Նախաձեռնութեամբ Հայ Դատի «Արձագանք» քարոզչական յանձնախմբի, ուրբաթ, սեպտեմբերի 4-ի երեկոյեան ժամը 7:00-ից, Ն. Ջ. Հայ Մ. Մ. «Արարատ» միութեան շրջափակում, Նոր Ջուղայի եւ Շահինշահրի հայ համայնքների հոծ թւով ժողովրդի մասնակցութեամբ, մեծ հանդիսութեամբ նշւեց Լեռնային Ղարաբաղի Հանրապետութեան անկախութեան 24-ամեակը:

Երեկոյի ընթացքում հանդիսավար Մանիա Ղուկասեանի միջոցով հետաքրքիր տեղեկութիւններ հաղորդւեցին Արցախի պատմականի, Լեռնային Ղարաբաղի Հանրապետութեան ձեւաւորման, Արցախեան ազատամարտի եւ անկախութեան վերաբերեալ, որոնք ընդմիջւում էին թեմային համահունչ վաւերագրական ֆիլմերից հատւածների ցուցադրմամբ:

Ներկաների համար ուշագրաւ էր յատկապէս միութեան շրջափակում կազմակերպւած լուսանկարների ցուցահանդէսը, ուր լուսարձակի տակ էին առնւել Արցախեան պատերազմն ու ազատամարտիկները, տեսարժան վայրերը եւ ժողովրդի կենցաղն ու մշակոյթը: «Ռուբէն» երիտասարդական միութեան համագործակցութեամբ նախատեսւել էր նկարչութեան կրպակ, որտեղ մանուկներն առիթ ունեցան թղթի վրայ նկարելու իրենց յուշերն ու երեւակայութիւնները հայրենիքի եւ հայրենի Արցախի մասին, իսկ Սբ. Ամենափրկիչ վանքի «Ներսէս Շնորհալի» գրադարանի պատասխանատու Վերգինէ Միրզախանեանի համագործակցութեամբ, առանձին կրպակում տեղի ունեցաւ Արցախին առնչւող թեմաներով գրքերի ծանօթացում, ինչպիսին էին՝ հանրագիտարաններ, արւեստի եւ աշխարհագրութեան մասին գրականութիւն, պատերազմից յուշագրութիւններ եւ այլն:  

Ծրագրին առաւել ջերմութիւն պարգեւեցին յայտագրում նախատեսւած գեղարւեստական կատարումները: Այս բաժնում պարային ելոյթներով հանդէս եկաւ Ն.Ջ. Հայ Մ.Մ. «Արարատ» միութեան Մշակութային միաւորի «Կռունկ» պարախումբը, իսկ ազգային-յեղափոխական երգերի կատարմամբ՝ Զարենուշ Աղուրեանն ու Շանթ Թահմազեանը: Տօնախմբութեան ընթացքում հնչեցին նաեւ ուրախ մեղեդիներով հայերէն երգեր, որոնց բուռն խանդավառութեամբ արձագանքեց ներկայ ժողովուրդը՝ իր հայկական շուրջպարով: Երգերը կատարւեցին «Անի» երաժշտական խմբի կենդանի նւագակցութեամբ եւ Կարէն Օհանեանի ու Սարօ Ղարախանեանի երգեցողութեամբ: 

Յատկանշական է՝ կազմակերպիչ յանձնախումբը պատարստել էր առիթին առնչւող  բրոշիւր, որը բաժանւեց ներկաների միջեւ:

Ալիքի Թղթակից (Նոր Ջուղա)