Սրբոց Թարգմանչաց տօնի առիթով շաբաթ՝ հոկտեմբերի 8-ի առաւօտեան, Նոր Ջուղայի «Ս. Յովհաննու Կարապետ» եկեղեցում, նախագահութեամբ Սպահանի հայոց թեմի Առաջնորդ գերշ. Տ. Սիփան Ս. Եպս. Քէչէճեանի եւ մասնակցութեամբ հոգեւորական դասի, մատուցւեց Սուրբ եւ Անմահ Պատարագ: Հոգեպարար արարողութեանը ներկայ էին ազգային մարմինների ներկայացուցիչները, ժողովուրդ եւ հայոց ազգ. «Քանանեան-Կատարինեան» միջնակարգ դպրոցի անձնակազմն ու աշակերտութիւնը: Օրւայ պատաագիչն էր արժ. Տ. Վարդան քհնյ. Աղաբաբայեանը. ընթացքում երգեցողութեամբ հանդէս եկաւ «Շուշանիկ» հոգեւոր երգչախումբը:

Թեմակալ Առաջնորդ Սրբազան Հայրն օրւան պատշաճ իր քարոզախօսութեան մէջ անդրադառնալով Սուրբ Մեսրոպ Մաշտոցի կեանքին ու գործունէութեանը եւ յատկապէս ընդգծելով նրա գիւտի կարեւոր դերակատարութիւնը հայ ազգի գոյատեւման հարցում՝ ներկայ աշակերտներին պատգամեց, որ կրթւեն ու լաւ սերտեն, իսկ ապագայում լինեն շրջահայեաց, խորաթափանց եւ հեռատես՝ հայրենիքին ծառայելու եւ հայ ժողովրդին փրկութիւն բերելու համար:

Յաւարտ Սուրբ Պատարագի ներկաները բոլորւեցին եկեղեցու բակում, ուր «Քանանեան-Կատարինեան» միջնակարգ դպրոցի երգչախումբը կատարեց «Ազգ փառապանծ» երգը, իսկ աշակերտներից ելոյթ ունեցան տօնին ձօնւած բանաստեղծութիւնների եւ խօսքերի ասմունքով:  

Այս առիթով հինգշաբթի եւ շաբաթ՝ հոկտեմբերի 6 եւ 8-ին, հերթաբար Շահինշահրի հայոց ազգ. «Սրբոց Վարդանանց» մէկ օրեայ վարժարանում եւ Նոր Ջուղայի հայց ազգ. «Արմէն» տարրական դպրոցում, պատկան տնօրէնութեան եւ ուսուցչական կազմի  կազմակերպութեամբ իրականացւեցին աշակերտական միջոցառումներ՝ յագեցած տօնի առթիւ շնորհաւորանքի եւ բարեմաղթանքի խօսքերով, բանախօսութեամբ, երգերի եւ արտասանութիւնների կատարմամբ, պատի թերթերի պատրաստմամբ եւ հայկական մուլտֆիլմերի դիտումով: Հարկ է նշել, որ շաբաթ օրը «Ս. Յովհաննու Կարապետ» եկեղեցում իրականացւած աշակերտական միջոցառումի աւարտին, թեմակալ Առաջնորդ Սրբազան Հայրը Կրթական խորհրդի ներկայացուցիչների ընկերակցութեամբ այցելեց ազգ. կրթահամալիր, որտեղ մօտիկից ականատեսը եղաւ «Արմէն» տարրական դպրոցի սաների աշխատանքների:

Թղթակից (Նոր Ջուղա)