Կիրակի՝ դեկտեմբերի 20-ի երեկոյեան, Ն.Ջ. Հայ Մ.Մ. «Արարատ» միութեան սրահում, հանդիսաւոր միջոցառմամբ նշւեց Նոր Ջուղայի Հայ Կանանց Գթութեան միութեան հիմնադրման 100-ամեակը, որին հրաւիրւել եւ ներկայ էին՝ Սպահանի հայոց թեմի առաջնորդ Տ. Բաբգէն արք. Չարեանը, Լիբանանից հիւրաբար Սպահան այցելած Տ. Վարուժան արք. Հերկէլեանը, Շահինշահրի հայ համայնքի հոգեւոր տեսուչ Տ. Անանիա վրդ. Գուճանեանը, քահանայից դասը, ազգային վաստակաւոր գործիչ Ժորժիկ Աբրահամեանը, շրջանի Հայ Դատի յանձնախմբի, ազգային մարինների, դպրոցների եւ միութիւնների ներկայացուցիչները, յոբելեար միութեան անդամաուհիներն ու այլ հրաւիրեալներ:
Միջոցառումը բացւած յայտարարւեց երեկոյի հանդիսավար Արթին Մուրադեանի ողջոյնի եւ շնորհաւորական խօսքով, ապա արտայայտւեց Կանանց Գթութեան միութեան վարչութեան նախագահ Արմինէ Սիմոնեանը, որը կարեւորութեամբ ասաց. «1915 թւականին, Հայոց Ցեղասպանութեան ու հայրենազրկման մեր պատմութեան ամենաողբերգական իրադարձութիւններին դէմ յանդիման, անհրաժեշտ էր ամենուր տարագրւած հայ բեկորներին օգնութեան ձեռք հասցնել եւ նրանց չամոքւող ցաւին սպեղանի լինել, եւ այդ նպատակով հիմնադրւեց «Հայ Կանանց Կարմիր Խաչ» միութիւնը, որը յետագայում վերանւանւեց «Հայ Կանանց Գթութեան Միութիւն» եւ իր յանձնառու ու գիտակից անդամուհիներով, հաւատարիմ իր նպատակներին ու կոչմանը բարեսիրական հսկայական օժանդակութիւն ցուցաբերեց գաղթականութեանը»:
Նա իր խօսքի մի այլ բաժնում, հաւաստիացնելով, որ Կանանց Գթութեան միութեան անդամուհիներն իրենց ուխտը վերանորոգելով, կառչած են մնալու միութեան հիմնադրման սրբազան գաղափարին, ասաց. «Շարունակելու ենք հիմնադիրների գործունէութիւնը բարեսիրական ոլորտում՝ կարիքի մէջ գտնւող հայրենակիցներին նիւթա-բարոյական օժադնակութիւն ցուցաբերելով. շարունակելու ենք նրանց երթը հայկական մշակոյթի պահպանման ու տարածման ուղղութեամբ՝ հայոց ազգային դպրոցներին ու մարզա-մշակութային միութիւններին նեցուկ հանդիսանալով եւ վերջապէս շարունակելու ենք նրանց Սրբազան առաքելութիւնը հայրենապահպանման կապակցութեամբ՝ համահայկական ծրագրերին մեր աշխոյժ մասնակցութիւնն ապահովելով եւ հայրենիքի տարբեր բեկորներին օժանդակելով»:
Այնուհետեւ թեմակալ առաջնորդ Տ. Բաբգէն արք. Չարեանն ընթերցեց Ն.Ս.Օ.Տ.Տ Արամ Ա. Վեհափառ Հայրապետի օրհնութեան գիրը, իսկ Տ. Անանիա վրդ. Գուճանեանը՝ Տ. Բաբգէն արք. Չարեանի ուղերձը՝ ուղղւած միութեան 100-ամեակին:
Ապա երեկոյի կարկանդակը հատւեց առաջնորդ Սրբազան Հօր, շրջանի Հայ Դատի յանձնախմբի ներկայացուցիչ Աշոտ Դաւթեանի, միութեան վարչութեան նախագահ Արմինէ Սիմոնեանի եւ միութեան վաստակաւոր անդամուհիներ՝ Էմմիկ Վարդանեանի ու Մառիկ Մինասեանի միջոցով, որից յետոյ մինչեւ ներկաները վայելում էին հիւրասիրութիւնը, հանդիսավարն ընթերցեց՝ թեմի Պատգամաւորական ժողովի դիւանի, Կրօնական ու Թեմական խորհուրդների, շրջանի Հայ Դատի յանձնախմբի եւ Շահինշահրի հայ համայնքի հոգեւոր տեսուչ Տ. Անանիա վրդ. Գուճանեանի ու վարչութեան ուղերձներից հատւածներ: Յատկանշական է, որ Կանանց Գթութեան միութիւնը շնորհաւորական ուղերձներ է ստացել նաեւ Նոր Ջուղայի եւ Շահինշահրի հայոց ազգային դպրոցներից ու միութիւններից, որոնք ամբողջութեամբ տպագրւելու են 100-ամեակին նւիրւած գրքում:
Օրւայ բանախօս Սոնիկ Բաղումեանը, ով նաեւ յանձն է առել միութեան 100-ամեակի գրքի խմբագրման պարտականութիւնը, իր թեման սկսեց միութեան կողմից 15 մարտ 1915-ին հրապարակւած կոչին անդրադառնալով, որտեղ ժողովրդին կոչ էր արւել՝ Զատկական տօնին ընդառաջ գնալով օգնութեան ձեռք մեկնել պատերազմի դաշտում վիրաւորներին եւ նրանց թշւառ ընտանիքներին:
Բանախօսութեան շարունակութեան մէջ անդրադարձ եղաւ Հայ Կանանց Գթութեան միութեան գործունէութեանը՝ այն բաժանելով հետեւեալ չորս դիմագծերի.
Առաջին՝ Կանանց Գթութեան միութիւնը որպէս Հայ Յեղափոխական Դաշնակցութեան Իրանի կազմակերպական կառոյցի միաւոր.
Երկրորդ՝ Կանանց Գթութեան միութիւնը որպէս գերեզանցապէս կնոջական առաջադիմական միութիւն.
Երրորդ՝ միութեան մեծ դերակատարութիւնը հայեցի դաստիարակութեան եւ հայ մշակոյթի պահպանման ու տարածման եւ հայրենիքին նպաստելու բնագաւառներում.
Չորրորդ՝ միութեան բարեսիրական գործունէութիւնը, ինչպիսիք են եղել՝ հայ զինւորներին, որբուկներին եւ կարօտեալներին գութ եւ ջերմութիւն փոխանցելը եւ յատկապէս շրջանի միակ ծերանոցի հիմնադրումն ու շուրջ կէս դար խիստ հետեւողականութեամբ սոյն կառոյցի պահպանումը:
Բանախօսը կարգեւորութեամբ ընդգծեց, որ ճիշտ է տարբեր ժամանակներում օրւայ պահանջի եւ հրամայականի շեշտադրութեամբ են ծաւալւել միութեան աշխատանքները, սակայն բնագաւառների բազմաբնոյթ լինելով հանդերձ, գործունէութիւնը եղել է մէկ եւ միասնական գոյնով ու բնոյթով՝ ծառայել եւ գործել յանուն ժողովրդի, յանուն ազգի եւ հայրենիքի, ինչպէս սկզբում այնպէս էլ իր 100-ամեայ գոյութեան ընթացքում:
Տկն. Սոնիկն իր բանախօսական ելոյթն եզրափակելով՝ ասաց. «100 տարւայ ընթացքում Հ.Յ.Դ. Կանանց Կարմիր խաչով ծլարձակւած ու Կանանց Գթութեան միութեամբ հասակ առած ծառի իւրաքանչիւր օղակը ու հատիկ առ հատիկ ծաղկած, կանաչած ու դեղնած տերեւները, ամէն մէկը իւրովի աւելի են ամրացրել նրա արմատները, եւ այսօր սիրելի միութենականներ դուք էք դրա կենսունակութեան աղբիւրը: Յուսամ կանանց գթութեան միութեան մասին բոլորիս պատկերացումները մասամբ թարմացւեցին, եւ կարող ենք համարձակօրէն ասել, որ մեր յոբելեար միութիւնը հաւաքոյթներ ու ձեռարւեստի վաճառքներ կազմակերպող միութիւնից շատ աւելի խոր արմատներ ու գործառոյթ ունի, յատկապէս այսօր երբ մեր ժողովուրդը գտնւում է այնպիսի համաշխարհային ու տարածաշրջանային միջավայրում, որտեղ համայնքին ու հայրենիքի հզօրացմանը նպաստելը, իր երկու հայկական հանրապետութիւններին զօրավիգ կանգնելը ոչ թէ հեռակայ տեսլական է, այլ անմիջական նպատակային առաջադրանք ու թելադրանք»:
Ընթացքում օրւայ առթիւ մաղթանքներով հանդէս եկան ազգային-հասարակական վաստակաւոր գործիչ Ժորժ Աբրահամեանը, Լիբանանից ժամանած Տ. Վարուժան արք. Հերկէլեանը եւ Հայաստանի Աստւածաշնչական գրասենեակի պատասխանատու եւ Ս. Էջմիածնի Գէորգեան ճեմարանի դասախօս Արշաւիր Գաբուջեանը:
Օրւայ գեղարւեստական բաժինն իրենց անզուգական կատարումներով ապահովեցին մեներգչուհի Արսինէ Մարգարեանը, ընկերակցութեամբ դաշնակահար-երաժիշտ մայեստրօ Համիկ Ալէքսանդրեանի, Ն.Ջ. Հայ Մ.Մ. «Արարատ» Միութեան Մշակութային միաւորի «Կռունկ» պարախումբը եւ Հայաստանից ժամանած Ժողովրդական երգիչ նախագծի առաջին եթերաշրջանի յաղթող Սեւակ Ամրոյեանը:
Ծրագրի աւարտին ներկաներին իր հայրական օրհնանքը փոխանցեց առաջնորդ Սրբազան Հայրը, ով առաւել շեշտաւորելով Հայ Կանանց Գթութեան Միութեան գործուէութիւնը եւ ընդհանրապէս հայ կնոջ դերը Ցեղասպանութեան օրերին եւ սփիւռքեան պայմաններում, աւելացրեց. «Համայնքիս միակ ծերանոցը շուրջ մէկ դար է, որ վստահւել է այս միութեանը, որոնք ամենայն յանձնառութեամբ եւ հոգատարութեամբ ղեկավարում են այն: Մի վայր ուր բնակւում են մեր պապիկներն ու տատիկները: Եւ այս միութեան իւրաքանչիւր անդամուհի հոգ է տանում նրանց»: Վերջում Տ. Բաբգէն արք. Չարեանը շնորհաւորելով Հայ Կանանց Գթութեան Միութեան 100-ամեայ նւիրումն ու ծառայութիւնը յորդորեց՝ նոյն եռանդով եւ առանց շեղումի քայլել դէպի ապագայ:
Յատկանշական է, որ ծրագրի ընթացքում թեմակալ առաջնորդ Սրբազան Հօր առաջարկով տեղի ունեցաւ նւիրահաւաք, որտեղից գոյացած գումարը Կանանց Գթութեան Միութեան միջոցով ծառայեցւելու է հայրենանպաստ աշխատանքներին:
