Այս տարի զուգադիպում է Սպահանի Հայոց Թեմի Բարեջան Առաջնորդ Գերշ. Տ. Բաբգէն Եպսկ. Չարեանի Քահանայական օծման 30-ամեակին, իսկ Սպահանի Հայոց Թեմում որպէս Առաջնորդ ծառայութեան 10-ամեակին: Առ այդ, հովանաւորութեամբ Շահինշահրի համայնքի Հոգեւոր Տեսուչ Տ.ԱՆանիա վրդ. Գուճանեանի եւ կազմակերպութեամբ Հայ Համայնքի Վարչութեան, երեքշաբթի, թւականիս յուլիսի 15-ի երեկոյեան ժամը 7:30-ին, Շահինշահրի Հայոց Ազգային «Սրբոց Վարդանանց» դպրոցի սրահում տեղի ունեցաւ յոբելենական հանդիսութիւն՝ ի պատիւ Թեմակալ Առաջնորդի: Սոյն հանդիսութեանը ներկայ էին յոբելեար Թեմակալ Առաջնորդը, Սպահանի Հայոց Թեմի ազգային մարմինների, անձնակազմերի եւ միութիւնների ներկայացուցիչները, հրաւիրեալներ ու համայնքի մեծ թւով անդամներ, որոնք եկել էին մեծարելու Առաջնորդ Սրբազան Հօր ծառայութիւնը Սպահանի Հայոց Թեմում:
Սրբափայլ տաճարի առջեւ, սրբաշունչ պատանին՝
Սրբահառաչ աղօթքն ուղղած Սուրբին,
Սրբամիտ ուխտում է՝ լինել սրբապահ՝
Սուրբի ճանապարհին:
Հրաժեշտ տւած աշխարհիկ կեանքին,
Անցնում է փորձութեան բովից յաղթական,
Շնորհաբաշխւում կաթիլ առ կաթիլ՝
Սրբակցորդ դառնում մինչեւ յաւիտեան:
Եւ ահա անցած երեք տասնամեակ՝
Բազմած Առաջնորդ Գահին Թեմակալ,
Լոյսը սփռում է Սպահանի թեմին՝
Անունն է Տ. Բաբգէն եպսկ. Չարեան:
Վերոնշեալ բանաստեղծական տողերը ձօնելով Թեմակալ Առաջնորդին՝ օրւայ հանդիսավար Վիոլետ Յարութիւնեանը բարի գալուստ մաղթեց ներկաներին եւ շնորհաւորանքի խօսք ուղղելով Գերշ. Սրբազան Հօրը, նրան մաղթեց քաջառողջութիւն եւ արեւշատութիւն:
Այնուհետեւ ցուցադրւեց Աստծու նւիրեալ Տ.Բաբգէն եպսկ. Չարեանի կենսագրականը սեղմ գծերով ներկայացնող տեսագրութիւնը, որը պատրաստւել էր հոգշ. Հայր Սուրբի նախաձեռնութեամբ: Հետաքրքիր տեսագրութեանը աւելի լիցք հաղորդեցին Նոր Ջուղայի եւ Շահինշահրի ազգային մարմինների եւ միութիւնների պատասխանատուների, պաշտօնեաների եւ ներկայացուցիչների վկայութիւններն ու դրւատանքի խօսքերը Թեմակալ Առաջնորդի վեհ նկարագրի ու ծաւալած եկեղեցաշէն գործունէութեան վերաբերեալ:
Ծրագրի շարունակութեան մէջ բեմ հրաւիրւեց Հայ Համայնքի Վարչութեան ատենապետ պրն. Մելքոն Շիրւանեանը, արտայայտւելու Գերշ. Սրբազան Հօր վսեմաշուք անհատականութեան եւ ծառայանւէր գործունէութեան մասին: Յարգելի բանախօսը բարձր գնահատելով Հայոց Առաքելական Սուրբ եկեղեցու դերը հայ ժողովրդին գլխաւորելու եւ համախմբելու կարեւոր գործում, դրւատեց նոյն եկեղեցու մէջ դաստիարակւած ու թրծւած հոգեւորականներին եւ նշեց. «Անկասկած Տ. Բաբգէն եպսկ. Չարեանը մէկն է այն հոգեւորականներից, որը 30 տարի անընդմէջ ծառայել է հայ եկեղեցուն ու մեր ժողովրդին, ընդ որում վերջին 10 տարին մեր թեմում: Սրբազան Հայրը յատկապէս իր համեստութեամբ ու բարեհամբոյր բնաւորութեամբ եւ իր նպատակաուղղւածութեամբ կարողացաւ կարճ ժամանակահատւածում լայն ժողովրդականութիւն ձեռք բերել: Իբրեւ Թեմիս Առաջնորդ իր կեցւածքով ու դիրքորոշումով բարձրացրեց մեր եկեղեցու եւ մեր թեմի ազգային իշխանութեան վարկն ու հեղինակութիւնը թէ՛ համահայկական, թէ՛ պետական շրջանակներում, եւ ինչու չէ նաեւ միջազգային մակարդակում: Իսկ կարեւորութեամբ պէտք է մատնանշել այն իրողութիւնը, որ Սրբազան Հօր 10-ամեայ եկեղեցաշէն գործունէութեան ընթացքում, յատուկ ուշադրութեան արժանացաւ Շահինշահրի հայ համայնքը, որի հետեւանքով էլ նւաճում ապրեց տեղի ազգային-հասարակական կեանքը»: Իր խօսքի աւարտին պրն. Շիրւանեանը Սրբազան Հօրը մաղթեց արեւշատութիւն, քաջառողջութիւն եւ նորանոր նւաճումներ:
Օրւայ գեղեցիկ հանդիսութեանը առանձնայատուկ փայլ տւեց Թեմակալ Առաջնորդին ձօնւած՝ Հայր Սուրբի ղեկավարութեամբ կազմակերպւած «Նարօտ» մանկապատանեկան երգչախմբի գեղարւեստական ծրագիրը, որն արժանացաւ հանդիսատեսի բարձր գնահատանքին:
Գեղարւեստական յայտագրում ընթերցւեց նաեւ ստորեւ բերւած «Բաբգէն Սրբազան» բանաստեղծութիւնը, որի հեղինակն էր հոգշ. Հայր Սուրբը.
Բաբգէն Սրբազան
Բիւրեղեայ քաղցր հոգով ու բարի սրտով
Առաջնորդը մեր, հայրութեան վեհ նկարագրով
Բարձր մտքի տէր, բայց մանուկի անմեղ հոգով
Գուրգուրոտ հօր մաքուր ու թափանցիկ հայելիով
Է ու կը մնայ Սրբազանը մեր, մեզ սփոփող
Նւիրեալ ծառայ եկեղեցւոյ եւ աւանդութեան
Սրբազանն է մեր օրինակ սիրոյ առաքինութեան
Րենական քաղցր, հեզ ու վեհ բարութեան
Բարի օրինակն է մեզ ու բոլոր մարդկութեան.
Արի կանգնած, դէմը ժողովրդի բոլոր դժւարութեան
Զմրուխտեայ առաքինութեան ռահվիրայ է հարազատ
Նա է՝ Բաբգէն Սրբազան մարդը եւ հայրը
Նւիրեալ մեր սիրելի Առաջնորդ Սրբազանը:
Սոյն օրւայ առթիւ համայնքի հայորդիները ի նշան երախտագիտութեան Գերշ. Սրբազան Հօր հայրական անկեղծ սիրոյ ու հանապազօրեայ հովանաւորութեան պատրաստել էին մի գեղեցիկ յուշանւէր, որը հոգշ. Հայր Սուրբի ձեռամբ եւ Համայնքային Վարչութեան ատենապետի միջոցով յանձնւեց Թեմակալ Առաջնորդին:
Հոգշ. Հայր Սուրբն իր բարեմաղթանքի խօսքն ուղղելով Գերշ. Սրբազան Հօրը, այսպէս արտայատւեց.
«Որպէս Հայոց Առաքելական Սուրբ եկեղեցու անսակարկ նւիրեալ, Տ.Բաբգէն եպսկ. Չարեանը մեզ համար եղել է դաստիարակ ու սերտ գործակից, տիպար հոգեւորական, համեստ եւ անբասիր սպասաւոր: Սրբազան Հայրն իր սիրալիր վերաբերմունքով ինձ համար եղել է ուղեցոյց եւ մեծ խորհրդատու: Նա իր հոգածու մօտեցումով կարողացաւ նւաճել Սպահանի Հայոց Թեմի զաւակների սրտերն ու վայելել նրանց սէրն ու յարգանքը: Ահաւասիկ իմ գոհունակութիւնն ու շնորհակալութիւնն եմ յայտնում Տիրոջը, որ Սրբազան Հօր նման վառ անհատականութիւն է առաջնորդում Սպահանի Հայոց Թեմը: Բարձրեալից հայցում եմ Սրբազան Հօրը արեւշատ օրեր ու առաւել բեղուն գործունէութիւն իր նւիրական ասպարէզում: Թո՛ղ ամենակալ Աստծու շնորհը միշտ անպակաս լինի Սրբազան Հօրից»:
Յուզառատ էր պահը, երբ Սրբազան Հայրը շնորհակալութիւն յայտնելով հանդիսութեան նախաձեռնողներին ու կազմակերպիչներին իր սրտի խօսքը փոխանցեց. «Հիացած եմ այս կազմակերպւած գեղեցիկ անակնկալի համար, բոլորի վարձքները ի կատար, թէ՛ նախաձեռնողների, թէ՛ կազմակերպիչների, եւ թէ՛բոլոր այն անձանց, ովքեր որեւէ կերպ դերակատար են եղել այս հանդիսութիւնը կենսագործելու մէջ: Բարձրեալին, սրտի անհուն ուրախութեամբ, իմ գոհունակութիւնն եմ յայտնում, որ ինձ արժանացրել է թեմիս զաւակների անկեղծ սէրը վայելելու: Այս օրը ինձ համար մեծ պատիւ է: Շնորհակալ եմ ցուցաբերած այս սիրոյ եւ յարգանքի համար: Երբ կը կրեմ այս գեղեցիկ յուշանւէրը, անշուշտ կը յիշեմ այս օրն ու Շահինշահրի սիրալիր զաւակներին: Դուք ինչպէս միշտ իմ աղօթքներում Ձեր ուրոյն տեղը կունենաք: Աստւած թո՛ղ օրհնի Ձեզ: Իսկ մենք հոգեւորականներս կանչւել ենք առաքելութեան, կանչւել ենք ծառայութեան Հայաստանեայց Առաքելական Սուրբ եկեղեցուն: Ուրախ եմ, որ Աստծու զօրակցութեամբ կարողացել եմ պահել իմ ուխտը նրա հետ՝ ի փառս Հայոց եկեղեցու եւ Թեմիս ողջ զաւակների բարօրութեան: Թող Տէրը անսասան պահի Հայոց եկեղեցին եւ նրա զինւորեալներին ու կանչւած ծառաներին»:
Այնուհետեւ օրւայ առիթով պատրաստւած կարկանդակը մատուցւեց, որին յաջորդեց ջերմ ու համեստ ընդունելութիւն բոլոր հանդիսականների համար: Ստեղծւած հարազատ մթնոլորտում Սրբազան Հայրն ընդունեց ներկաների անհատական բարեմաղթանքները եւ լուսանկարւեց նրանց հետ՝ այդ շքեղ օրը յաւերժացնելով նրանց համար:
Այս անզուգական հանդիսութիւնը իրականացաւ հոգշ. Հայր Սուրբի, համադրող յանձնախմբի անդամներ՝ տիկնայք Ծաղկուշ Մինասքանեանի, Մարիտա Վարդանեանի, Լիդուշ Քամարզարեանի, Սիլւա Քոնարեքիի եւ Ալիս Մկրտչեանի, ձայնի պատասխանատու պրն. Անդրէ Պարսամեանի, տեսագրման, լուսանկարման եւ նկարահանման պատասխանատու՝ պրն. Գեւիկ Խաչատրեանի միահամուռ ջանքերի շնորհիւ:
