Նոր Ջուղայի հայոց ազգային «Քանանեան» միջնակարգ աղջկանց դպրոցի տնօրինութեան նախաձեռնութեամբ, ընտանիք-դպրոց փոխյարաբերութեան զարգացման շրջագծում, չորեքշաբթի՝ հոկտեմբերի 28-ի առաւօտեան ժամը 11:00-ին, հայոց ազգ. կրթահամալիրի «Ալենուշ Տէրեան» դահլիճում, կազմակերպւել էր 2015-2016 ուսումնական տարեշրջանի առաջին ծնողական հոգեւոր լսարանը, ուր ծնողների եւ ուսուցիչների ներկայութեամբ «Աստւածաշնչի կարեւորութիւնը եւ դերը հայ ընտանիքներում» թեմայի շուրջ բանախօսական ելոյթ ծաւալեց Սպահանի հայոց թեմի առաջնորդ գերշ. Տ. Բաբգէն արք. Չարեանը:
Սկզբում դպրոցի փոխտեսչուհի Ռիմա Սիմոնեանը ողջունելով ներկաներին՝ շնորհակալական խօսք ուղղեց առաջնորդ Սրբազան Հօրը դպրոցի հրաւէրին ընդառաջելու կապակցութեամբ: Տկն. Սիմոնեանն իր խօսքի շարունակութեան մէջ ընդգծելով, որ ազգային վարժարանները ազգային դաստիարակութեան կողքին մեծ կարեւորութիւն են տալիս յատկապէս կրօնական եւ հոգեւոր դաստիարակութեանը, անդրադարձաւ այս շրջագծում դպրոցի կողմից ծրագրւած միջոցառումներին:
Այնուհետեւ տեսչուհի տկն. Սալառիֆառը նոյնպէս ողջոյնի խօսք ասելով գերշ. Տ. Բաբգէն արք. Չարեանին եւ միւս ներկաներին՝ Սրբազան Հօրը հրաւիրեց բանախօսելու թեմայի կապակցութեամբ:
Թեմակալ առաջնորդ Սրբազան Հայրն օրինակներով ու առակներով ողողւած, դիւրըմբռնելի եւ պատկերաւոր իր ելոյթի սկզբում շեշտելով, որ միայն Աստւածաշունչ ունենալը բաւարար չէ եւ հարկաւոր է ճանաչել ու ապրել Սուրբ Գիրքը, ասաց. «Պատմութեան ընթացքում Աստւածաշունչն իր խորը դրոշմն է ունեցել մարդկային մտածողութեան եւ մշակութային զարգացման գործում: Քրիստոնեայ մարդու համար Աստւածաշունչը աստւածային յայտնութիւն է եւ սրբազան արժէք»:
Գերշ. Տ. Բաբգէն արք. Չարեանն իր խօսքի շարունակութեան մէջ Աստւածաշնչի ուղղափառ, ճշգրիտ եւ ամբողջական ճանաչումը անհրաժեշտութիւն համարեց եւ աւելացրեց. «Այսօր Հայաստանում տարբեր աղանդական շարժումներ կան, որոնք ժողովրդին շեղում են իրենց իսկական եւ ճշգրիտ հաւատից: Պէտք է զգուշանալ նման շարժումներից, սակայն պէտք չէ պայքարել նրանց դէմ, այլ նրանց դիմաց պէտք է զինւել՝ հաւատի վրայ հաստատ մնալով եւ Աստւածաշունչը լաւապէս ճանաչելով ու հաւատի աչքով հասկանալով»:
Նա նշելով նաեւ Աստւածաշնչի դերը հայ ընտանիքների կեանքում, շեշտեց, որ այդ դերը յատկապէս աւելի գունեղ դարձաւ «Ոսկեդար»-ում, Աստւածաշնչի թարգմանութիւնից յետոյ, քանի որ այդ սքանչելի թարգմանութեան շնորհիւ Աստծու խօսքն աւելի ըմբռնելի եւ հասկանալի դարձաւ հայ ժողովրդի համար:
Թեմակալ առաջնորդն իր ելոյթի մի այլ բաժնում նկատելով, որ այսօրւայ աշխարհում բարոյականութեան անկման հիմնական պատճառը հոգեւոր արժէքներից եւ սրբութիւններից հեռանալն ու նիւթականի գերի դառնալն է, աւելացրեց՝ մարդ որքան Աստծու ներկայութիւնը զգալի դարձնի իր կեանքում, այնքան աւելի հեռու կը մնայ չարութիւնից:
Վերջում բանախօսն Աստւածաշնչում ընտանիքի թեմային անդրադարձող հատւածների մէջբերմամբ՝ մատնանշեց այն կարեւոր տեղը, որը Սուրբ Գրքում տրւել է ընտանիքի սրբութեանը եւ զաւակների դաստիարակութեանը, ապա իր խօսքը եզարափակեց ներկաներին յորդորելով՝ Աստւածաշունչը դարձնել իրենց կեանքի ուղեցոյցը եւ Աստւածաշնչով հարստանալ, լուսաւորել իրենց կեանքն ու բիւրեղացնել քրիստոնէական առաքինութիւնները:
