«ԱԼԻՔ» – Երէկ՝ յուլիսի 30-ին, Իսլ. խորհրդարանի նիստերի դահլիճում տեղի է ունեցել Հանրապետութեան նորընտիր նախագահ Մասուդ Փեզեշքիանի երդման հանդիսաւոր արարողութիւնը:
Նախագահ Փեզեշքիանն իր ելոյթում խոստացել է կատարել ստանձնած բոլոր պարտականութիւնները, պաշտպանել իրանցիների իրաւունքները, երկրի սահմանները եւ քաղաքական, տնտեսական ու մշակութային անկախութիւնը: Նա յայտարարել է, որ Իրանի եւ աշխարհի համար նոր հնարաւորութիւններ են բացւել:
«Թեհրանը պէտք է յաղթահարի դժւարութիւնները եւ կայուն զարգացման ուղիներ բացի, աշխարհն էլ պէտք է օգտւի այս բացառիկ հնարաւորութիւնից՝ Իրանի օգնութեամբ լուծելու տարածաշրջանային եւ համաշխարհային խնդիրները»,- ասել է Փեզեշքիանը:
Յիշեցնենք, որ արարողութեանը ներկայ են եղել աւելի քան 70 երկրներից ժամանած բարձրաստիճան հիւրեր եւ պատւիրակութիւններ:
Արարողութիւնը լուսաբանել են աւելի քան 600 տեղական եւ օտարերկրեայ լրագրողներ: