերւէք նորովի մօտեցմամբ եւ ձեր վերաբերմունքը ճշտէք ոչ միայն գիտութիւն ձեռք բերելու առումով, այլեւ ձերը արարելու կարեւոր եւ յստակ պարտականութեամբ. դա է մարդկային հասարակութիւնների զարգացման երաշխիքը, որի արդիւնքում դուք կը կարողանաք աւելացնել մարդկային հասարակութիւնների գիտական շտեմարանը՝ յանուն մարդու  երջանկութեան, որը հիմքն է կազմելու նաեւ ձեր, ընտանիքների, հայ ազգի ու հայրենիքի երջանկութեան»: 

Այնուհետեւ օրւայ առթիւ բանախօսութիւն ծաւալեց Իրանի Իսլ. խորհրդարանում հարաւային իրանահայութեան պատգամաւոր Ռոբերտ Բեգլարեանը, ով ողջունելով նորամուտների յաջողութիւնները, իր խօսքի սկզբնական բաժնում անդրադառնալով գիտութեան զարգանալու արագ ընթացքին՝ կարեւորութեամբ նշեց, որ կարելի է համալսարանը աւարտել, սակայն երբեք չի կարելի կրթւելն աւարտել, քանի որ գիտութեան աշխարհի հետ զուգահեռ քայլելու համար՝ հարկաւոր է օրըստօրէ նորացնել եւ թարմացնել գիտելիքների պաշարը: 

Խօսքի շարունակութեան մէջ բանախօսը մատնանշելով գիտութեան շնորհիւ ձեռք բերւող հնարաւորութիւններն ու առաւելութիւնները՝ յորդորեց՝ չբաւարարւել ընտրած ճիւղում մասնագիտանալով եւ յաջողութիւններ արձանագրելու համար փորձել զուգահեռ մասնագիտութիւններ ձեռք բերել կամ նւազագոյն գիտելիքներ կուտակել յատկապէս տնտեսութեան, քաղաքականութեան, իրաւագիտութեան եւ հասարակագիտութեան ասպարէզներում: 

Պրն. Բեգլարեանն իր խօսքի վերջին բաժնում հայ ազգի պատմութեան եւ արժէքների ճանաչելն ու ուսումնասիրելը հայ ուսանողի պարտականութիւնը համարելով, կարեւորութեամբ ընդգծեց, որ այդպիսով կարող ենք մեր հայ ծնւելու փաստը դարձնել ինքնավստահութեան եւ հպարտութեան առիթ:

Ծրագրի շարունակութեան մէջ պաստառի վրայ ցուցադրւեցին անւանի իրանահայերից լուսանկարներ՝ նրանց կենսագրական գծերին ու գործունէութեանն անդրադարձող ամփոփ բացատրականներով:

Արտայայտւեց նաեւ Թեմական խորհրդի ատենապետ Վրէժ Տէր Մարտիրոսեանը, ով իր ուրախութիւնը յայտնելով համալսարանների մուտքի քննութիւններում հայ երիտասարդների յաջողութեան կապակցութեամբ, նրանց նորանոր յաջողութիւներ  մաղթելով, նշեց. «Համալսարանն աւարտելուց յետոյ ոչ միայն պէտք է մտածէք ձեր եւ ձեր ընտանիքի համար բարեկեցիկ կեանք ապահովելու մասին եւ երկրի վերելքի ու յառաջադիմութեան ուղղութեամբ, այլեւ պէտք է ունենաք ազգային մտածողութիւն եւ ձեր գիտութիւնն ու եռանդը ներդնէք նաեւ ազգային կեանքը զարգացնելու եւ բարեփոխելու համար»: 

Այնուհետեւ թեմակալ առաջնորդ Սրբազան Հօր, խորհրդարանի պատգամաւորի եւ Սպահանի հայոց թեմի Պատգամաւորական ժողովի Դիւանի ու Թեմական եւ Կրօնական խորհուրդների ատենապետերի, ինչու չէ նաեւ Կրթական խորհրդի ատենապետուհի Սաթենիկ Աւետումեանի միջոցով նորամուտ ուսանողներն առանձնաբար ստացան իրենց գնահատագրերն ու նւէրները: Իսկ այս բաժնի աւարտին Կրթական խորհրդի կողմից եւ առաջնորդ Սրբազան Հօր ձեռամբ յատուկ պատւոգիր շնորհւեց խորհրդարանի պատգամաւոր Ռոբերտ Բեգլարեանին՝ իր պատգամաւորութեան 12 տարիների ընթացքում հայոց դպրոցների կողքին լինելու եւ դրանց զօրավիգ հանդիսանալու համար:

Երեկոյի եզրափակիչ խօսքն արտայայտեց թեմակալ առաջնորդ գերշ. Տ. Բաբգէն արք. Չարեանը, որը գնահատելով Կրթական խորհրդին՝ երեկոյի կազմակերպման համար, ուսանողներին ասաց, թէ գիտութեան օրւայ զարգացումների հետ համընթաց քայլեն եւ շարունակ թարմացնեն իրենց գիտելիքները: 

Սրբազան Հայրն իր խօսքի շարունակութեան մէջ կարեւորելով մարդու նկարագիրը, նշեց «Երբեմն մարդը գիտութեան ոլորտում բարձրանում է, սակայն չի կարողանում ճիշտ վերաբերմունք ցոյց տալ իր նմանի նկատմամբ», եւ երիտասարդ ներկաներին յորդորեց իրենց նկարագիրն առողջ պահել՝ հայրենիքի, ազգի, եկեղեցու եւ համայնքի նկատմամբ: 

Վերջում Տ. Բաբգէն արք. Չարեանը յիշեցնելով, որ աննպատակ կեանքը մարդուն դէպի անդունդը կը տանի, իսկ նպատակադրւածը՝ մարդուն կառաջնորդի դէպի այնտեղ, ուր Աստւած կը վարձատրի, կոչ ուղղեց հրաւիրեալներին, որ կրթւելուց բացի մասնակցութիւն ունենան ազգային եւ հոգեւոր ծրագրերին՝ բազմակողմանի զարգանալու եւ զանազան գիտելիքներով հարստանալու համար:

Երեկոյի աւարտին երկու տարեշրջանների նորամուտներն առանձնաբար լուսնակարւեցին, որից յետոյ տեղի ունեցաւ հիւրասիրութիւն:

«Ալիք» օրաթերթի թղթակից (Նոր Ջուղա)

Լուսանկարիչ՝ Գեւիկ Խաչատրեան