Հինգշաբթի՝ մայիսի 30-ի երեկոյեան ժամը 7:30-ին, Ն.Ջ. Հայ Մ.Մ. «Արարատ» Միութեան բացօդեայ տարածքում, նախաձեռնութեամբ ՀՀ Հիմնադրման 95-ամեակի Տօնակատարութեան Նոր Ջուղայի Յանձնախմբի, մեծ շուքով նշւեց Հայաստանի առաջին անկախ Հանրապետութեան 95-ամեակը: Միջոցառմանը ներկայ էին Սպահանի Հայոց Թեմի առաջնորդ գերշ. Տ. Բաբգէն եպս. Չարեանը, Շահինշահրի հայ համայնքի հոգեւոր տեսուչ հոգշ. Տ. Անանիա վրդ. Գուճանեանը, Երեւանի Պետական Համալսարանի Իջեւանի մասնաճիւղի Հումանիտար ֆակուլտետի դեկան եւ դասախօս Վարդան Ալեքսանեանը, հոգեւորականաց դասը, ազգային մարմինների եւ շրջանի Հայ Դատի Յանձնախմբի անդամները եւ հոծ թւով ժողովուրդ:
Տօնակատարութեան պաշտօնական բացումը կատարւեց Հանրապետական մաղթանքով՝ նախագահութեամբ առաջնորդ Սրբազան Հօր եւ մասնակցութեամբ հոգեւորականաց դասի: Երգեցողութեամբ արարողութեանը մասնակցում էր նաեւ Ս. Ամենափրկչեան Վանքի «Կոմիտաս» երգչախումբը՝ խմբավար Արմէն Ամիրխանեանի ղեկավարութեամբ: Սոյն բաժինն աւարտւեց դրօշակի արարողութեամբ, որն իրագործւեց Ն.Ջ. Հայ Մ.Մ. «Արարատ» Միութեան Սկաուտական Միաւորի անդամների միջոցով եւ «Մեր Հայրենիք» հիմնի յոտնկայս ունկնդրութեամբ:
Ծրագիրը շարունակւեց հանդիսավարներ Նայիրի Թահմազեանի եւ Արթին Մուրադեանի բացման խօսքով, որտեղ ասւած էր. «Պատմական Հայաստանի մէկ մասի վրայ ստեղծւած հայկական պետականութիւնը հանդիսացաւ ո՛չ միայն հայի յոյսն ու ապաւէնը, երազած աւետեաց երկիրը, այլեւ՝ հիմնաքարը մեր մեծ տեսլականի՝ ազատ, անկախ ու միացեալ Հայաստանի»:
Բացման խօսքին յաջորդեց ՀՀ Հիմնադրութեան 95-ամեակի Տօնակատարութեան Նոր Ջուղայի Յանձնախմբի խօսքը, Յանձնախմբի ներկայացուցիչ Մադլէն Ղարիբեանի ընթերցմամբ, որտեղ կարեւորութեամբ նշւած էր. «Մայիս 28-ի կերտած անկախութիւնը կապւած է մեր վաղւայ անելիքների հետ, պատմութիւնը միայն անցեալ չէ, հայորդին պէտք չէ միայն պատմութիւն իմանայ, այլ նայելով անցեալին՝ պէտք է կարողանայ ուղղել իր ներկան եւ ստեղծել ապագան: Մայիս 28-ը պարզ անկախութեան տօն չէ, այլ՝ պատմական փորձառութիւն: Այդ օրերին կատարւած աշխատաձեւն ու արձանագրած յաջողութիւնները պէտք է օգտագործենք այսօր»:
Այնուհետեւ ամենամեայ շքերթ-տողանցքով մայիսեան սխրագործ հերոսներին իրենց յարգանքի տուրքը մատուցեցին՝ Նոր Ջուղայի եւ Շահինշահրի ազգային մարմինները, շրջանի Հայ Դատի Յանձնախումբը, հայոց ազգային դպրոցների անձնակազմերը, Ծնողական խորհուրդները եւ աշակերտները, համայնքի երգչախմբերի ու միութիւնների վարչութիւնները, «Ռուբէն» երիտասարդական եւ Նոր Ջուղայի ու Շահինշահրի «Թ. Թադէոսեան» Պատանեկան միութիւնների, ՀՀ հիմնադրման 95-ամեակի Տօնակատարութեան Յանձնախմբի եւ Ն.Ջ. Հայ Մ.Մ. «Արարատ» Միութեան Սկաուտական Միաւորի անդամները:
Շքերթից յետոյ, բանախօսութեամբ հանդէս եկաւ Երեւանի Պետական Համալսարանի Իջեւանի մասնաճիւղի Հումանիտար ֆակուլտետի դեկան եւ դասախօս Վարդան Ալեքսանեանը:
Նա իր ելոյթի սկզբում Նոր Ջուղայի մասին դրւատանքով արտայայտւեց, ապա անկախութիւնը բացարձակ արժէք համարելով, այսպէս շարունակեց. «Անկախութիւնն այն պայմանն ու միջոցն է, որն ապահովում է ազգի առաջընթացն ու զարգացումը: Նրա արժանապատիւ դերը եւ տեղը ազգերի համակեցութեան մէջ է: Անկախութիւն կերտելու առանձնաշնորհն աշխարհում պատկանում է ուժեղ, կամային եւ կազմակերպական ներուժ ունեցող ազգերին. թոյլերին եւ տկարներին այն հասու չէ»: Խօսքի շարունակութեան մէջ բանախօսն անդրադառնալով Սարդարապատի, Բաշ-Ապարանի եւ Ղարաքիլիսայի հերոսամարտերին, նշեց նաեւ Հայաստանի Առաջին Հանրապետութեան կազմաւորման մասին եւ աւելացրեց. «Հայաստանի Առաջին Հանրապետութեան հիմնադիր հայրերը մեզ թողել են երեք պատգամ-խորհուրդներ, որոնցով պէտք է առաջնորդւենք մենք եւ յետագայ սերունդները: Այդ պատգամներն են՝ միաբանութիւնը, սեփական ուժերին ապաւինումը եւ ինքնամոռաց ու անձնուրաց նւիրւածութիւնը պետականաշինութեան գործին»: Վարդան Ալեքսանեանն իր խօսքի աւարտին մատնանշեց ներկայ Հայաստանում տնտեսական, կրթական եւ հասարակական ոլորտներում կիրառւող մի շարք բարեփոխումներ, ապա անդրադառնալով երկրի արտաքին քաղաքականութեանը՝ կարեւորութեամբ ընդգծեց. «Հայաստանում Դաշնակցութիւնը եւ որոշ քաղաքական ուժեր պահանջում են անվերապահօրէն հետ վերցնել Հայաստանի կառավարութեան ստորագրութիւնը հայ-թուրքական չարաբաստիկ արձանագրութիններից, քանի որ այդ արձանագրութիւներում անգամ չքողարկւած կերպով կան նախապայմաններ, որոնք կարող են մեզ ծանր վիճակում դնել, եւ դրանցից միայն մէկը՝ հայ-թուրքական սահմանի ճանաչումն է, որը մեզ զրկելու է Վիլսոնեան իրաւարար վճռով նախատեսւած Մեծ Հայաստանի սահմաններից»:
Հանդիսութեան պաշտօնական բաժնից անմիջապէս յետոյ, սկսւեց տօնախմբութեան գեղարւեստական բաժինը, որտեղ ազգային-յեղափոխական երգերի կենդանի կատարմամբ ներկաների տօնական տրամադրութիւնը բարձրացրեց մեներգիչ Արթին Քեշիշեանը, «Անի» նւագախմբի ընկերակցութեամբ: Երգերի շարանը գեղեցկօրէն ընդմիջւեց «Արարատ» Միութեան Մշակութային Միաւորի «Կռունկ» ասմունքի խմբի անդամներ Մանիա Ղուկասեանի, Թալին Մովսիսեանի եւ Կարէն Խանլարեանի ասմունքի կատարմամբ՝ ներկայացնելով Վարանդի «Հայկ Դիւցազն» բանաստեղծութիւնը:
Մայիս 28-ին նւիրւած տօնակատարութիւնն աւարտւեց շքեղ հրավառութեամբ:
Յատկանշական է, որ «Թադէոս Թադէոսեան» Պատանեկան Միութեան կողմից դասաւորւել էին դիմայարդարման եւ նկարչութեան կրպակներ, որտեղ տօնակատարութեան ամբողջ ընթացքում երեխաների գեղեցիկ դէմքերի վրայ եռագոյն դրօշ պատկերելուց բացի, նրանց առիթ էր ընձեռւում ջրաներկի եւ սեփական մատների միջոցով թղթի վրայ նկարել հայրենասիրական թեմաներով նկարչութիւններ: Իսկ «Ռուբէն» Երիտասարդական Միութիւնը պատրաստել էր օրւան առնչւող սկաւառակներ եւ պիտակներ, որոնք բաժանւեցին ներկաներին:
