2015 թւականի նոյեմբերի 19-ին, Ն. Ջ. Հայ Մ. Մ. «Արարատ» միութեան սրահում, Հ.Յ.Դ. «Ռուբէն» երիտասարդական միութեան նախաձեռնութեամբ, բանախօսական-գեղարւեստական երեկոյ իրականացւեց՝ միութեան հիմնադրման 35-ամեակին նւիրւած, որտեղ ներկայ էին Սպահանի Հայոց Թեմի Առաջնորդ Տէր Բաբգէն արք. Չարեանը, Շահինշահրի հայ համայնքի հոգեւոր տեսուչ Տէր Անանիա վրդ. Գուճանեանը, քահանայից դասը, ազգային մարմինների, միութիւնների եւ հայոց դպրոցների ներկայացուցիչներ, գաղափարակից ընկերներ եւ ժողովուրդ:

Ծրագիրն սկիզբ առաւ Հ.Յ.Դ. քայլերգ «Մշակ Բանւոր»-ի յոտնկայս ունկնդրութեամբ, որը կատարեցին ՌԵՄ-ի անդամ-ուհիները, ապա բացման խօսքով հանդէս եկաւ երեկոյի հանդիսավար Կարէն Խանլարեանը, ով անդրադառնալով միութեան հիմնադրմանը, նշեց. «35 տարիներ առաջ ընդվզելով հայրենիքի եւ սփիւռքի հայ ժողովրդին սպառնացող մարտահրաւէրների դէմ, ծնունդ առաւ «Ռուբէն» երիտասարդական միութիւնը, որը սփիւռքեան անհաւասար պայքարում արդէն կեանքի կոչւած եւ գործող իւրօրինակ միութիւնների պէս ստանձնելով իր կենսական դերը եւ առաքելութիւնը, պայքար մղեց գլխաւորապէս երկու զուգահեռ ճակատներում, հայապահպանման-հայակերտման եւ Հայ Դատի յետապնդման ուղղութեամբ»:

Հանդիսավարի արտայայտութիւններին յաջորդեց յոբելեար միութեան վարչութեան խօսքը, որն ընթերցւեց Արմօ Մինասեանի միոջցով: Խօսքում անդրադառնալով Հ.Յ.Դաշնակցութեան երիտասարդ հիմնադիրներին, կարեւորութեամբ ասւած էր. «Իզուր չէ, որ նման երիտասարդներին յենւած մի կուսակցութիւն գոյատեւում է 125-տարի, Հ.Յ.Դ.-ը երիտասարդ արիւնից ծնւած եւ հէնց այդ երիտասարդների արիւնով գոյատեւած մի կուսակցութիւն է»: Վարչութեան ներկայացուցիչն իր արտայայտութեան շարունակութեան մէջ ակնարկ ունենալով 1980 թւականին Նոր Ջուղայում հիմնադրւած Հ.Յ.Դ. «Ռուբէն» երիտասարդական միութեանը, նշեց, որ սոյն միութիւնն անւանակոչւել է յեղափոխական-քաղաքական գործիչ Ռուբէն Տէր Մինասեանի անունով, նպատակ ունենալով՝ դաստիարակելու՝ ազգասէր, կիրթ եւ Հայ Դատի խնդրի լուծման ուղղութեամբ պայքարող երիտասարդներ: 

Երեկոյի ընթացքում ՌԵՄ-ի հիմնադրման եւ գործունէութեան շրջագծում տեղի ունեցան երեք առանձին թեմաներով բանախօսական ելոյթներ: Բանախօսութիւններն ընթացան հետաքրքիր եւ հաճելի զրոյցի ներքոյ, քանի որ իւրաքանչիւր բանախօս իր ելոյթը ծաւալեց հանդիսավարի հարցումներին պատասխանելով: 

Առաջին բանախօսութեան թեման էր «Հ.Յ.Դ. «Ռուբէն» երիտասարդական միութեան հիմնադրումը», որը ներկայացրեց Նոէլ Մինասեանը: Նա անդրադառնալով երիտասարդական միութիւնների հիմնադրման անհրաժեշտութեանը, նշեց, որ Հ.Յ.Դ.-ի համար, իր հերոսական պատմութեան բոլոր հանգրւաններում, երիտասարդութիւնը եւ երիտասարդական միաւորները մեծագոյն արժէքներ են եղել, կուսակցութեան առաջնորդող ուժը, յեղափոխական նկարագրի առանցքը եւ ոգին: 

Շարունակութեան մէջ Նոէլ Մինասեանը խօսեց Հ.Յ.Դ. երիտ-պատանեկան միութիւնների հիմնադրման գաղափարի առաջացման եւ հասունացման մասին, որոնց ժամանակին նպաստել են կարեւոր այլ գործօններ, ինչպիսիք են՝ միջազգային քաղաքական կացութիւնը, երիտասարդական շարժումներն ու ազատագրական պայքարները: Բանախօսը յատուկ անդրադարձ ունեցաւ Հ.Յ.Դաշնակցութեան 20-րդ Ընդհանուր ժողովին, որտեղ որոշւել էր կազմակերպական բոլոր շրջաններում անյապաղ հիմնադրել երիտասարդական միութիւններ եւ սոյն որոշման լոյսի ներքոյ հերթաբար 1979 թ. Թեհրանում եւ 1980 թ. Նոր Ջուղայում հիմնադրւած ՀՅԴ «Ռոստոմ» եւ «Ռուբէն» երիտասարդական միութիւններին, որոնք ծաւալուն աշխատանքներ իրագործելով գաղափարական եւ դաստիարակչական ոլորտներում, նոր թափ եւ որակ հաղորդեցին կազմակերպական կեանքին: 

Այնուհետեւ երկրորդ բանախօս Վարուժ Մովսիսեանն անդրադարձաւ «Երիտասարդութիւնը եւ զինեալ պայքարը» թեմային, որտեղ խորհրդանշական  համարեց ՌԵՄ-ի 35-ամեակի եւ Զինեալ պայքարի 40-ամեայ յոբելեանների համընկման փաստը: Նա սկզբում մէջբերեց Հ.Յ.Դ. հիմանդիրներից Քրիստափոր Միքայէլեանի գաղափարը՝ ցուցական աշխատանքներին եւ զինատար խմբերին ու բախումներին ուղղւած, որտեղ ասւում է. «Սրանք գալիս են կազմակերպելու կռւող ուժերը, ժողովրդականցնելու բողոքի ճանապարհը, կրթելու ժամանակակից նոր սերունդը, վառ պահելու ժողովրդի դիմադրական տրամադրութիւնը, հարւածելու թշնամու հեղինակութեանը (ներքին թէ արտաքին) եւ զբաղեցնելու հասարակական եւ հանրային կարծիքը...»: Վարուժ Մովսիսեանն իր խօսքի երկրորդ բաժնում ակնարկելով 1980-ականների ընթացքում Իրանի քաղաքական մթնոլորտին, որը երիտասարդներին մղում էր լայն ու եռանդուն աշխատանքների, կարեւորութեամբ թւարկեց նշւած ժամանակահատւածում ՌԵՄ-ի իրագործած աշխատանքները, ինչպիսին էին՝ համահաւաքները, բանավէճերը, հացադուլները, միթինգները, բողոքի ցոյցերը եւ դասախօսութիւնները: Բանախօսն իր ելոյթն աւելի տպաւորիչ դարձրեց այդ աշխատանքների շրջագծում մի քանի յուշեր պատմելով:

Օրւայ յաջորդ բանախօս Վահէ Թորոսեանն խօսեց Հ.Յ.Դ. երիտասարդական միութիւնների հիմնադրման նպատակների եւ Զինեալ պայքարից յետոյ վերջին 25 տարիների ընթացքում «Ռուբէն» երիտասարդական միութեան գործունէութեան մասին: Նա կարեւորութեամբ ընդգծեց, որ երիտասարդական միութիւնները իւրայատուկ դպրոց են, որտեղ դաստիարակւում են ազգային մտածողութեամբ, արդարութեանը հաւատող, ընկերվարական ու ժողովրդավարական արժէքներին դաւանող եւ անհրաժեշտութեան պարագային յեղափոխական պայքարից չխուսափող ու չվարանաող երիտասարդներ: 

Վահէ Թորոսեանն իր խօսքի երկրորդ բաժնում անդրադարձաւ յատկապէս ՌԵՄ-ի կատարած կարեւորագոյն աշխատանքներին, ինչպիսիք են՝ Իրանում առաջին անգամւայ համար Ջաւախքին նւիրւած ձեռնարկի եւ Թելեթոն նւիրհաւաքի կազմակերպումը, բողոքի համահաւաքներն ու ցոյցերը, «Դէպի երկիր» պաշտօնաթերթի տպագրումը եւ Հայոց Ցեղասպանութեան իրողութիւնը պարսիկ հայրենակիցներին ճանաչեցնելու նպատակով իրագործւած աշխատանքները:

Բանախօսական բաժինները մէջբերւեցին միութեան անդամների հայրենասիրական եւ յեղափոխական երգերի ու բանաստեղծութիւնների գեղարւեստական կատարումներով, որտեղ «Արփա» նւագախմբի ընկերակցութեամբ մեներգերով հանդէս եկան՝ Վանա Շիրւանեանը՝ «Մարտիկի երգը» եւ «Առաքել Մուշեղ», Թենի Մկրտչեանը «Հայ կամաւորներ» եւ Վեհանուշ Խուդաբախշեանը՝ «Վեր կաց ժողովուրդ» երգերով, իսկ Վեհանուշ Խուդաբախշեանը ասմունքեց «Պարտք» բանաստեղծութիւնը:  

Ծրագրի փակումը կատարւեց «Արիւնոտ Դրօշ» երգով՝ Թանգիկ Միրզախանեանի, Վանա Շիրւանեանի, Թենի Մկրտչեանի եւ Վեհանուշ Խուդաբախշեանի կատարմամբ:

Յատկանշական է, որ ՌԵՄ-ի պաշտօնաթերթ «Դէպի Երկիր»-ը տարիների դադարից յետոյ վերահրատարակւել էր ՌԵՄ-ի 35-ամեակի առիթով, որը բաժանւեց ներկաների միջեւ: 

Միջոցառման աւարտին տեղի ունեցաւ հիւրասիրութիւն:

«Ալիք» օրաթերթի թղթակից (Նոր Ջուղա)

Լուսանկարիչ՝ Գեւիկ Խաչատրեան