Երկուշաբթի՝ 2016 թւականի յունւարի 4-ի միջօրէին, Ս. Ամենափրկչեան վանք այցելեցին Սպահանի քաղաքապետ դկտ. Մեհդի Ջամալինեժադը, Սպահանի 5-րդ շրջանի քաղաքապետ դկտ. Ասառզադեգանը, Սպահան քաղաքի ճարտարապետական հիմնարկի եւ քաղաքապետարանին ենթակայ այլ բաժանմունքների պատասխանատուներ՝ Ամանորեայ շնորհաւորանքներ փոխանցելու համար:
Պատւիրակութեանը դիմաւորեցին եւ Ս. Ա. Վանքի Ծաղկեայ դահլիճում հիւրընկալեցին Թեմակալ առաջնորդ գերշ. Տ. Բաբգէն արք. Չարեանը, Թեմական եւ Կրօնական խորհուրդների ատենապետերն ու անդամները:
Փոխադարձ բարեմաղթութիւններ փոխանցելուց եւ յուշանւէրներ յանձնելուց յետոյ, քաղաքապետ դկտ. Ջամալինեժադը համապարփակ բացատրութիւն ներկայացրեց Սպահանում՝ անցնող տարւայ ընթացքում իրականացւած ծրագրերի եւ ապագայի համար նախատեսւած աշխատանքների մասին, միաժամանակ շնորհակալութիւն յայտնեց հայ համայնքին՝ Սպահան քաղաքին կապւած յաջողութիւնների եւ ձեռքբերումների գործում իրենց ուրոյն դերակատարութիւնն ու համագործակցութիւնը ցուցաբերելու համար, շեշտելով, որ հայ համայնքը տակաւին շատ աւելի մեծ տարողութիւն ունի՝ արհեստի եւ արւեստի բնագաւառներում նորանոր ներդրումներ կատարելու:
Դկտ. Ջամալինեժադը յատուկ կերպով շեշտեց քաղաքապետարանին առնչւող առաջնորդարանի եւ հայ համայնքի հարցերին վերահասու լինելու կապակցութեամբ առանձնայատուկ ուշադրութեանը եւ մատնանշեց, յանձնարարւել է նման հարցերում պատասխանատուները արտակարգ գործունէութիւն ծաւալեն:
Ազգային իշխանութեան ներկայացուցիչների հետ հանդիպումից յետոյ, քաղաքապետարանի պատւիրակութիւնն այցելեց ազգային ծերանոց, որտեղ նրանց դիմաւորեցին Ն.Ջ. Հայ Կանանց Գթութեան Միութեան վարչութեան անդամները, ծերանոցի աշխատակազմը եւ տարեցները: Հայ Կանանց Գթութեան Միութեան վարչութեան նախագահ տկն. Արմինէ Սիմոնեանը հիւրերին բարիգալստեան խօսք ուղղելուց յետոյ, հակիրճ կերպով տեղեկութիւն փոխանցեց միութեան 100-ամեայ բեղուն գործունէութեան վերաբերեալ: Այնուհետեւ Սպահանի քաղաքապետը բարեմաղթանքներ կատարեց եւ առողջութիւն ու երկար կեանք ցանկացաւ տարեցներին եւ նրանց նւիրեց «Մշակոյթի եւ իմացականութեան տուն» հաստատութեան կողմից պատրաստւած ծաղիկները:
Հայ Կանանց Գթութեան Միութեան վարչութեան կողմից ամանորեայ նւէրներ յանձնւեցին հիւրերին:
***
ՍՊԱՀԱՆԻ ՆԱՀԱՆԳԱՊԵՏԻ, ԻՍԼ. ՄՇԱԿՈՅԹԻ ԵՒ ԱՌԱՋՆՈՐԴՈՒԹԵԱՆ ԳԵՐԱՏԵՍՉՈՒԹԵԱՆ ԵՒ ՄՇԱԿՈՒԹԱՅԻՆ ԺԱՌԱՆԳՈՒԹԵԱՆ ԿԱԶՄԱԿԵՐՊՈՒԹԵԱՆ ՊԱՏԱՍԽԱՆԱՏՈՒՆԵՐԻ ԱՅՑ
Երկուշաբթի՝ 2016 թւականի յունւարի 4-ի յետմիջօրէի ժամը 4:00-ին, Սպահանի նահանգապետ դկտ. Զառգառփուռի գլխաւորած պատւիրակութիւնն այցելեց ազգային առաջնորդարան: Պատւիրակութեանը մաս էին կազմում Իսլամական Մշակոյթի եւ Առաջնորդութեան Սպահանի գերատեսչութեան ընդհանուր տնօրէն հոջ. այաթ. դկտ. Առզանին, Մշակութային Ժառանգութեան կազմակերպութեան ընդհանուր տնօրէն Ֆէրէյդուն Ալլահեառին եւ նրանց ենթակայ բաժինների պատասխանատու անձինք:
Թեմակալ առաջնորդի բարիգալստեան խօսքերից եւ շնորհակալութեան արտայայտութիւններից յետոյ, հերթաբար արտայայտւեցին նահանգապետ դկտ. Զառգառփուռը եւ հոջ. Առզանին՝ ամանորեայ եւ Ս. Ծննդեան տօների առթիւ իրենց շնորհաւորանքները փոխանցելով:
Սպահանի նահանգապետ դկտ. Զառգառփուռը գերշ. Սրբազան Հօրը փոխանցեց Իսլամական Մշակոյթի եւ Առաջնորդութեան նախարար Ալի Ջաննաթիի շնորհաւորական նամակը ուղղւած թեմակալ առաջնորդին եւ հայ համայնքին:
Առաջնորդ Սրբազան Հայրը շնորհակալութիւն յայտնեց պետական բոլոր մարմիններին ու կազմակերպութիւններին, որոնք Իրանի ամբողջականութեան, խաղաղութեան եւ ապահովութեան համար աշխատում են նւիրումով, ինչը պատճառ է դարձել, որ տարածաշրջանի մէջ Իրանը ներկայանայ իբրեւ հզօրագոյն եւ ամենաանդորր երկիր. պրն նահանգապետը երկրորդելով գերշ. Սրբազան Հօր խօսքը, յայտնեց, որ Իրանում ապրոց բոլոր ազգութիւնների եւ միաստւածեան կրօնների հետեւորդների միասնութիւնը, սրտակցութիւնը եւ համագոյակցութիւնն է պատճառը այդ իրականութեան:
Պրն Զառգեառփուռն ակնարկելով Իրանի Իսլ. Խորհրդարանի յառաջիկայ ընտրութիւններին, յոյս յայտնեց, որ ինչպէս միշտ այս անգամ եւս հայ համայնքն իր լիարժէք մասնակցութիւնն է բերելու այս կարեւոր գործին:
Իսլամական Մշակոյթի եւ Առաջնորդութեան Սպահանի գերատեսչութեան ընդհանուր տնօրէն հոջ. Առզանին եւս խօսելով առաքինութիւնների մասին եւ ակնարկելով մարդու մէջ գոյութիւն ունեցող մարդկային ոգուն եւ աստւածային հոգուն, իր համոզումը յայտնեց առ այն, որ միաստւածեան կրօնների հետեւորդների իրար շուրջ համախմբւելը, համակեցութիւնն ու միասնութիւնը ճիշտ այդ աստւածային հոգու ներկայութեան արգասիքն են, ինչը դարեր ի վեր գեղեցիկ արտայայտութիւն է գտել Սպահանում:
Հանդիպումից յետոյ, պատւիրակութիւնը, Առաջնորդ Սրբազան Հօր եւ առաջնորդարանի պատասխանատուների ընկերակցութեամբ այցելեց ազգային ծերանոց: Պատշաճ հիւրընկալութեան ընթացքում արտայայտւեց հոջ. Առզանին՝ շնորհաւորելով ծերանոցի աշխատակազմին եւ բնակիչներին տօնական օրերի կապակցութեամբ եւ երկար կեանք մաղթեց տարեցներին: Ծերանոցում ներկայ էին Բարեկեցութեան հիմնարկի պատասխանատուները, ովքեր Հայ Կանանց Գթութեան Միութեան վարչութեան նախագահ տկն. Արմինէ Սիմոնեանի բարիգալստեան խօսքից յետոյ արտայայտւելով՝ խօսեցին ծերանոցին կապւած Բարեկեցութեան հիմնարկի ներդրումների եւ ցուցաբերած օժանդակութիւնների մասին, միաժամանակ ազգային ծերանոցը ներկայացնելով իբրեւ լաւագոյնը Սպահանում:
Նահանգապետի միջոցով ծաղիկներ նւիրւեցին տարեցներին, իսկ Հայ Կանանց Գթութեան միութեան կողմից յուշանւէրներ յանձնւեցին պատւիրակութեան անդամներին:
