Կիրակի՝ 2015 թւականի յունւարի 4-ի կէսօրին, Ս. Ամենափրկչեան Վանք այցելեցին Սպահան քաղաքի ընդհանուր քաղաքապետ պրն. Սաղայեան-Նեժադը, ընկերակցութեամբ Սպահան քաղաքի 5-րդ շրջանի քաղաքապետ պրն. Ասառզադեգանի եւ քաղաքապետարանի մի քանի բարձրաստիճան պաշտօնէութեան:
Ս. Ամենափրկչեան Վանքի Ծաղկեայ դահլիճում հիւրերին ընդունեցին թեմակալ առաջնորդ գերշ. Տ. Բաբգէն արքեպս. Չարեանը, Սպահանի հայոց թեմի Պատգամաւորական ժողովի, Թեմական ու Կրօնական խորհուրդների եւ առաջնորդարանի այլ մարմինների ատենապետերն ու ներկայացուցիչները:
Գերշ. Սրբազան Հայրն իր ուրախութիւնը յայտնեց քաղաքապետարանի բարձրաստիճան պատասխանատուների այցելութեան առթիւ, եւ գեղեցիկ երեւոյթ համարեց զանազան առիթներով երկկողմ այցելութիւնները, որոնք նպատակ ունեն միմեանց միջեւ բաժանելու ուրախութիւնը, ինչու չէ նաեւ ցաւերն ու դժւարութիւնները, այն համարելով միմեանց նկատմամբ փոխ-յարգանքի եւ համագոյակցութեան լաւագոյն արտայայտութիւններից մէկը:
Առաջնորդ Սրբազան Հայրը նշելով, որ աստւածային պատւիրանների անտեսումն ու մարդու հեռանալն աստւածամերձ կեանքից պատճառն ու սկզբնաղբիւրն են մարդկութեան բոլոր դժւարութիւնների, իրար հանդէպ ոխակալութեան եւ թշնամանքի, յուսաց, որ 2015 թւականին վերանալու են աշխարհում եւ յատկապէս տարածաշրջանում տիրող պատերազմական կացութիւնն ու բռնարարքները եւ մարդիկ կրկին անգամ վերագտնելու են խաղաղ եւ անդորր ապրելու հնարաւորութիւնը:
Գերշ. Տ. Բաբգէն արքեպս. Չարեանը յատուկ կերպով անդրադառնալով Հայոց ցեղասպանութեան 100-ամեակին եւ այն փաստին, որ հայութեան համար 2015 թւականը կարեւոր եւ նշանակալից տարի է լինելու, շեշտեց. «Քանի դեռ Հայոց ցեղասպանութիւնը համաշխարհային ճանաչում չի գտել եւ չի դատապարտւել՝ մեծ է լինելու նման անմարդկային արարքների կրկնութեան հաւանականութիւնը, որի հետեւանքները տեսնում ենք այսօր՝ տարածաշրջանում»:
Բարի-դրացիական յարաբերութեան եւ համակեցութեան գեղեցիկ օրինակ համարելով Իրանն ու Սպահան քաղաքը, թեմակալ առաջնորդը գնահատեց երկու հարեւան երկրների՝ Իրանի եւ Հայաստանի միջեւ տիրող եւ օրըստօրէ զարգացող բազմաբնոյթ կապերը: Նա մատնանշելով Սպահան-Երեւան քոյր քաղաքներ լինելու իրողութիւնը, ցանկութիւն յայտնեց երկու քաղաքների միջեւ իրականացնել ուղիղ չւերթ:
Սպահան քաղաքի ընդհանուր քաղաքապետ պրն. Սաղայեան-Նեժադը, երկրորդելով առաջնորդ Սրբազան Հօր խօսքերը եւ բազմաթիւ մէջբերումներ կատարելով իսլամ կրօնի սուրբ գրքից, շեշտեց, որ աստւածային պատւիրանների եւ Աստծու ուղարկած մարգարէների ուսուցումների գործադրութեան մէջ է պարփակւում խաղաղ եւ երջանիկ ապրելու գաղտնիքը:
Հանդիպմանը ներկայ գտնւող Սպահան քաղաքի շրջանների, հաստատութիւնների եւ միջազգային հարցերի համադրման տեղակալ ճրտպ. Ջամալի-Նեժադը կրկին դառնալով առաջնորդ Սրբազան Հօր ցանկութեանը, ուրախութեամբ յայտնեց, որ Սպահան-Երեւան ուղիղ չւերթի կազմակերպչական եւ նախապատրաստական աշխատանքներն արդէն ընթացքի մէջ են: Նա յիշեցնելով, որ այս տարի Միաստւածեան կրօնների Սպահանի գրասենեակի միջոցով կազմակերպւելու է միջազգային համագումար, գնահատեց առաջնորդարանի գործօն մասնակցութիւնը սոյն բնագաւառում:
Թեմական խորհրդի ատենապետ պրն. Նոէլ Մինասեանն եւս իր հերթին ուրախութիւն յայտնեց երկու քաղաքապետերի այցելութեան առթիւ, ապա յատուկ կերպով շնորհակալութիւն յայտնեց՝ Ս. Ամենափրկչեան վանքի “Ս. Յովսէփ Արեմաթացի” եկեղեցու հիմնադրութեան 350-ամեակի նշման ծրագրերի ընթացքում քաղաքապետերի եւ պետական այրերի մասնակցութեան եւ ցուցաբերած համագործակցութեան համար: Պրն. Մինասեանը հիւրերին տեղեկացրեց, որ Ն.Ս.Օ.Տ.Տ. Արամ Ա Կաթողիկոսի սրբատառ կոնդակով “Արքութեան” տիտղոս է շնորհւել թեմակալ առաջնորդին, այն համարելով հայ համայնքի եւ Սպահան քաղաքի համար ուրախութեան առիթ: Այս կապակցութեամբ պատւիրակութեան անդամներն իրենց շնորհաւորանքները փոխանցեցին Սրբազան Հօրը:
Հանդիպման աւարտին, պրն. Սաղայեան-Նեժադը յուշանւէրներ յանձնեց ազգային առաջնորդարանի պատասխանատուներին:
