Երկուշաբթի՝ 2015 թւականի մարտի 30-ին, իրանական Նոր տարւայ՝ «Նոռուզ»-ի առթիւ, Ազգային առաջնորդարանի պատւիրակութիւնը գլխաւորութեամբ Սպահանի հայոց թեմի թեմակալ առաջնորդ գերշ. Տ. Բաբգէն արք. Չարեանի այցելեց Սպահան քաղաքի ընդհանուր քաղաքապետ Դոկտ. Սաղայեան-նեժադին: Պատւիրակութեանը մաս էին կազմում Իրանի իսլ. խորհրդարանում հարաւային իրանահայութեան պատգամաւորը, Սպահանի հայոց թեմի Պատգամաւորական ժողովի, Թեմական եւ Կրօնական խորհուրդների, Հաշւեքննիչ մարմնի ատենապետերն ու ներկայացուցիչները: Սոյն հանդիպմանը ներկայ էր նաեւ Սպահանի 5-րդ շրջանի քաղաքապետ ճարտ. Ասառ-զադեգանը:

Գերշ. Սրբազան Հայրը ուրախութիւն յայտնելով ստեղծւած առիթի համար, իր, ազգային մարմինների եւ Թեմի հայութեան անունից քաղաքապետին շնորհաւորեց Նոռուզը եւ բարեմաղթանքներ փոխանցեց նրան եւ երկրի պետական կառոյցների բոլոր պատասխանատուներին ու աշխատակիցներին:

Փոխադարձաբար, ընդհանուր քաղաքապետ Դոկտ. Սաղայեան-նեժադը առաջնորդ Սրբազան Հօրը եւ պատւիրակութեան անդամներին իր ողջոյնը փոխանցեց եւ գարնանային զարթօնքը բարեբաստիկ առիթ համարեց համայն մարդկութեան համար, շեշտելով, որ Աստւած բնութեան օրէնքների միջոցով իսկ ուսուցանում է մարդուն՝ աշնանային տերեւաթափի նման իր վրայից թօթափելու մեղքն ու սխալը, ձմեռային ցրտաշունչ եղանակի պէս անցնել դժւարութիւնները յաղթահարող ուղով եւ գարնանային վերարթնացնող եղանակի նման՝ հասնելու գեղեցիկ արդիւնքի եւ վերանորոգ կեանքի:

Յարգելի քաղաքապետն անդրադառնալով տարածաշրջանում տիրող ծանր եւ պատերազմական կացութեանը, գոհունակութիւն յայտնեց Աստծուն, որ Իրանը մնում է անդորր եւ կայուն վիճակում:

Հանդիպման ընթացքում, գերշ. Տ. Բաբգէն արք. Չարեանն անդրադառնալով Հայոց ցեղասպանութեան 100-ամեակին եւ մատնանշելով Սպահան-Երեւան քոյր քաղաքների կապերի առաւել ամրապնդմանը, Դոկտ. Սաղայեան-նեժադին իրազեկեց Հայոց ցեղասպանութեան 100-ամեակի առթիւ Հայաստանի հանրապետութեան կենտրոնական յանձնախմբի կողմից նախատեսւած միջոցառումների վերաբերեալ եւ յայտնեց, որ միջոցառումներին մասնակցելու քաղաքապետի սկզբունքային համաձայնութեան դէպքում, Ազգային առաջնորդարանը տնօրինելու է պատշաճը նրա համար պաշտօնական հրաւէր ապահովելու ուղղութեամբ, ինչը մեծ պատիւ եւ հպարտառիթ երեւոյթ է լինելու Սպահանի հայոց թեմի համար:

Թեմակալ առաջնորդն առիթը պատեհ համարեց նաեւ շնորհակալութիւն յայտնելու Սպահանի ընդհանուր եւ 5-րդ շրջանի քաղաքապետերին ազգային իշխանութեան հետ փոխադարձ համագործակցութեան, ինչպէս նաեւ Սպահան քաղաքը ծաղկեալ եւ գեղեցիկ պահելու ուղղութեամբ նրանց տարած ջանքերի առթիւ: