Երկուշաբթի՝ հոկտեմբերի 17-ի երեկոյեան, Նոր Ջուղայի Ս. Ամենափրկիչ վանքի «Ս. Յովսէփ Արիմաթացի» եկեղեցում, նախագահութեամբ Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանի եւ մասնակցութեամբ թեմի հոգեւորական դասի, Սուրբ եւ Անմահ Պատարագ մատուցւեց նշւած եկեղեցու անւանակոչութեան տօնի առթիւ:

Պատարագիչ եւ քարոզիչ հայրն էր արժ. Տ. Մեսրոպ Աւ. քհնյ. Գալստանեանը, ով իր քարոզախօսութեան ընթացքում անդրադարձ ունենալով Քրիստոսի խաչելութեանը եւ Ս. Յովսէփ Արիմաթացու դերակատարութեանը՝ Տիրոջ դին խաչից իջեցնելու եւ թաղելու գործում, շնորհաւորանքի խօսք ուղղեց եկեղեցու անւանակոչութեան տօնի առթիւ: Պատարագի երգեցողութիւնը կատարւեց Ս. Ամենափրկիչ վանքի «Կոմիտաս» երգչախմբի միջոցով:

Յաւարտ Ս. Պատարագի, եկեղեցում Ս. Յովսէփ Արիմաթացու աջով կատարւեց Ջրօրհնէքի կարգը, ապա զանգակատան առջեւ տեղի ունեցաւ հոգեհանգիստ՝ վանքում պաշտօնավարած հոգեւորական ու աշխարհական ննջեցեալ սպասաւորների եւ եկեղեցու բարերարների հոգիների խաղաղութեան համար:

Արարողութեան աւարտին թեմակալ Առաջնորդ Սրբազան Հայրը շնորհաւորանքի խօսք ասելով տօնի կապակցութեամբ՝ շնորհակալութիւն յայտնեց եկեղեցիները բարեկարգ պահելու եւ արարողութիւնները լաւագոյնս կազմակերպելու գործերում դերակատար բոլոր անհատներին՝ ի մասնաւորի հոգեւորական դասին ու երգչախմբերին, իսկ աղօթեց առ բարձրեալն Աստւած, որ խաղաղութեան մէջ հանգչեցնի վանքում ծառայած բոլոր ննջեցեալ սպասաւորների հոգիները:

Վերջում տեղի ունեցաւ հիւրասիրութիւն:

Արարողութեանը ներկայ էին ազգային մարմինների ներկայացուցիչներն ու ժողովուրդ:

Թղթակից (Նոր Ջուղա)