Շաբաթ՝ 5 սեպտեմբեր 2020 թւականի երեկոյեան, ՍՀԹ պատւիրակութիւնը Թեմակալ Առաջնորդի գլխաւորութեամբ, հիւրընկալեց Շւէյցարիայի արտաքին գործերի նախարար Իգնասիօ Քասիսին, ԻԻՀ-ում Շւէյցարիայի դեսպանին եւ նրանց ընկերակցող շւէյցարական պատւիրակութեանը, ովքեր իրենց Սպահան կատարած այցելութեան շրջագծում, այցելելցին նաեւ Ս. Ա. Վանք:
Հիւրերն սկզբում Առաջնորդարանի Ծաղկեայ դահլիճում հանդիպում ունեցան Թեմակալ առաջնորդ գերշ. Տ. Սիփան եպս. Քէչէճեանի, Թեմական եւ Կրօնական խորհուրդների ատենապետներ՝ Վարուժ Մինասեանի եւ Վարուժ Մովսիսեանի, Թեմական խորհրդի անդամ Սոնիկ Բաղումեանի եւ Նոր Ջուղայի Հայ Դատի յանձնախմբի ներկայացուցիչ Վահէ Թորոսեանի հետ։ Հիւրերին բարի գալստեան խօսքով ողջունեց Սրբազան հայրը, այնուհետեւ պարոն նախարարը նոյնպէս իր հերթին բարեմաղթանքներից յետոյ շնորհակալութիւն յայտնեց տեսակցութեան առիթով։
Շւէյցարացի նախարար Քասիսն իր խօսքերի սկզբում հետաքրքրւեց Իրանի հայ-քրիստոնեայ համայնքի կացութեան մասին, թէ՛ համայնքային եւ թէ՛ երկրի մակարդակում, ի մասնաւորի Սպահան քաղաքում, որի կապակցութեամբ Սրբազան հօր բացատրութիւնները լսելուց յետոյ, Նախարարն իր գոհունակութիւնը յայտնեց իրանահայութեան, այդ թւում եւ Նոր Ջուղայի հայ համայնքի կրօնական, կրթական, եւ մշակութային ազատութիւնների եւ իրաւունքների վերաբերեալ:
Այնուհետեւ արտայայտւեց Թեմակալ առաջնորդը, ով իր մտահոգութիւնը յայտնեց Իրանի նկատմամբ ԱՄՆ կիրառած պատժամիջոցների մասին, որոնք իրենց բացասական ազդեցութիւնն են թողնում ոչ միայն երկրի պետութեան, այլեւ ժողովրդի եւ հասարակութեան վրայ: Սրբազան հայրն յատկապէս անդրադարձաւ բժշկական ոլորտի եւ բանկային փոխանցումների խնդրով սահմանափակումների բացասական հետեւանքերին։ Նա որպէս օրինակ նշեց վերջին շրջանում Բէյրութում տեղի ունեցած աղէտի հետեւանքով Լիբանանի ժողովրդին նիւթական օժանդակութիւն փոխանցելու առումով ստեղծւած դժւարութիւնը, դա համարելով անընդունելի եւ մարդասիրական նպատակներին խոչընդոտող մօտեցում: Նախարարը կիսելով հնչած մտահոգութիւնները, յոյս յայտնեց, որ մօտ ապագայում վերանալու է երկու երկրների միջեւ առկայ լարւածութիւնը, միաժամանակ նշելով, որ իր երկրի կառավարութիւնը եւս ամէն բան անելու է տարածաշրջանում խաղաղութիւն հաստատելու համար:
Սրբազան հայրն իր արտայայտութիւնների շարունակութեան մէջ, իր եւ Ազգային իշխանութեան անունից շնորհակալական խօսք ուղղեց Շւէյցարիայի խորհրդարանին՝ Հայոց Ցեղասպանութիւնը պաշտօնապէս ճանաչելու կապակցութեամբ:
Հանդիպման աւարտին երկու կողմերը յուշանւէրներ փոխանակեցին միմեանց, այնուհետեւ խումբն այցելեց Ս. Յովսէփ Արիմաթացի եկեղեցի, որտեղ մէկ շարականի եւ Տէրունական աղօթքի կատարմամբ հանդէս եկաւ Ս. Ա. Վանքի «Կոմիտաս» երգչախմբի ծիսակատար խումբը՝ դոկտ. Արբի Բաբումեանի ղեկավարութեամբ։
Վերջում Նախարարն այցելեց Հայոց Ցեղասպանութեան յուշարձան եւ ծաղիկներ խոնարհեց հայ նահատակների յիշատակին:
