Շաբաթ՝ յունւարի 30-ի երեկոյեան, Նոր Ջուղայի Ս. Յովհաննու եկեղեցում, ժամը 5:30-ին, նախագահութեամբ Սպահանի հայոց թեմի առաջնորդ գերշ. Տ. Բաբգէն արք. Չարեանի եւ մասնակցութեամբ քահանայից ու դպրաց դասերի տեղի ունեցաւ Կիրակնամուտի ժամերգութիւն, որի աւարտին, թեմակալ առաջնորդ Սրբազան Հօր միջոցով` ընթերցւեց Ն.Ս.Օ.Տ.Տ. Արամ Ա Կաթողիկոսի Հայրապետական գիրը՝ 2016 թւականը «Ծառայութեան տարի» հռչակելու կապակցութեամբ:

Սրբատառ հռչակագրում Վեհափառ Հայրապետը ծառայութիւնը մարդկային կեանքի ամենաբարձր արժէքներից ու արժանիքներից մէկը համարելով, այդ երեւոյթին անդրադարձել էր հետեւեալ գլուխների ներքոյ.

ա. Ծառայութիւնը Աստւածաշնչում

բ. Ծառայութիւնը եկեղեցու հայրերի ուսուցումներում

գ. Ծառայութիւնը քրիստոնէական հաւատքի էութիւնն է

դ. Ծառայութիւնը եկեղեցու կոչումն է

ե. Ծառայութիւնը համայնքային ու պետական կառոյցների պարտաւորութիւնն է

զ. Ծառայութիւնը իւրաքանչիւր հայի պարտքն ու պատիւն է

Ն.Ս.Օ.Տ.Տ. Արամ Ա Կաթողիկոսն իր հռչակագրի աւարտին կոչ էր ուղղել՝ լուսարձակի տակ բերելով ծառայութեան կենսական կարեւորութիւնը մեր կեանքում, զանազան ձեռնարկների միջոցով.

– գնահատելու համայնքին ծառայութիւն մատուցած ազգայիններին,

– յիշեցնելու, յատկապէս երիտասարդներին, ազգին ծառայելու հրամայականը` մեր հաւաքական կեանքին՝ իրենց գործօն մասնակցութեամբ,

– կոչ ուղղելու տարբեր կարողութիւններով ու հնարաւորութիւններով օժտւած մեր ազգայիններին, որ օգտակար հանդիսանան համայնքի ծաղկման, եկեղեցու պայծառացման, հայրենիքի հզօրացման ու ազգի առաջադիմութեան նպաստող ծրագրերին ու աշխատանքներին:

Վերջում թեմակալ առաջնորդ Սրբազան Հայրը ողջունելով Վեհափառ Հայրապետի մտայղացումը՝ 2016 թւականը «Ծառայութեան տարի» հռչակելու կապակցութեամբ, յորդորեց՝ առաւել յանձնառութեամբ ծառայել ազգին, հայրենիքին, եկեղեցուն եւ համայնքին:

Ժամերգութեան ընթացքում երգեցողութեամբ հանդէս եկաւ Ս. Ամենափրկչեան վանքի «Տաթեւ» երգչախումբը՝ խմբավար Համիկ Ալեքսանդրեանի ղեկավարութեամբ: Արարողութեանը ներկայ էին նաեւ թեմի ազգային մարմինների եւ միութիւնների ներկայացուցիչներն ու հաւատացեալ ժողովուրդ:

«Ալիք» օրաթերթի թղթակից (Նոր Ջուղա)