Չորեքշաբթի՝ հոկտեմբերի 28-ի երեկոյեան ժամը 7–ին, Փերիոյ կրթասիրաց միութեան կենտ. վարչութեան նախաձեռնութեամբ, նոյն միութեան կենտրոնատեղիում տեղի ունեցաւ Հայ մշակոյթի օրւան նւիրւած միջոցառում, որին ներկայ էին Փերիոյ կրթ. միութեան Շահինշահրի ու Հայ ուս. «Չհարմահալ» միութեան Նոր Ջուղայի մասնաճիւղերի վարչութիւնների ներկայացուցիչները, Փերիոյ կրթ. միութեան անդամներն ու հրաւիրեալներ:

Ծրագրի սկզբում Ռիմա Զաքէոսեանը Փերիոյ կրթ. միութեան կենտ. վարչութեան անունից ողջոյնի խօսք ուղղեց ներկաներին, ապա նշելով, որ երեկոյի գեղարւեստական բաժնի պատասխանատուն է Զարենուշ Աղուրեանը, աւելացրեց, թէ տէր եւ տկն. Ժոզեֆ եւ Զարենուշ Գրիգորեանները, ջանք ու եռանդ չխնայելով, միշտ սատար են հանդիսացել միութեանն իր աշխատանքների կազմակերպման գործում:

Այնուհետեւ օրւայ հանդիսավար Զարենուշ Աղուրեանն իր խօսքում ներկայացրեց Հայ մշակոյթի պատմութիւնը, իւրայատուկ ակնարկ ունենալով հայկական խաչքարերին, իսկ անդրադառնալով ոսկեդարին՝ ներկայացրեց նաեւ Ս. Մեսրոպ Մաշտոցի կենսագրութիւնը եւ հայ գրերի ստեղծման ընթացքը:

Ձեռնարկի շարունակութեան մէջ իրականացւեց գեղարւեստական ծրագիր, ուր Հայոց լեզւին նւիրւած բանաստեղծութիւնների ասմունքներով հանդէս եկան՝ Սոնիա Դիլանչեանը, Վերգինէ Համբարձումեանը եւ Արգին Յովսէփեանը, իսկ Ժաքլին Պօղոսեանն ու Զարենուշ Աղուրեանը հանդէս եկան երգերի մենակատարմամբ՝ Արին Խաչիկեանի երգեհոնի նւագակցութեամբ:

Յաջորդիւ բեմ հրաւիրւեցին ու գնահատւեցին երեկոյի կազմակերպման գործում բոլոր դերակատար անհատները, իսկ կենտ. վաչութեան անունից յատուկ շնորհակալագիր յանձնւեց տէր եւ տկն. Արարատ եւ Ժաքլին Քեշիշեաններին, ովքեր իրենց նիւթա-բարոյական օժանդակութիւններով միշտ սատար են հանդիսացել միութեանը:

Ծրագրի աւարտին Փերիոյ կրթ. միութեան կենտ. վարչութեան նախագահ Հայկ Հայրապետեանը կենտ. վարչութեան անունից շնորհակալական խօսք ուղղեց ներկաներին ու մասնակիցներին: Նա իր խօսքերում անդրադարձ ունենալով յատկապէս հայ մշակոյթին՝ կարեւորութեամբ ընդգծեց, որ հայ ազգն ունի այնպիսի մշակոյթ, որը վեր է կանգնած բոլոր թագաւորութիւններից եւ դա մեր գրերի, գրքերի եւ ճարտարապետութեան անվերջանալի հարստութիւնն ու թագաւորութիւնն է:

Վերջում տեղի ունեցաւ համեստ հիւրասիրութիւն: