Հայ Ժողովրդից ծնունդ առած եւ յանուն հայ ժողովրդի ու հայրենիքի ընդհանրական շահերի իր լաւագոյնը զոհաբերած կուսակցութեան՝ Հայ Յեղափոխական Դաշնակցութեան հիմնադրման 125-ամեակի առթիւ, հինգշաբթի՝ նոյեմբերի 12-ի երեկոյեան ժամը 7:30-ին, Նոր Ջուղայի Հայ Մ. Մ. «Արարատ» միութեան սրահում, նախաձեռնութեամբ շրջանի Հայ Դատի «Արձագանք» քարոզչական յանձնախմբի, տեղի ունեցաւ տօնախմբութիւն, որին ներկայ էին Սպահանի հայոց թեմի առաջնորդ Տ. Բաբգէն Ս. արք. Չարեանը, Շահինշահրի հայ համայնքի հոգեւոր տեսուչ Տ. Անանիա վրդ. Գուճանեանը, թեմի հոգեւորականաց դասը, շրջանի Հայ Դատի յանձնախմբի անդամները, ազգային-հասարակական վաստակաւոր գործիչ Ժորժիկ Աբրահամեանը, ազգային մարմինների, միութիւնների եւ հայոց ազգային դպրոցների ներկայացուցիչներ, գաղափարակից ընկերներ եւ հոծ ժողովուրդ:
Ծրագիրն սկիզբ առաւ 125-ամեայ կուսակցութեան քայլերգ «Մշակ Բանւոր»-ի յոտնկայս ունկնդրութեամբ, որից յետոյ բացման խօսքով ելոյթ ունեցաւ երեկոյի հանդիսավար Մանիա Ղուկասեանը: Բացման խօսքում անդրադարձ էր կատարւել Դաշնակցութեան ծնունդին, գաղափարին, ինչու չէ նաեւ մէկ դար ու քառորդ ծաւալած լայն գործունէութեանը՝ հայրենապահպանման, հայապահպանման եւ Հայ Դատի հետապնդման ուղղութեամբ: Խօսքում կարեւորութեամբ ասւած էր. «Դաշնակցութեան գոյութեան պատճառը Հայաստանն է ու հայ ժողովուրդը, նրա սրբութեան սրբոցը՝ Հայաստանի անվտանգութիւնն ու զարգացումը, իսկ դա ապահովելու միակ գրաւականը՝ հայոց անկախ պետականութիւնը: Այսօր մեզ կրկին որակական ոստիւն ու թռիչք է պէտք՝ հայրենիքում արդարութիւնը, ժողովրդավարութիւնը եւ ազգային հզօր կազմակերպւածութիւնը ապահովելու, պետական համակարգը բարեփոխելու, իսկ միջազգային ու տարածաշրջանային ամենաբարդ կացութիւններում յայտնւած սփիւռքը վերակազմակերպելու, եւ յատկապէս միեւնոյն նպատակի ու գերխնդրի շուրջ համախմբւելու համար»:
Այնուհետեւ ցուցադրւեց «Երկիր Մեդիա» հեռուստաընկերութեան միջոցով պատրաստւած տեսանիւթը՝ Հ.Յ.Դ. ծննդեան 125-ամեակին նւիրւած, որից յետոյ բեմ հրաւիրւեց ազգային-հասարակական վաստակաւոր գործիչ Ժորժիկ Աբրահամեանը՝ օրւայ առթիւ բանախօսելու: Նա իր խօսքի սկզբնական բաժնում նշեց, որ Դաշնակցութեան մասին մտածելիս եւ նրա պատմութիւնն ընթերցելիս ունենում է երախտիքի եւ հպարտութեամբ համեմւած արժանապատւութեան խորը զգացումները:
Ժորժիկ Աբրահամեանը կարեւորութեամբ ընդգծելով, որ Դաշնակցութեան սկզբունքային ուղղութիւնների համաձայն՝ կուսակցութեան շարքեր մուտք գործողն առաջնորդւում է իր խղճով ու կամքով, հակիրճ ակնարկ ունեցաւ կուսակցութեան 125-ամեայ գործունէութեանը եւ ասաց. «Ի սկզբանէ Դաշնակցութիւնն աշխատեց՝ որպէս ազգային ազատագրական պայքարի կազմակերպութիւն եւ երբեք չկորցրեց սեփական ժողովրդին ազատագրելու իր յատկութիւնը… Յետագայում, հայոց պետականութեան հիմնադրման ժամանակաշրջանում, չկորցնելով իր անմնացորդ ծառայութեան նկարագիրը՝ անցաւ քաղաքական աշխատանքի, եւ երբ հայութիւնը կրկին սփռւեց աշխարհում, այս անգամ նոյն կազմակերպութիւնը լծւեց հայապահպանման գործին: Այսօր բոլորը միաբերան խոստովանում են Սփիւռքում Դաշնակցութեան կատարած գործունէութեան մասին՝ հային հայ պահելու եւ հայութեանն անմնացորդ ծառայելու ուղղութեամբ: Իսկ երբ հնչեց Արցախի ինքնապաշտպանութեան մարտի ահազանգը, Դաշնակցութիւնը նոյն ազատագրական պայքարի հզօրութեամբ նետւեց պատերազմի դաշտ»:
Բանախօսն իր խօսքի երկրորդ բաժնում թւարկեց անցնող մէկ տարւայ ընթացքում կուսակցական կարեւոր աշխատանքները, ինչու չէ նաեւ համահայկական այն ծրագրերը, որոնց Դաշնակցութիւնն իր ուղղակի մասնակցութիւնն ու ներդրումն է ունեցել, ինչպիսիք են՝ Սփիւռքի եւ Հայաստանի համախմբւելը՝ Հայոց Ցեղասպանութեան 100-րդ տարելիցի համահայկական հռչակագրի ձեւակերպման շուրջ, Հայոց Ցեղասպանութեան 100-ամեակի շրջագծում կազմակերպւած աշխատանքների յաջողութիւնը, որոնց իր ամբողջ կառոյցով օժանդակել է Դաշնակցութիւնը, կուսակցութեան Ընդհանուր ժողովի գումարումը, ինչից կազմակերպութիւնը դուրս եկաւ միահամուռ եւ որպէս նոր ուխտաւոր, եւ վերջապէս ՀՀ սահմանադրութեան բարեփոխումների նախագիծը եւ այս շրջագծում կայանալիք հանրաքւէն, որի ակունքներում կրկին կանգնած է Դաշնակցութիւնը:
Բանախօսական ելոյթին յաջորդեցին աշուղական, հայրենասիրական եւ յեղափոխական երգերի կենդանի կատարումները՝ Հայաստանից ժամանած «Ժողովրդական երգիչ» նախագծի առաջին եթերաշրջանի յաղթող Սեւակ Ամրոյեանի միջոցով, իսկ երեկոն իսկական տօնի վերածւեց, երբ յեղափոխական երգերի կատարման ընթացքում, հանդիսատեսը միաբերան ընկերակցեց երգչին:
Ձեռնարկի աւարտին Արցախի ազգային վիճակախաղի 2014 թւականի Թեմիս յաղթողներին յանձնւեցին պատկան վկայագրերը՝ ձեռամբ Սպահանի հայոց թեմի առաջնորդ Տ. Բաբգէն Ս. արք. Չարեանի եւ սոյն վիճակախաղի տոմսերի վաճառման գործը շրջանումս կազմակերպող յանձնախմբի անդամներ՝ Ադրինէ Խաչատրեանի ու Արմինէ Ղարախանեանի: Յատկանշական է, որ Արցախի ազգային ամենամեայ վիճակախաղի շրջագծում, 2014 թւակնին Նոր Ջուղայից Արթուր Բաղրամեանը եւ Շիրազից Միրօ Մանուկեանը շահել էին հայկական նախշերով գորգեր:
