Հինգշաբթի՝ սեպտեմբերի 24-ի երեկոյեան ժամը 6-ին, նախաձեռնութեամբ Հայ ուս. «Չհարմահալ» միութեան Նոր Ջուղայի մասնաճիւղի վարչութեան եւ համագործակցութեամբ մասնաճիւղի Ձեռնարկային յանձնախմբի ու Երիտասարդական միաւորի, տեղի ունեցաւ սոյն մասնաճիւղի նոր կենտրոնատեղիի բացման արարողութիւնը՝ ներկայութեամբ Սպահանի հայոց թեմի առաջնորդ գերշ. Տ. Բաբգէն արք. Չարեանի, արժն. Տ. Մեսրոպ աւ. քհնյ. Գալստանեանի, արժն. Տ. Վազգէն քհնյ. Քէօշկէրեանի, ազգային մարմինների, Հայ ուս. «Չհարմահալ» միութեան կենտ. վարչութեան եւ քոյր միութիւնների ներկայացուցիչների, մասնաճիւղի անդամների եւ մի շարք այլ հրաւիրեալների:
Սկզբում կենտրոնատեղիի մուտքի ժապաւէնը հատւեց՝ գերշ. Սրբազան Հօր, Հայ ուս. «Չհարմահալ» միութեան կենտրոնական վարչութեան նախագահ Նիկոլ Մուսախանեանի եւ նոյն միութեան Նոր Ջուղայի մասնաճիւղի վարչութեան նախագահ՝ Վրթանէս Մկրտչեանի միջոցով: Ապա թեմակալ առաջնորդն օրհնեց աւանդական աղուհացը, որը մատուցւեց Չհարմահալ գաւառի տարազով զգեստաւորւած անդամուհի Վանէ Թորոսեանի միջոցով, որից յետոյ բոլորին առիթ ընձեռւեց մօտիկից ծանօթանալու նոր կենտրոնատեղիի տարբեր բաժիններին եւ հնարաւորութիւններին:
Երեկոն շարունակւեց կենտրոնատեղիի բակում, ՀՀ վերանկախացման 24-ամեակին նւիրւած դասախօսական-գեղարւեստական միջոցառմամբ՝ սկիզբ առնելով Հայաստանի Հանրապետութեան հիմնի յոտնկայս ունկնդրութեամբ:
Այնուհետեւ բացման խօսքով հանդէս եկաւ մասնաճիւղի վարչութեան անդամ Նոռա Շահիջանեանը, ով վարչութեան անունից բարիգալստեան խօսք ուղղելով ներկաներին, յայտնեց, որ այսօր միութեան համար տօնախմբութեան, ուրախութեան եւ խնդութեան օր է, քանի որ թեմի նախորդ եւ ներկայի Թեմական խորհուրդների շնորհիւ նոր կենտրոնատեղի է տրամադրւել միութեանը եւ այդ ուրախութիւնը բազմապատկւում է՝ Հայաստանի Հանրապետութեան վերանկախացման 24-ամեակին զուգադիպելով:
Առիթը զարդարող խօսքեր հնչեցին հանդիսավարներ Գեղանի Ղարիբեանի եւ Մարինէ Մկրտչեանի միջոցով, որից յետոյ բեմ հրաւիրւեց օրւայ բանախօս, Հայ Ուսում. «Չհարմահալ միութեան անդամուհի, Թեհրանի «Էլպիս Ֆերահեան» մանկապարտէզ-նախակրթարանի տնօրէն եւ վաստակաւոր ասմունքող ու արւեստագէտ՝ Այրինա Նորաւեանը:
Բանախօսն ակնարկ ունենալով Հայ ուս. «Չհարմահալ» միութեան հիմնադրամանը՝ նշեց. «1930-ին մի խումբ երիտասարդներ Աբադանում հիմնադրում են Հայ Ուսում. «Չհարմահալ» միութիւնը՝ նպատակ ունենալով զարգացնելու Չհարմահալ գաւառի դպրոցների ու եկեղեցիների աշխատանքը, հոգ տանելու տեղի կրթա-դաստիարակչական հարցերի նկատմամբ եւ ժողովրդի մէջ զարգացնելու ընթերցանութիւնը: Միութիւնը տարբեր շրջաններում, ինչու չէ նաեւ Նոր Ջուղայում, հիմնադրում է մասնաճիւղեր: Այնուհետեւ ժամանակի պայմանների թելադրանքով իր գործունէութիւնը կենտրոնացնում է հայապահպանման ուղղութեամբ՝ ծառայելով ոչ միայն Չհարմահալ գաւառի ժողովրդին ու երիտասարդներին, այլ նաեւ միւս համայնքներին»:
Այնուհետեւ տկն. Նորաւեանն ընդգծելով, որ ներկայ պայմաններում միութիւնները մեծ աշխատանք ունեն՝ իրենց կառոյցները երիտասարդացնելու եւ արդիականացնելու առումով, անդրադարձաւ սփիւռք-հայրենիք փոխյարաբերութիւններին եւ շեշտելով, որ պատմութեան տարբեր հանգրւաններում հայը միշտ եղել է ազգային արժէքները պահպանելու ուղղութեամբ պայքար մղող ազգ, բոլորին հրաւիրեց աւելի լայն խորհելու սփիւռքում եւ հայրենիքում ապրող հայութեան գոյատեւման սկզբունքների, երիտասարդների մօտ ազգային ինքնութեան պատկերացման եւ հայութեանը միաւորող գործօնների մասին:
Այրինա Նորաւեանն իր խօսքն աւարտեց հայ ժողովրդին ուղղւած Պարոյր Սեւակի բանաստեղծութեամբ:
Ծրագրի շարունակութեան մէջ բեմ հրաւիրւեց նաեւ Հայ Ուսումն. «Չհարմահալ» միութեան Կենտ. վարչութեան նախագահ Նիկոլ Մուսախանեանը, որը երախտագիութեան խօսք ուղղելով առաջորդ Սրբազան Հօրը եւ Սպահանի հայոց թեմի ազգային մարմիններին՝ կենտրոնատեղիի տրամադրման կապակցութեամբ, համոզում յայտնեց, որ այսուհետ միութենականներն աւելի նւիրւածութեամբ են լծւելու իրենց ազգանւէր աշխատանքներին:
Ներկաներին իր հայրական պատգամն ուղղեց թեմակալ առաջնորդ Տ. Բաբգէն արք. Չարեանը, ով ՀՀ վերանկախացման 24-րդ տարեդարձը ուրախութեան առիթ համարելով, ասաց.- «Այս ամեակները մեծ պարտաւորութիւն են դնում իւրաքանչիւրիս ուսերին: Դրանք գալիս են մեզ պարտաւորեցնելու հայրենիքի նկատմամբ: Գալիս են հայրենիքին զօրակցելու ուղղութեամբ մեր պարտականութիւնն աւելացնելու եւ սրբազան հողի նկատմամբ մեր սէրն ու յարգանքն առաւել ամրացնելու համար»: Խօսքի շարունակութեան մէջ Սրբազան Հայրն իր ուրախութիւնը յայտնելով Սպահանի հայոց թեմի Թեմական խորհրդի կողմից միութեան մասնաճիւղին նոր կենտրոնատեղի յատկացնելու կապակցութեամբ եւ միութենականներին բեղուն գործունէութիւն մաղթելով, աւելացրեց, որ միութիւններն իրենց աշխատանքներով պէտք է կարողանան նոր սերնդի մօտ հայրենիքի, եկեղեցու, հոգեւոր ու ազգային արժէքների եւ սրբութիւնների նկատմամբ եղած սէրը շատացնել:
Ընթացքում արտայայտւեց Հայ Ուսում. «Չհարմահալ» միութեան Նոր Ջուղայի մասնաճիւղի վարչութեան նախագահ Վրթանէս Մկրտչեանը, որն իր հերթին շնորհաւորելով առիթների կապակցութեամբ, երախտագիտութեան խօսք ուղղեց նախկին ու ներկայ Թեմական խորհուրդներին՝ կենտրոնատեղիի տրամադրման կապակցութեամբ, երեկոյի կազմակերպման գործում իրենց սերտ համագործակցութիւնը ցուցաբերած անհատներին, ինչու չէ նաեւ Հայ Ուսում. «Չհարմահալ» միութեան Կենտ. Վարչութեան ներկայացուցիչներին՝ հրաւէրին ընդառաջելու եւ ծրագրին մասնակցելու համար:
Յատկանշական է, որ միջոցառումը գեղեցկօրէն ընդմիջւում էր գեղարւեստական կատարումներով, ուր ելոյթ ունեցան մասնաճիւղի անդամներ՝ Վեհանուշ Խուդաբախշեանը, ասմունքելով Վահագն Դաւթեանի «Պարտք» եւ Կարէն Խանլարեանը՝ Շիրազի «Հրաշք» բանաստեղծութիւնները:
Երգերի մենակատրամամբ հանդէս եկաւ Ս. Ամենափրկչեան վանքի «Տաթեւ» երգչախմբի անդամուհի Ժաքլին Պօղոսեանը՝ ղեկավարութեամբ նոյն երգչախմբի խմբավար Համիկ Ալեքսանդրեանի: Մեներգչուհուն երգեհոնի նւագակցութեամբ ընկերակցում էր Ալբերտ Ղազարեանը:
Ընթացքում դարձեալ կենդանի երաժշտութեան ներքոյ հնչեց երգերի շարան «Ասուպ» երաժշտական խմբի կատարմամբ, որին անդամակցում էին Վահէ Կարապետեանը, Դրօ Տէր-Մարտիրոսեանը, Սերօ Տէր-Մարտիրոսեանը, Վահան Վարդեւանեանը, Ադրիան Դաւթեանը եւ Հայկ Խոսրովեանը:
Վերջում տեղի ունեցաւ հիւրասիրութիւն:
