Նախաձեռնութեամբ Փերիոյ կրթասիրաց միութեան Շահինշահրի մասնաճիւղի վարչութեան, 2015 թւականի հոկտեմբերի 8-ի երեկոյեան ժամը 7։00-ին, «Սրբոց Վարդանանց» դպրոցի սրահում կազմակերպւել էր մեդալաբաշխման եւ գնահատման երեկոյ՝ 46 եւ 47-րդ Համահայկական խաղերին մասնակցած մարզիկ-ուհիների պատւին: Ծրագրին ներկայ էին համայնքի հոգեւոր տեսուչ հոգշ. Տ. Անանիա վրդ. Գուճանեանը, Փերիոյ կրթասիրաց միութեան կենտրոնական եւ մասնաճիւղի վարչութիւնների անդամները, Համայնքի վարչութեան ներկայացուցիչները, մարզիկ-ուհիները եւ ծնողները:
Բարիգալստաեան խօսքով ներկաներին ողջունեց միութեան անդամ տկն. Գայիանէ Վարդանեանը, որը հրաւիրեց մասնաճիւղի նախագահ պրն. Ջանիկ Թահմազեանին օրւայ առիթով արտայայտւելու: Վերջինս եւս ողջունելով բոլորին՝ ամփոփ զեկոյց ներկայացրեց 46 եւ 47-րդ համահայկական խաղերի ընթացքում մասնաճիւղի մարզական միաւորի արձանագրած յաջողութիւնների մասին: Ապա մաղթելով նորանոր ձեռքբերումներ՝ յոյս յայտնեց, որ յաջորդ մրցախաղերում անշուշտ աւելի կազմակերպւած ու ծրագրւած պիտի մասնակցեն: Ըստ պրն. Թահմազեանի փոխանցած զեկոյցի, այս շրջանին մասնաճիւղից 17 մարզիկ-ուհի իրենց մասնակցութիւնն են ցուցաբերել շախմատի, թեթեւ ատլետի, հեռացատկի եւ գնդի հրում մարզաձեւերին եւ արձանագրել որոշակի յաջողութիւններ: Նա մասնաճիւղի անունից շնորհակալութիւն յայտնեց Սպահանի հայոց թեմի թեմական խորհրդին եւ կենտրոնական վարչութեանը՝ մասնաճիւղին նիւթապէս եւ բարոյապէս միշտ զօրավիգ հանդիսանալու համար:
Երեկոյի ընթացքում հնչող բարեմաղթանքներին միացան Փերիոյ կրթասիրաց միութեան կենտրոնական վարչութեան նախագահ՝ պրն.Հայկ Հայրապետեանը եւ համայնքի Վարչութեան անդամ պրն. Ռազմիկ Մարկոսեանը, որոնք գնահատելով մասնաճիւղի արձանագրած յաջողութիւնները, նոր վերելքներ մաղթեցին միութենականներին:
Այնուհետեւ հոգշ. Հայր Սուրբի ձեռամբ իրենց մեդալները եւ վկայագրերը ստացան մարզիկ-ուհիներ Թէոդիկ Մանուկեանը, Վաչէ Քեշիշեանը, Արւին Մինասքանեանը, Դերիկ Թահմազեանը, Սոնա Մնացականեանը, Անի Մնացականեանը, Սերինէ Աղախանեանը, Հելգա Քեշիշեանը, Մելանիա Թորոսեանը, Ադանա Այվազեանը, Արայիկ Թահմազեանը, Սանասար Թահմազեանը, Արայիկ Խուդավերդեանը, Վանանդ Մինասքանեանը, Նարեկ Մինասքանեանը, Արայիկ Թահմազեանը, Նորվան Աղախանեանը, Կարէն Շահմիրզայեանը, Նոռա Աղախանեանը եւ Աւենիա Տէր Մինասեանը:
Գնահատանքի արժանացան նաեւ Միութեան աշխատանքներում իրենց օժանդակութիւնը ցուցաբերած մասնաճիւղի անդամներ Նինարէ Թահմազեանն ու Սերինէ Աղախանեանը, իսկ շախմատի ոլորտում մարզիկ-ուհիներին իր ուսուցողական ցուցումներով եւ խորհուրդներով օժանդակած՝ Կարէն Շահմիրզայեանը:
Իր հայրական պատգամում հոգեշնորհ Հայր Սուրբը բարձր գնահատելով մարզիկ-ուհիների մասնակցութիւնը 46 եւ 47-րդ Համահայկական խաղերին՝ իր դրւատանքի խօսքն ուղղեց առաջին հերթին Փերիոյ կրթասիրաց միութեան Կենտրոնական Վարչութեանը, որը թէ՛ նիւթապէս եւ թէ՛ բարոյապէս, միշտ նեցուկ է հանդիսացել մասնաճիւղի իրագործած աշխատանքներին, ապա մասնաճիւղի պատասխանատուներին եւ ծնողներին, որոնք խրախուսում են մարզիկ-ուհիների մասնակցութիւնը մրցախաղերին եւ վերջում համայնքի շնորհալի մարզիկ-ուհիներին, ովքեր լաւապէս գիտակից են իրենց համայնքը լաւագոյնը ներկայացնելու միւս հայ համայնքների մօտ:
Ծրագրի պաշտօնական բաժինն աւարտւելուց յետոյ, երեկոն շարունակւեց ջերմ մթնոլորտում՝ հայկական ուրախ երաժշտութեան ներքոյ, որի ընթացքում բոլոր ներկաները վայելեցին օրւայ առիթով նախապատրաստւած պատշաճ հիւրասիրութիւնը: Հաճելի երեկոն աւելի նշանաւորւեց մի անակնկալով, երբ մասնաճիւղի Վարչութիւնը գեղեցիկ կարկանդակով յայտնւեց եւ ուրախ բացականչութիւնների ու ծափողջոյնների ձայնակցութեամբ նշւեց մասնաճիւղի հիմնադրման 24-ամեակը:
