Ուրբաթ՝ դեկտեմբերի 4-ի երեկոյեան, Նոր Ջուղայի Հայ Մ. Մ. «Արարատ» միութեան հանդիսութիւնների դահլիճում համախմբւել էին նախորդ շրջանների Կենտրոնական վարչութեան անդամները, ներկայում աշխատող միութենականներն ու հիւրեր՝ միասնաբար նշելու միութեան հիմնադրման եւ գործունէութեան 60-րդ տարեդարձը: Հանդիսութիւնը համագործակցութեամբ Միութեան Կենտրոնական վարչութեան կազմակերպել էր Միութեան 60-ամեակի Յոբելենական յանձնախումբը, որի անունից ողջոյնի եւ բարիգալստեան խօսքով հանդէս եկաւ Մանիա Ղուկասեանը, այնուհետեւ հակիրճ կերպով զեկուցեց Յոբելենական յանձնախմբի միջոցով իրականացւած միջոցառումների եւ յառաջիկայում կայանալիք ծրագրերի մասին: Միութեան Կենտրոնական վարչութեան խօսքն ընթերցեց Միգանուշ Տէր Մարտիրոսեանը, որում շնորհաւորանքի եւ Յոբելենական յանձնախմբին ուղղւած շնորհակալական խօսքերի կողքին, մասնաւորապէս նշւած էր հայապահպանման գաղափարախօսութեան այն կարեւոր կէտերը, որոնք առանցքային դեր եւ նշանակութիւն են ունեցել սփիւռքում միութիւններ հիմնադրելու ուղղութեամբ եւ այդ առումով ընդգծւած էր վեց տասնամեակների ընթացքում միութենականների անշահախնդիր համագործակցութեան շնորհիւ Նոր Ջուղայի Հայ Մ. Մ. «Արարատ» միութեան ծաւալած բեղուն գործունէութեան մասին:

Յուզիչ էր պահը, երբ երաժշտութեան եւ ճառագայթող լոյսերի ներքոյ ոտքի ելան ներկաներն ու ծափողջիւններով հետեւեցին յոբելեար միութեան 60-ամեակի տորթը կտրելուն, որի պատիւը տրւած էր միութեան Կենտրոնական վարչութեան նախագահ Մասիս Մինասեանին, Յոբելենական յանձնախմբի ներկայացուցիչ Վարդուշ Զարգարեանին եւ մարզա-մշակութային ասպարէզում վաստակաւոր միութենականներ Այլին Մելիքեանին ու Ռիմա Սիմոնեանին, որին միացան Կենտրոնական վարչութեան եւ Յանձնախմբի անձնակազմն ու միաւորների վարչակազմերը, որից յետոյ շնորհաւորական ելոյթներով հանդէս եկան միութեան միաւորների ու Շահինշահրի մասնաճիւղի ներկայացուցիչները: Ընթացքում խօսքը տրւեց նաեւ նախորդ շրջանների Կենտրոնական վարչութիւնների անդամներին եւ միութենականներին: Երեկոյթի երգ-երաժշտութիւնը ապահովեցին «Անի» խումբը եւ անհատ կատարողներ:

Ն.Ջ. Հայ Մ.Մ. «Արարատ» միութեան թղթակից

Երանուշ Թահմազեան

Լուսանկարները՝ Գեւիկ Խաչատրեանի