Աղբիւր՝ www.yerkir.am

Մարտի 25-ին կայացրած որոշմամբ Թուրքիայի կառավարութիւնը պետականացրել է հայկական Տիգրանակերտ քաղաքի Սուր թաղամասում գտնուող 6300 կառոյց եւ տարածք, որոնց թւում է նաեւ Սուրբ Կիրակոս եկեղեցին:

Ըստ «Ակօս»-ի՝ պետականացուած կալուածքների թւում են նաեւ ասորական, քաղդէական եւ բողոքական եկեղեցիներ:

Սուրբ Կիրակոս եկեղեցին տարիներ շարունակ թողնուած է եղել բախտի քմահաճոյքին:  Այն վերջին տարիներին մեծ ջանքերի շնորհիւ վերանորոգուել եւ վերաբացուել էր:

«Ակօս»-ի թղթակիցը կապ է հաստատել Տիգրանակերտի քաղաքապետարանի մշակութային ժառանգութեան գրասենեակի նախագահ Նեւին Սոյլուքայեանի հետ, ով յայտնել է,  որ Սուր շրջանում գտնուող բոլոր եկեղեցիներին եւ հիմնադրամներին պատկանող տարածքների պետականացման որոշումն արդէն կայացուած է: Այդ կալուածքների ցանկում են քաղաքապետարանին պատկանող ունեցուածքներ, որոնց համար քաղաքապետարանը որոշել է դատի տալ կառավարութեանը:

Սոյլուքայեան նաեւ յայտնել է, որ անհրաժեշտ է, որ սեփականատէրերը նոյնպէս դատական գործընթաց սկսեն: