Երկուշաբթի՝ հոկտեմբերի 19-ի երեկոյեան ժամը 5:30-ին, հոգեւորականաց դասի եւ երգեցիկ խմբի կազմած թափորի ուղեկցութեամբ, Ս. Ամենափրկչեան վանքի «Ս. Յովսէփ Արեմաթացի» եկեղեցի մուտք գործեց Սպահանի հայոց թեմի առաջնորդ Տ. Բաբգէն արք. Չարեանը, որտեղ թեմի ազգային մարմինների անդամների ու հաւատացեալ ժողովդրի ներկայութեամբ, թեմակալ առաջնորդի միջոցով եպիսկոպոսական հանդիսաւոր սուրբ պատարագ մատուցւեց՝ նշւած եկեղեցու անւանակոչութեան տօնի առթիւ, որը միեւնոյն ժամանակ տօնն է նաեւ Ս. Ա. վանքի:
Հոգեպարար պատարագին մասնակցում էին նաեւ Շահինշահրի հայ համայնքի հոգեւոր տեսուչ Տ. Անանիա վրդ. Գուճանեանը եւ քահանայից ու դպրաց դասերը, իսկ շարականների երգեցողութեամբ հանդէս եկաւ Ս. Ա. վանքի «Կոմիտաս» երգչախումբը՝ ղեկավարութեամբ խմբավար Արմէն Ամիրխանեանի:
Արարողութեան ընթացքում պատարագիչ Սրբազան Հայրն իր հայրական պատգամն ուղղեց ներկայ ժողովրդին՝ բնաբան ունենալով Պօղոս առաքեալի խօսքը, որտեղ նա հոգեւոր թմրութեան եւ քնի պատճառն է նկատում մեղքը: Այնուհետեւ թեմակալ առաջնորդը նշեց, որ մարդը հոգեւոր թմրութեան է մատնւում երկու պատճառներով՝ արտաքին՝ միջավայրի եւ պայմանների, իսկ ներքին՝ իր սրտի ու մտքի ազդեցութեան տակ գտնւելով եւ աւելացրեց. «Աստւած մարդուն մրափի մատնւած չի թողնում: Աստւած ուզում է, որ բոլորը փրկւեն եւ ճշմարտութեան հասնեն: Տէրը մարդու նկատմամբ ունեցած իր անհուն սիրոյ պատճառով՝ տարբեր միջոցներով արթնացնում է մեզ»:
Պատարագիչ Հայրը մի այլ տեղ շարունակեց. «Աշխարհն այսօր հոգեւոր վերազարթօնքի կարիք ունի, որպէսզի ամենուրէք խաղաղութիւն եւ սէր տիրի, Աստւած ներկայ լինի ամէն մարդու կեանքում, մարդն իր նմանի մէջ տեսնի Աստծոյ պատկերը եւ յոյսով լցւած իր կեանքն ապրի»:
Սրբազան Հայրն իր խօսքի երկրորդ բաժնում անդրադառնալով արտագաղթին եւ այդ երեւոյթի բացասական կողմերին, ինչու չէ նաեւ նշելով Հայաստանից տեղի ունեցող արտագաղթը, կոչ արեց՝ արթնանալ եւ տեսնել իրականութիւնը, չակերտեալ ազատութեան համար նման քայլի չդիմել եւ մայր հողի վրայ ապրելով ու հոգեւոր հարստութիւններով ու արժէքներով շրջապատւելով, անարատ եւ առողջ կեանք ապրել՝ Աստծոյ ներկայութեամբ ու օրհնութեամբ: Սրբազան Հայրը վերջում շնորհաւորելով տօնի առթիւ՝ ներկաներին յորդորեց՝ վերանորոգել քրիստոնէական ուխտը եւ հոգեւոր վերածնունդ ապրել՝ համայնքն ամրացնելու, մեր կեանքը կազմակերպելու ու աշխուժացնելու համար:
Յաւարտ ս. պատարագի թեմակալ առաջնորդի նախագահութեամբ եւ հոգեւորականաց դասի մասնակցութեամբ, եկեղեցու խորանի վրայ, Ս. Յովսէփ Արեմաթացու աջ-մասունքով կատարւեց Ջրօրհնէքի կարգը, որից յետոյ հաւատացեալ ժողովրդն օրհնւած ջուրն առնելով դուրս եկաւ եկեղեցուց:
Այնուհետեւ վանքի բակում՝ զանգակատան կողքին, ուր կան բարերարների եւ հոգեւորականների շիրմաքարեր, կատարւեց հոգեհանգստեան արարողութիւն՝ վանքում ծառայած եկեղեցական ու աշխարահական սպասաւորների եւ բարերարների հոգիների խաղաղութեան համար:
Տօնն աւարտւեց հիւրասիրութեամբ:
«Ալիք» օրաթերթի թղթակից (Նոր Ջուղա)
Լուսանկարիչ՝ Գեւիկ Խաչատրեան
