Հայաստանի Հանրապետութեան վարչապետ՝ Յովիկ Աբրահամեանը, Նոր Ջուղա կատարած միօրեայ այցի շրջանակներում, երեքշաբթի՝ 21 հոկտեմբերի երեկոյեան, իրեն ընկերակցող պատւիրակութեան հետ այցելեց Սբ. Ա. վանք, ուր նախ ծաղիկներ զետեղեց Հայոց Ցեղասպանութեան զոհերի յիշատակին կառուցւած յուշարձանին, այնուհետեւ վանքի Ծաղկեայ դահլիճում հանդիպում ունեցաւ Ն.Ս.Օ.Տ.Տ. Արամ Ա վեհափառ հայրապետի, իրանահայ երեք թեմերի առաջնորդների, Սպահանի հայոց թեմի Պատգամաւորական ժողովի Դիւանի, Թեմական եւ Կրօնական խորհուրդների անդամների հետ: Բարի գալստեան խօսքով եւ թեմի ազգային կառոյցի մասին բացատրութեամբ հանդէս եկաւ Սպահանի հայոց թեմի առաջնորդ Տ. Բաբգէն եպս. Չարեանը, ապա արտայայտւեց ՀՀ Սփիւռքի նախարար Հրանուշ Յակոբեանը, ով դրւատանքի խօսքեր արտայայտեց Նոր Ջուղայի պատմական անցեալի եւ հարուստ մշակոյթի վերաբերեալ:
Շարունակութեան մէջ, յարգելի վարչապետը Արարատ լեռան պատկերով մի գեղանկարչութիւն նւիրւեց Սպահանի հայոց թեմին, փոխադարձաբար թեմիս կողմից, ձեռամբ Վեհափառ Հայրապետի, ՀՀ վարչապետին եւ նրան ընկերակցող 7 նախարարներին շնորհւեցին “Ս. Յովսէփ Արեմաթացի” եկեղեցու 350-ամեակի յոբելեանական յանձնախմբի գերպը պատկերող յուշամեդալներ:
Հանդիպումից յետոյ պետական հիւրերն այցելեցին “Ս. Յովսէփ Արեմաթացի” եկեղեցի եւ “Խաչատուր վրդ. Կեսարացի” անւամբ թանգարան:
Յատկանշելի է, որ մինչ Ս. Ամենափրկիչ Վանք այցելելը, յարգելի վարչապետը մասնակցեց Թեմական Խորհրդի նախաձեռնութեամբ տեղի ունեցած ճաշկերոյթին, որը կազմակերպւել էր իր, Ն.Ս.Օ.Տ.Տ. Արամ Ա. Վեհափառ Հայրապետի եւ նրանց ուղեկցող պատւիրակութեան պատւին, եւ որին հրաւիրւած էին “Ս. Յովսէփ Արեմաթացի” եկեղեցու 350-ամեակին նւիրւած խորհրդաժողովի դասախօսներն ու հրաւիրեալները, շրջանի Հայ Դատի յանձնախմբի, Սպահանի հայոց թեմի ազգային մարմինների, միութիւնների եւ հայոց ազգային դպրոցների ներկայացուցիչները:
