Ապրիլի 2-ին, Աւագ հինգշաբթի՝ Քրիստոսի Վերջին ընթրիքի յիշատակի օրը, առաւօտեան սուրբ եւ անմահ Պատարագ մատուցւեց Ս. Ստեփանոս եւ Ս. Մինաս եկեղեցիներում: Սպահանի հայոց թեմի առաջնորդ գերշ. Տ. Բաբգէն արք. Չարեանը նախագահեց եւ յաւուր պատշաճի քարոզեց Ս. Մինաս եկեղեցում:
Ս. Ստեփանոս եկեղեցում, համայնքի անդամներից բացի ներկայ էին “Արմէն” երկսեռ տարրական դպրոցի, իսկ Ս. Մինաս եկեղեցում՝ “Քանանեան” աղջ. միջնակարգ դպրոցի աշակերտներն ու պատասխանատուները:
Ս. Պատարագի ընթացքում գերշ. Տ. Բաբգէն արք . Չարեանը նախ ընթերցեց Ս. Բարսեղ հայրապետի աղօթքը, ապա անդրադառնալով Ս. Հաղորդութեան խորհրդին, դիմեց ներկաներին՝ ի մասնաւորի աշակերտներին եւ պատգամեց. “Հաղորդութիւնից յետոյ նոր մարդ դարձէք եւ միմեանց հետ վերաբերւէք սիրով ու յարգանքով, որովհետեւ այդպէս միշտ Աստւած մեզ հետ կը լինի, մենք իրար մէջ կը տեսնենք Աստծու մշտական պատկերն ու մեր կեանքում կիմաստաւորւի Ս. Հաղորդութեան խորհուրդը”:
Թեմակալ առաջնորդն իր խօսքի աւարտին աշակերտներին յորդորեց՝ Հայոց Ցեղասպանութեան 100-ամեակին հայկական շնչով ու քրիստոնէական հաւատով ապրել ու իմաստաւորել իրենց կեանքը:
Վերջում ներկաները Ս. Հաղորդութիւն ստացան:
Նոյն օրը երեկոյեան, Ոտնլւայի կարգը տեղի ունեցաւ Ս. Ստեփանոս, Ս. Ներսէս, Ս. Յովհաննու եւ Ս. Գրիգոր Լուսաւորիչ եկեղեցիներում: Սոյն խորհրդաւոր կարգի ընթացքում, Հայոց Ցեղասպանութեան 100-ամեակի առթիւ, որպէս հայ ժողովրդի վերապրելու եւ գոյատեւման խորհրդանիշ, հոգեւոր հայրերը լւացին տարբեր սերունդների ներկայացուցիչների ոտքերը:
Գերշ. Տ. Բաբգէն արք . Չարեանը նախագահելով Ս. Ստեփենոս եկեղեցու արարողութիւնը, օրւան պատշաճ իր քարոզում անդրադառնալով Ոտնլւայի իրադարձութեանը, որ Քրիստոսը խոնարհութեամբ լւաց Իր աշակերտների ոտքերը, այսպէս արտայայտւեց. “Քրիստոսը յեղաշրջեց ամբողջ մարդկային մտածելակերպը, պատգամելով, որ մեծութիւնը խոնարհութեան մէջ է: Ով իր անձը խոնարհեցնի, Աստծու աչքին նա կը բարձրանայ, իսկ ով իր անձը կը բարձրացնի, Աստծու աչքին նա կը խոնարհւի: Եւ սա է նւիրումի, ծառայութեան, զոհողութեան, խոնարհութեան ու յատկապէս սիրոյ պատգամը”:
Թեմակալ առաջնորդն իր քարոզի աւարտին աղօթեց առ բարձրեալն Աստւած, որ հայ ժողովրդին սրբելով ու մաքրելով՝ առաջնորդի դէպի խաղաղութիւն եւ յաւիտենականութիւն:
Ոտնլւայի արարողութեանը յաջորդեց Խաւարման հսկումի կարգը Ս. Ստեփանոս, Ս. Մինաս, Ս. Աստւածածին եւ Ս. Յովհաննու եկեղեցիներում, որը ողողւած էր խորհրդաւոր շարականներով, երգերով ու աւետարանական ընթերցումներով: Թեմակալ առաջնորդը նախագահեց Ս. Ստեփանոս եկեղեցում կատարւող արարողութեանը, ով իր յաւուր պատշաճի պատգամի սկզբնական բաժնում անդրադարձաւ Քրիստոսի Վերջին ընթրիքին, կրած չարչարանքներին ու խաչելութեանը եւ կարեւորութեամբ ընդգծելով, որ Քրիստոսն աշխարհ եկաւ չարը, ատելութիւնը եւ թշնամութիւնն ընդմիշտ վերացնելու նպատակով, շարունակեց. “Աշխարհը տակաւին նոյնն է, եւ ժողովուրդներ, պետութիւններ ու անհատներ շարունակում են միմեանց նկատմամբ անհանդուրժող լինել եւ թշնամական մօտեցում ունենալ... Եթէ Աստւած ու Քրիստոսը ներկայութիւն ունենան մարդկանց կեանքում, այս աշխարհից կը վերանան ատելութիւնը եւ թշնամանքը, արդարութիւնը կը յաղթի ու ճշմարտութիւնը երբեք չի գերեզմանւի”:
Գերշ. Տ. Բաբգէն արք. Չարեանն իր քարոզի աւարտին կոչ արեց՝ ծունկի գալ Քրիստոսի խաչի առջեւ եւ աղօթել, որ Աստւած իր խաչով օրհնի ամբողջ աշխարհը, խաղաղութիւն ու սէր հաստատի ժողովուրդների, մարդկանց եւ ընտանիքների մէջ ու յատկապէս Ցեղասպանութիւնից 100 տարի անց Իր ձեռքը մեկնի հայ ժողովրդին՝ իր արդար իրաւունքներին տէր կանգնելու համար:
