Իրանի Իսլամական Հանրապետութիւն պաշտօնական այցի վերջին օրը ՀՀ Պաշտպանութեան նախարար Վիգէն Սարգսեանի գլխաւորած պատւիրակութիւնը հիւրընկալւել է բանակի թիկունքային ապահովմամբ զբաղւող «Էթկա» ընկերութիւնում:

Այնուհետեւ կայացել է Վիգէն Սարգսեանի հանդիպումը Իրանի հոգեւոր առաջնորդի արտաքին քաղաքականութեան հարցերով խորհրդական Ալի Ակբար Վելայաթիի հետ: Բարձր գնահատելով դարաւոր պատմութիւն ունեցող հայ-իրանական բարեկամութիւնը, զրուցակիցները համոզմունք են յայտնել, որ այն կարեւոր նախադրեալ է յարաբերութիւնների շարունակական խորացման համար: Ալի Ակբար Վելայաթին նշել է, որ Իրանն ու Հայաստանն արդէն արդիւնաւէտ փոխգործակցութիւն են ծաւալում տնտեսութեան մի շարք ճիւղերում եւ յոյս յայտնել, որ Հայաստանի Հանրապետութեան պաշտպանութեան նախարարի պաշտօնական այցը Իրան կը խթանի համագործակցութիւնը նաեւ պաշտպանական ոլորտում:

Հանդիպման ընթացքում քննարկւել են ինչպէս երկկողմ, այնպէս էլ բազմակողմ, մասնաւորապէս` տարածաշրջանային հետաքրքրութիւն ներկայացնող հարցեր: Վիգէն Սարգսեանն ու Ալի Ակբար Վելայաթին համակարծիք են եղել, որ լարւածութեան նոր օջախների ձեւաւորումը լրջօրէն վնասելու է տարածաշրջանային անվտանգութիւնը, ուստի անհրաժեշտ է համադրել ջանքերը` ահաբեկչութեան եւ ծայրայեղականութեան տարածումը կանխելու նպատակով:

Անդրադարձ է կատարւել նաեւ արցախեան հիմնախնդրին: Զրուցակիցներն ընդգծել են, որ խնդիրը չունի ռազմական լուծում եւ կարգաւորման կարելի է հասնել բացառապէս քաղաքական ճանապարհով:

Փետրւարի 2-ի երեկոյեան հայկական պատւիրակութիւնը վերադարձել է Երեւան: